ސަރުކާރުގެ އެންމެ އިސް ސިޔާސަތަކީ އިހުލާސްތެރިކަމާއެކު އަދުލުވެރިކަން ގާއިމުކުރުންކަމަށާއި، ކުށް ކުރާ މީހަކަށް ހައްގު އަދަބު ލިބޭނެކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މުއިއްޒު މިހެން ވިދާޅުވީ ޕީއެންސީގެ ކޮންގްރެސް ނިންމާލުން ރަސްމިއްޔާތުގައި ވާހަކަ ދައްކަވަމުންނެވެ.
ރައީސް ވިދާޅުވި ގޮތުގައި، ސިޔާސީ ޕާޓީތަކުގެ ތަފާތު ސިކުނޑިތަކާއި ފިކުރުތައް ހުރި ނަމަވެސް، މި ސަރުކާރުގެ ވިސްނުމަކީ ގައުމުގައި ހަމަޖެހުން ގާއިމުކުރުމެވެ. ކޮންމެ މީހަކަށްމެ އެ މީހަކު ބޭނުންވާ ސިޔާސީ ޕާޓީއެއްގައި ނުވަތަ ފިކުރެއްގައި ހުރުމުގެ މިނިވަންކަން އޮންނާނެ ކަމަށާއި، އޭގެ ސަބަބުން އެއްވެސް މީހަކަށް ލިބޭނެ އަދަބެއް ނެތްކަމަށް ރައީސް ވިދާޅުވި އެވެ.
އެހެން ނަމަވެސް އެ މީހަކީ ގާނޫނާއި ހިލާފުވާ މީހެއްގެ ގޮތުގައޮ ވެގެން ނުވާނެކަމަށް ރައީސް ވިދާޅުވި އެވެ.
ވަކި މީހަކު ވަކި ސިޔާސީ ފިކުރެއްގައި ހުރުމަކީ އެ މީހަކަށް އަދަބު ދޭންޖެހޭނެ ކަމެއް ނޫން. އެހެންނަމަވެސް، ގާނޫނާ ހިލާފަށް އެއްވެސް ކަމެއް ކޮށްގެން ނުވާނެ. ގާނޫނާ ހިލާފުވާނަމަ އެއީ ތަފާތު މައްސަލައެއް
ރައީސް މުއިއްޒު އިތުރަށް ވިދާޅުވި ގޮތުގައި އިރާދަކުރެއްވިއްޔާ މި ސަރުކާރުން ކަންކަން ނިންމުމުގައި ފުރިހަމަ ގޮތުގައި އަދުލުވެރިކަން ދަމަހައްޓާނެއެވެ.
މީގެ އިތުރުން، ގައުމުގައި ހުރި ބޮޑެތި މައްސަލަތައް ހައްލުކުރުމުގައި ވެސް ސަރުކާރުން އިސްކުރާނީ އަދުލުވެރިކަމާއި އިހުލާސްތެރިކަންކަމަށް ރައީސް ފާހަގަކުރެއްވިއެވެ.
