ވާދަވެރިންނަށް ވެރިކަން ލިބުމުން ވެސް، އެމްޑީޕީއަށް އެންމެ ބޮޑަށް ފާޑުކިޔުން އަމާޒުވާ ސިޔާސަތުތަކަށް ބަރޯސާ ނުވެ، ގައުމަށް ބޭނުންވާ ފާގަތިކަން ހޯދައިނުދެވޭކަމަށް އެމްޑީޕީގެ ޗެއާޕާސަން އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެކްސްގައި ކުރެއްވި ޕޯސްޓެއްގައި ރައީސް ނަޝީދު ވިދާޅުވީ، އެމްޑީޕީއާ އިދިކޮޅު ފަރާތްތަކުން އަބަދުވެސް އަމިއްލައަށް ސިފަކުރަނީ އެ މީހުންނަކީ ގައުމީ އަދި އިސްލާމީ ބައެއްގެ ގޮތުގައި ކަމަށެވެ. އަދި އެމްޑީޕީއަކީ ޣައިރު އިސްލާމީ، ގައުމިއްޔަތާ ހިލާފު ބައެއް ކަމަށް އެފަރާތްތަކުން ތުހުމަތުކުރާކަމަށް އެމަނިކުފާނު ވިދާޅުވިއެވެ.
އެގޮތުން، އެމްޑީޕީއަކީ ޣައިރު އިސްލާމީ އަދި ގައުމިއްޔަތާ ހިލާފު ޕާޓީއެއް ކަމަށް ދެއްކުމުގެ ގޮތުން އިދިކޮޅު ފަރާތްތަކުން ދައްކަނީ ދައުލަތުގެ މުދާ ވިއްކުމާއި ޕްރައިވެޓައިޒްކުރުމަށް އެމްޑީޕީން ގެންގުޅޭ ސިޔާސަތުކަމަށް ރައީސް ނަޝީދު ވިދާޅުވިއެވެ.
ނަމަވެސް، އިދިކޮޅު ފަރާތްތަކަށް ވެރިކަން ލިބުމުން، އެމްޑީޕީން ގެންގުޅޭ ޣައިރު އިސްލާމީ އަދި ގައުމިއްޔަތާ ހިލާފު ސިޔާސަތުތަކެއްގެ ގޮތުގައި ސިފަކުރާ ހަމަ އެ ސިޔާސަތުތަކަށް ބަރޯސާނުވެ، ދިވެހި ރައްޔިތުންނަށް ހައްގުވާ އަދި ބޭނުންވާ ފާގަތިކަން ހޯދައިދެވިފައިނުވާ ކަމަށް އެމަނިކުފާނު ވިދާޅުވިއެވެ.
ރައްޔިތުން އެމްޑީޕީއަށް އިތުބާރުކުރަނީ އެ ޕާޓީއަކީ ނަޒާހަތްތެރި އަދި ތެދުވެރި ބަޔަކަށްވާތީ ކަމަށް ވެސް ރައީސް ނަޝީދު ވިދާޅުވިއެވެ.
އެމަނިކުފާނު މިހެން ވިދާޅުވެފައި މިވަނީ، ރަސްމާލޭގެ ބޮޑު ބައެއް ޔޫއޭއީގެ އީގަލްސް ހިލްސް ކުންފުންޏަށް 99 އަހަރަށް ދިނުމަކީ ބޭރުގެ ފަރާތްތައް ރާއްޖޭގައި ވަޒަންވެރިވުމަށް ޖާގަ ލިބޭ، ގައުމުގެ ސިޔާދަތަށް ގެއްލުންވާނެ ކަމެއް ކަމަށް ބުނެ އެމްޑީޕީ އަދި ބައެއް ފުންނާބު އުސް ދީނީ އިލްމުވެރިން ވެސް ކަންބޮޑުވުން ފާޅުކުރަމުންދާ ދަނޑިވަޅެއްގައެވެ.
