މިދިޔަ ހަފްތާގައި ފެނުނު ހިމަބިހީގެ ކޭސްތައް ދަށަށް ގޮސްފިއެވެ.
މި އަހަރު ރާއްޖޭގައި ހިމަބިހީގެ އައުޓްބްރޭކެއް އައީ މިދިޔަ މޭ މަހުގެ ތެރޭގައެވެ. އަދި އޭގެ ފަހުން ހިމަބިހީގެ ކޭސްތައް ފެންނަ މިންވަރު އިތުރުވަމުންދިޔައެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އާންމުކުރި ތަފާސްހިސާބުތަކުން ދައްކާގޮތުން ނިމިދިޔަ ހަފްތާގައި ހިމަބިހީގެ ދެ ކޭސް ފެނިފައިވެއެވެ. ނަމަވެސް އޭގެ ކުރީ ހަފްތާ 13 ކޭސް ފެނުނެވެ. އައު ކޭސްތަކާއެކު ހިމަބިހި ޖެހުނު މީހުންގެ އަދަދު މިހާރު ވަނީ 284އަށް އަރައިފައެވެ.
ހިމަބި ފެތުރެން ފެށުމުން އެޗްޕީއޭއިން ވަނީ ވެކްސިން ޖެހުމުގެ ޕްރޮގްރާމެއް ފަށާފައެވެ. އެގޮތުން މި ޕްރޮގްރާމްގެ ދަށުން މިހާތަނަށް 16،368 މީހަކަށް ވެކްސިން ޖަހާފައިވާކަމަށް އެޗްޕީއޭއިން ބުނެއެވެ. އަދި ވެކްސިން ނުޖަހާ މީހުން ވެކްސިން ޖެހުމަށް އެޗްޕީއޭއިން އެދެއެވެ.
މި އަހަރުގެ މެއި މަހު ރާއްޖޭގައި ހިމަބިހި ފެތުރެން ފެށި ދުވަސްވަރާ އަޅާބަލާއިރު، މިހާރު ހަފުތާއަކު ބަލިޖެހިގެން ރިޕޯޓްކުރާ މީހުންގެ އަދަދު ވަނީ ވަރަށް ދަށްކުރެވިފައެވެ.
އެޗްޕީއޭއިން ބުނި ގޮތުގައި ބަލި ކޮންޓްރޯލް ކުރުމަށްޓަކައި ކުރެވުނު މަސައްކަތުގެ ދަށުން، މިހާތަނަށް 16،320 އަށް ވުރެ ގިނަ މީހުން ވަނީ ހިމަބިހިން ރައްކާތެރިވުމަށް ޖަހާ އެމްއާރު ވެކްސިން ފުރިހަމަކޮށްފައެވެ.
ހިމަބިއްސަކީ ”މީސްލްސް ވައިރަސް“ގެ ސަބަބުން ޖެހޭ، ގައިންގަޔަށް ވަރަށް ފަސޭހައިން އަރާ ބައްޔަކަށް ވާތީ، ވެކްސިންގެ ދެ ޑޯޒް ހަމަކުރެވުނުކަން ޔަގީންނުވާ ފަރާތްތަކުން ވީ އެންމެ އަވަހަކަށް ކަނޑައެޅިފައިވާ މަރުކަޒުތަކުން ވެކްސިން ޖެހުމަށް އެޗްޕީއޭއިން ވަނީ އިލްތިމާސްކޮށްފައެވެ. އަދި ބަލިޖެހިފައިވާ މީހަކާ ކޮންޓެކްޓްވި ފަރާތްތަކަށް ހުޅުމާލެ ހޮސްޕިޓަލުންނާއި އާބަން ޕްރައިމަރީ ހެލްތު ކެއާ ސެންޓަރުން ވެކްސިން ޖެހުމުގެ އިންތިޒާމު ވަނީ ހަމަޖައްސައިފައެވެ.
މީގެ އިތުރުން މާލެ ސަރަހައްދުގެ ބޮޑެތި ހޮސްޕިޓަލްތަކުގެ އިތުރުން، އަތޮޅުތަކުގެ ހޮސްޕިޓަލްތަކާއި ރަށްރަށުގެ ސިއްހީ މަރުކަޒުތަކުން ވެސް ކަނޑައެޅޭ ވަކި ގަޑިތަކެއްގައި މި ވެކްސިން ދިނުމުގެ އިންތިޒާމުތައް ވަނީ ހަމަޖައްސާފައެވެ.
