ޓްރެފިކްގެ އާންމު އުސޫލުތަކާއި ގަވައިދުތަކާ ހިލާފުވާ ފަރާތްތަކަށް އެންމެ މަތީ ދަރަޖައިގައި ފިޔަވަޅު އަޅަން ކޮމިޝަނާ އޮފް ޕޮލިސް އަހުމަދު މުހައްމަދު ދިވެހި ފުލުހުންނަށް އަންގަވައިފިއެވެ،
ޓްރެފިކް ގަވާއިދުތަކާ ތަކުރާރުކޮށް ހިލާފުވާ ފަރާތްތަކާމެދު ހަރުކަށި ފިޔަވަޅު އެޅުމާ ގުޅޭގޮތުން ސީޕީ ނެރުއްވި ބަޔާނެއްގައި ވިދާޅުވެފައިވަނީ، މަގުމަތީގެ ޓްރެފިކްގެ އާންމު އުސޫލުތަކާއި އަދަބުތަކަށް ބޯނުލަނބާ މަދު ބައެއްގެ ސަބަބުން ގިނަ ބައެއްގެ ހައްގުތައް ގެއްލި ނުރައްކާތެރި އެކިއެކި ހާދިސާތައް ތަކުރާރުކޮށް ދޭތެރެ ދޭތެރެއިން ހިނގަމުންދާތީ، މަގުމަތީގެ އުސޫލުތަކާއި ޓްރެފިކްގެ ގާނޫނުތަކާއި ގަވައިދުތަކާ ތަކުރާރުކޮށް ހިލާފުވާ ފަރާތްތަކާމެދު ހާއްސަ ފިޔަވަޅުތަކެއް ދިވެހި ފުލުހުން އަޅަމުންދާނެ ކަމަށެވެ.
ސީޕީ ވިދާޅުވީ، އެ ފިޔަވަޅުތަކުގެ މަގްސަދަކީ މަގުތަކަކީ އެންމެހާ ރައްޔިތުންނަށް ވެސް އަމާން ރައްކާތެރި ތަނެއްގެ ގޮތުގައި ބޭއްވުމާއި، މަދު ބައެއްގެ ސަބަބުން ހިނގާ އެފަދަ ނުރައްކާތެރި ހާދިސާތައް ހުއްޓުވުމަށް އެޅެންހުރި އެންމެ ހަރުކަށި ފިޔަވަޅު އެޅުން ކަމަށެވެ.
އެ ފިޔަވަޅުތައް ކަމާގުޅުންހުރި އެންމެހާ މުއައްސަސާތަކާ ގުޅިގެން އެންމެ މަތީ ދަރަޖައެއްގައި އަޅަމުންދިޔުމަށް ފުލުހުންގެ ކަމާބެހޭ އެންމެހާ ބަހާތަކަށް މިހާރު އަންގާފައިވާނެ ކަމަށް ސީޕީ ވިދާޅުވިއެވެ. އެ ފިޔަވަޅުތައް ގްރޭޓާ މާލޭ އޭރިއާގެ އިތުރުން އަތޮޅުތެރޭގެ ރަށްރަށުގައި ވެސް އަޅަމުން ގެންދާނެ ކަމަށް ވެސް ވިދާޅުވިއެވެ.
އެކަމުގައި ދިވެހި ފުލުހުންނަށް އެއްބާރުލުމާއި އެހީތެރިކަން ދިނުމަށް އެންމެހާ ފަރާތްތަކަށް ސީޕީގެ ބަޔާނުގައި އިލްތިމާސްކުރައްވާފައިވެއެވެ.
ޓްރެފިކްގެ ގަވައިދުތަކާ ހިލާފުވާ ފަރާތްތަކާމެދު ފިޔަވަޅު އެޅުމަށް ސީޕީ އަންގަވާފައިވާއިރު، މި މަހުގެ 20 ވަނަ ދުވަހު ސޯސަންމަގުގައި ހިނގި ނުރައްކާތެރި އެކްސިޑެންޓުގައި އަނިޔާވި ތިން މީހުންގެ ތެރޭގައި ހިމެނޭ އުމުރުން 26 އަހަރުގެ އަންހެން މީހާއަށް ފަރުވާދެމުން ދަނިކޮށް މިދިޔަ ހުކުރު ދުވަހު ވަނީ ނިޔާވެފައެވެ.
އެ މައްސަލައިގައި ނުރައްކާތެރިކޮށް ސައިކަލު ދުއްވި ތ. ދިޔަމިގިލި، އައްސޭރި، މާހު ހަސަން، 21، މިހާރު ވަނީ ހައްޔަރުކޮށްފައެވެ. ފުލުހުން ގެންދަނީ އޭނާގެ މައްސަލަ ތަހުގީގުކުރަމުންނެވެ. ފުލުހުން ބުނެފައިވާ ގޮތުގައި، އޭނާއަކީ ލައިސަންސް ނެތި ސައިކަލު ދުއްވައިގެން މި އަހަރު އެކަނި ވެސް ހަތަރު ފަހަރަށް ޖޫރިމަނާކޮށްފައިވާ މީހެކެވެ.
