މިވަގުތު ސަރުކާރަށް އެންމެ ރަނގަޅު ގޮތަކަށް ވާނީ ރަސްމާލޭގައި ހިންގަން ޔޫއޭއީގެ އީގަލް ހިލްސްއާ ހަވާލުކުރަން އުޅޭ މަޝްރޫއުގެ ކޮންޓްރެކްޓު މަޖިލީހަށް ފޮނުވައި މަޝްރޫއަށް ބޭނުންވާ ގާނޫނީ އޮނިގަނޑު ފާސްކުރުންކަމަށް އެމްޑީޕީގެ ޗެއާޕާސަން އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އީގަލް ހިލްސް މަޝްރޫއާ ގުޅޭގޮތުން އެކްސްގައި ކުރެއްވި ޕޯސްޓެއްގައި ރައީސް ނަޝީދު ވިދާޅުވީ، އުސޫލެއްގެ ގޮތުން ރެޒިޑެންސީ ޕްރޮގްރާމަކަށް ރާއްޖެ ހުޅުވާލުމަކީ ރަނގަޅު ކަމެއް ކަމަށެވެ. އެހެންނަމަވެސް، އީގަލް ހިލްސްގެ ކޮންޓްރެކްޓް އަދި ނުފެންނަ ކަމާއި އެ ކޮންޓްރެކްޓް ހާމަނުކުރާކަން އެމަނިކުފާނު ފާހަގަކުރެއްވިއެވެ.
ރައީސް ނަޝީދު ވިދާޅުވީ، މިހާތަނަށް އެ މަޝްރޫއާ ގުޅިގެން އިވުނު ވާހަކަތަކުން އޮތީ ދެ ކަންބޮޑުވުމެއް ކަމަށެވެ. އެއީ އެ ބިން ދޫކުރުމުގެ ބަދަލުގައި އެޑްވާންސް ފައިސާއެއް ނުލިބުމާއި މާލޭ ސަރަހައްދުގައި މަޝްރޫއު ހިންގުން ކަމަށް ވިދާޅުވިއެވެ.
އެހެންކަމުން، ސަރުކާރަށް އެންމެ ރަނގަޅު ގޮތަކަށް ވާނީ ކޮންޓްރެކްޓް އަވަހަށް މަޖިލީހަށް ފޮނުވުން ކަމަށާއި މި ސަރުކާރުގެ އަގުލަބިއްޔަތުން މަޝްރޫއަށް ބޭނުންވާ ގާނޫނީ އޮނިގަނޑު ފާސްކުރުން ކަމަށް ވިދާޅުވިއެވެ.
”އަޅުގަނޑަށް ފެންނަ ގޮތުގައި ސަރުކާރަށް އެންްމެ ރަނގަޅު ގޮތަކަށް ވާނީ ކޮންޓްރެކްޓް އަވަހަށް މަޖިލީހަށް ފޮނުވުން. މި ސަރުކާރުގެ އަގުލަބިއްޔަތުން މި މަޝްރޫއަށް ބޭނުންވާ ގާނޫނީ އޮނިގަނޑު ފާސްކުރުން،“ ރައީސް ނަޝީދު
އެ މަޝްރޫއާ ގުޅިގެން އަމާޒުވެފައިވާ ފާޑުކިޔުންތަކަށް ޖަވާބުދެއްވަމުން ބަންޑާރަަނައިބު އަހުމަދު އުޝާމް ވިދާޅުވެފައިވަނީ، އެ މަޝްރޫއު ހިނގާނީ މިހާރު އެކުލަވާލަމުން އަންނަ ރިއަލް އެސްޓޭޓް ގާނުނުގެ ދަށުން ކަމަށެވެ. މިހާތަނަށް ސޮއިކޮށްފައިވަނީ ހަމައެކަނި ލެޓާ އޮފް އިންޓެންޓުގައި ކަމަށާއި ކުރިއަށް އޮތް ތަނުގައި މަޝްވަރާކޮށްގެން އިތުރު އެއްބަސްވުންތަކެއް އެކުލަވާލައި ސޮއިކުރާނެ ކަމަށާއި އެކަމާ ގުޅޭ ގާނޫނުތައް މަޖިލީހުން ފާސްކުރަންޖެހޭނެ ކަމަށް އުޝާމް ވިދާޅުވިއެވެ.
