އެމްޑީޕީއަކީ ދިވެހިރާއްޖެ ބަދަލުކުރި ޕާޓީ ކަމަށާއި ދެންވެސް ދިވެހީންނަށް ހެޔޮ ގޮތް ހޯދައިދޭނެ ޕާޓީ އަކީ އެމްޑީޕީ ކަމަށް އެ ޕާޓީގެ ޗެއާޕާސަން އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެމްޑީޕީގެ ކޮންގްރެސް ފެށުމުގެ ޖަލްސާގައި ޖަލްސާގައި، އެމްޑީޕީގެ ސިޔާސަތަކާ ބެހޭގޮތުން ވާހަކަ ދައްކަވަމުން ނަޝީދު ވިދާޅުވީ، ރަށު ބަންދުން ދިވެހި ރައްޔިތުން ސަލާމަތްކޮށް، ދަތުރުފަތުރުގެ ނިޒާމުން ދިވެހިރާއްޖެ ގުޅާލި ޕާޓީއަކީ އެމްޑީޕީ ކަމަށެވެ. އަދި ލާމަރުކަޒީ ނިޒާމަކީ އެ ޕާޓީގެ ވަކާލާތު ކަމަށާއި އެ ޕާޓީގެ ސިޔާސަތުން ކިތަންމެ ބަޔަކަށް ބޯހިޔާވަހިކަން ދެވިއްޖެ ކަމަށް ރައީސް ނަޝީދު ވިދާޅުވިއެވެ.
ސްކޫލް އިމާރާތް ބަރިއާއ،ި މަލްޓިޕާޕަސް ހޯލާއި، ފުޓްބޯޅަ ދަނޑާއި، ހެލްތު ސެންޓަރުތަކާއި، ހޮސްޕިޓަލް އަދި މަގު ހެދުމަކީ ވެސް އެމްޑީޕީގެ ސިޔާސަތުގެ ތެރެއިން ދިވެހި ރައްޔިތުންނަށް ހޯދައިދެވުނު ކަންކަން ކަމަށް އެމަނިކުފާނު ވިދާޅުވިއެވެ.
ރައީސް ނަޝީދު ވިދާޅުވީ، އެމްޑީޕީއަކީ މުޅި ދިވެހިރާއްޖެ ބަދަލުކުރި ޕާޓީ ކަމަށާއި ދެންވެސް ދިވެހީންނަށް ހެޔޮ ގޮތް ހޯދައިދޭނީ އެމްޑީޕީން ކަމަށެވެ.
”މި ޕާޓީއަކީ މި ދިވެހިރާއްޖެ ބަދަލުކުރި ޕާޓީ، މި ޕާޓީއަކީ ދެންވެސް ދިވެހީންނަށް ހެޔޮ ގޮތް ހޯދައިދޭނެ ޕާޓީ. އަޅުގަނޑުމެންނަކީ ދިވެހި ރައްޔިތުންގެ ޕާޓީ،“
އެންމެ ކުޑަ އުޖޫރަ ހޯދައިދީ، ގާނޫނުގެ ދަށުން ސާވިސް ޗާޖު ނަގައިދިނީ އެމްޑީޕީން ކަމަށް ވެސް އެމަނިކުފާނު ވިދާޅުވިއެވެ.
އެމަނިކުފާނު ވިދާޅުވީ، އެމްޑީޕީ މަސައްކަތްކުރަމުންދަނީ ދިވެހި ރައްޔިތުންގެ ހެވާއި ލާބައަށް ޓަކައި ކަމަށާއި އެ ޕާޓީ ދެމި އޮންނާނީ ވެސް އެގޮތުގައި ކަމަށެވެ.
މި ސަރުކާރަށް ފާޑުވިދާޅުވަމުން އެމަނިކުފާނު އިތުރަށް ވިދާޅުވެފައިވަނީ، ދަރަނި އަދާކުރުމުގެ އެއްވެސް ސިޔާސަތެއް ނެތް މި ސަރުކާރުގައި ނެތް ކަމަށާއި، ބޭރުން ފައިސާއެއް ވެސް ނުގެނެވޭ ކަމަށެވެ. އެތަން މިތަނުން ޑޮލަރު ހޯދައިގެން ދަރަނި ދެއްކުުމުން ރާއްޖެއިން މިހާރު ޑޮލަރު ހުސްވެފައިވާ ކަމަށް ވެސް އެމަނިކުފާނު ވިދާޅުވިއެވެ.
