ލީޑާޝިޕްގެ މާނައަކީ ހުރިހާ ކަމެއް ރަނގަޅަށް ކުރެވުނުކަން ގަބޫލުކުރުމެއް ނޫން، ޒިންމާދާރު ސިޔާސީ ޕާޓީއެއްގެ ގޮތުގައި އަމިއްލަ ކުށްތައް ދެނެގަތުމުގެ ހިތްވަރު ހުންނަންވާނެ ކަމަށް ރައީސް ސޯލިހު ވިދާޅުވިއެވެ.
އެމްޑީޕީގެ ކޮންގްރެސް ފެށުމުގެ ޖަލްސާގައި ވާހަކަ ދައްކަވަމުން ރައީސް ސޯލިހު ވިދާޅުވީ، ދިވެހި ރައްޔިތުން ރާއްޖޭގެ ވެރިކަން ކުރަން އެމްޑީޕީއަށް ފުރުސަތު ދިން ދެ ފަހަރު ވެސް މުޅި ރާއްޖެ ތަރައްގީކުރުމުގެ ގިނަ މަސައްކަތްތަކެއް ކުރެވުނުކަމަށެވެ.
ސިއްހަތާއި ތައުލީމާއި މީހުން ބިނާކުރުމާއި ބޯހިޔާވަހިކަމާއި ދަތުރުފަތުރާއި އަސާސީ ހިދުމަތްތައް ތަރައްގީކޮށް ލާމަރުކަޒީ ނިޒާމު ބާރުގަދަކުރުމަށް އެ ޕާޓީން ގިނަ މަސައްކަތްތަކެއް ކުރި ކަމަށް އެމަނިކުފާނު ވިދާޅުވިއެވެ.
އެމަނިކުފާނުގެ ވެރިކަމުގައި ނިންމުންތައް ނިންމަން ޖެހުނީ މީގެ ކުރިން އެއްވެސް މީހަކު ތަޖުރިބާނުކުރާ ފަދަ ހާލަތެއްގައި ކަމަށް ވެސް ރައީސް ސޯލިހު ވިދާޅުވިއެވެ. އަދި އޭރު ފަސޭހަ އެއްވެސް ޖަވާބެއް ނެތް ކަމަށް ވިދާޅުވިއެވެ.
އެހެންނަމަވެސް، ހުރިހާ ރަށެއްގައި ދިރިއުޅޭ އެންމެނަށް އަަސާސީ ހިދުމަތްތައް ދިނުމުގެ މަސައްކަތް ފެށުމުން އަދި ހާއްސަކޮށް ކުދި ރަށްތަކަށް ހިދުމަތް ދޭން ފެށުމުން އެއީ ބޭކާރު ހަރަދުތަކެއްގެ ގޮތުގައި ކިޔައި ފާޑުކިޔުން އަމާޒުކުރިކަމަށް ވެސް ވިދާޅުވިއެވެ.
އެހެންނަމަވެސް، އެމްޑީޕީގެ ކޮންގްރެސްގައި އެންމެ ހާއްސަ އިންވެސްޓެމެންޓް ފޯރަމްގެ ބިންގަލަކީ އެއީ ކަމަށެވެ. ރަށްރަށުގައި ކަރަންޓާއި ފެނާއި ނަރުދަމާ އަދި ބަނދަރު ހުރުމުން އެ ރަށްރަށަށް މީހުން އިންވެސްޓްކުރާނެ ކަމަށް ވިދާޅުވިއެވެ.
އެހެންނަމަވެސް، ހުރިހާ ކަމެއް ރަނގަޅު ކަމެއް ކުރެއްވުނުކަމަށް ވިދާޅުނުވާ ކަމަށާއި ލީޑާޝިޕްގެ މާނައަކީ ހުރިހާ ކަމެއް ރަނގަޅަށް ކުރެވުނުކަން ގަބޫލުކުރުން ނޫންކަމަށް ރައީސް ސޯލިހު ވިދާޅުވިއެވެ. ކާމިޔާބީތަކާއެކު ހެދުނު ކުށްތައް ނުވަތަ ގޯސްތައް ވެސް ގަބޫލުކުރަންޖެހޭ ކަމަށާއި އެއިން ފިލާވަޅު ލިބެންޖެހޭ ކަމަށް ވިދާޅުވިއެވެ.
އޭގެ އިތުރުން ޒިންމާދާރު ސިޔާސީ ޕާޓީއެއްގެ ގޮތުގައި އަމިއްލަ ކުށްތައް ދެނެގަތުމުގެ ހިތްވަރު ހުންނަންވާނެ ކަމަށާއި ކުށްތައް ގަބޫލުކުރުމަކީ އުސޫލުތައް ދޫކޮށްލުން ނޫން ކަމަށް ވެސް ރައީސް ސޯލިހު ވިދާޅުވިއެވެ.
”ޒިންމާދާރު ސިޔާސީ ޕާޓީއެއްގެ ގޮތުގައި އަމިއްލަ ކުށްތައް ދެނެގަތުމުގެ ހިތްވަރު ހުންނަންވާނެ. ކުށްތައް ގަބޫލުކުރުމަކީ އުސޫލުތައް ދޫކޮށްލުމެއް ނޫން. ފަހަތަށް ބެލުމަކީ ކުރިއަށް ދާން ދަސްކުރުން،“ ރައީސް ސޯލިހު
މިއަދު ގައުމު އޮތް ހާލަތާ ގުޅޭގޮތުން ރައީސް ސޯލިހު ވިދާޅުވީ، ސަރުކާރަށް އާމްދަނީ އިތުރުކުރުމުގެ ނަމުގައި މުޅި ޓޫރިޒަމް އިންޑަސްޓްރީ ފުނޑުފުނޑުކޮށްލަން މަސައްކަތްކުރަމުންދާ ކަމަށެވެ.
އިގްތިސާދީ މުސްތަގުބަލާމެދު އިންތިހާއަށް ކަންބޮޑުވުންތައް އެބަ އޮތް ކަމަށާއި ޑިމޮކްރެޓިކް ހަމަތައް މުޅިން ގެއްލި ރައްޔިތުންގެ މަޖިލިސް ރައީސް އޮފީހުގެ ޑިޕާޓްމެންޓަކަށް ވެއްޖެ ކަމަށް ރައީސް ސޯލިހު ވިދާޅުވިއެވެ. އޭގެ އިތުރުން މިއަދު މިނިވަން މުއައްސަސާތަކުގެ ބާރު ވެސް ކަނޑުވާލާފައިވާ ކަމަށް ވިދާޅުވިއެވެ.
