ސިއްރު އެއްބަސްވުމެއްގެ ދަށުން ހިނގާ އެއްވެސް ކަމަކަށް އާނއެކޭ ބުނެގެން ނުވާނެކަމަށް ކުރީގެ ރައީސް އިބްރާހިމް މުހައްމަދު ސާލިހު ވިދާޅުވެއްޖެއެވެ.
އެމްޑީޕީގެ 5 ވަނަ ކޮންގްރެސް ހުޅުވުމުގެ ރަސްމިއްޔާތުގައި ވާހަކަދައްކަވަމުން ރައީސް ސާލިހު ވިދާޅުވީ، މިހާރު އެންމެ ބާރަށް އިވެމުންދާ އަޑަކީ މި ސަރުކާރުން ރަސްމާލެއިން ބޮޑު ބަޔެއް ބޭރުގެ ބަޔަކަށް ހިލޭ ދޫކޮށްލުމަށް ނިންމާފައިވާ ވާހަކަ ކަމަށެވެ.
އެގޮތުން، ރަސްމާލޭގެ ބިން ހިއްކަމުންދަނީ ދިވެހި ރައްޔިތުންގެ ފައިސާއިން ކަމަށް ވީއިރު މި ސަރުކާރުން ވަނީ މުޅި މާލޭގެ ދެމާލެއަށް ވުރެ ބޮޑު ބިމެއް ހިލޭ ބޭރުގެ ބަޔަކަށް ދީފައިވާކަމަށް އެމަނިކުފާނު ވިދާޅުވިއެވެ.
ފުށިދިއްގަރު ފަޅުން 1150 ހެކްޓަރުގެ ބިން ހިއްކަމުންދަނީ ދިވެހި ރައްޔިތުންގެ ފައިސާއިން ކަމަށް ވީއިރު މި ސަރުކާރުން އެ ބިން ހިލޭ ބޭރުގެ ބަޔަކަށް ދީފައިވާކަމަށް ރައީސް ސާލިހު ތުހުމަތުކުރެއްވިއެވެ. އަދި ސިއްރު އެއްބަސްވުމެއްގެ ދަށުން ހިނގާ އެއްވެސް ކަމަކަށް އާއެކޭ ބުނެގެން ނުވާނެކަމަށް ރައީސް ސާލިހު ވިދާޅުވިއެވެ.
”ސިއްރު އެއްބަސްވުމުގެ ދަށުން ހިނގާ އެއްވެސް ކަމަކަށް އަޅުގަނޑުމެން އާއެކޭ ބުނެގެން ނުވާނެ،“ ރައީސް ސާލިހު
ރައީސް ސާލިހު ވަނީ ރަސްމާލެ ތަރައްގީކުރުމުގެ މަޝްރޫއު ޔޫއޭއީގެ އީގަލް ހިލްސް ކުންފުންޏާއި ހަވާލުކުރުން ދިވެހި ރައްޔިތުންނަށް ވަނީ ކޮން ފައިދާއެއްތޯ ސުވާލު އުފައްދަވާފައެވެ.
”މުޅި މާލޭގެ ދެމާލެ ވަރު ބޮޑު ބިމެއް ބޭރުގެ ބަޔަކަށް ހިލޭ ދޭ ވާހަކަ މިހާރު އަޑު އެވެނީ. ރައްޔިތުންނަށް މީގެން ވަނީ ކޮން ފައިދާއެއް؟ ސަރުކާރަށް މީގެން ލިބެނީ ކޯއްޗެއް؟ އަޅުގަނޑުމެން ފޮރިން އިންވެސްޓްމަންޓުތަކާއި ދެކޮޅުވަނީކީ ނޫން. އަދި ރެސިޑެންސް ވީސާވެސް އުސޫލު ތަކެއްގެ މަތިން ދިނުމާއި ހިލާފުވަނީކީ ނުން. ނޭނގޭ ކަންކަން މީގެ ތެރޭގައި އޮތީމައި ސުވާލު އުފެދެނީ،“ ރައީސް ސާލިހު
ރައީސް ސާލިހު ވަނީ ސަރުކާރަށާއި އަދި އީގަލްސް ހިލްސްއަށް ރަސްމާލޭގައި ހިންގަން އުޅޭ މަޝްރޫއުގެ މައުލޫމާތު ހިއްސާކުރުމަށް ގޮވާލައްވާފައެވެ. އަދި އެފަދަ އެއްވެސް މަސައްކަތެއް ކުރުމަށް އެއްވެސް ވަރަކަށް ސަރުކާރަށް ޖާގަ ދީގެން ނުވާނެކަމަށް އެމަނިކުފާނު ވިދާޅުވިއެވެ.
މި ސަރުކާރުން މިހާރު އީގަލް ހިލްސްއާއެކު އެކުލަވާލަން މަސައްކަތްކުރަމުންދާ އެއްބަސްވުމަކީ ރަނގަޅު ނިޔަތުގައި ކުރަމުންދާ ކަމެއްގެ ގޮތުގައި ދެއްކުމަށްޓަކައި އެމްޑީޕީގެ ސަރުކާރުން ފޮއްތެޔޮ ފަޅު ބޭރުގެ ބަޔަކަށް ހިލޭ ދިން ކަމަށް ބުނަމުންދާކަމަށް އެމަނިކުފާނު ވިދާޅުވިއެވެ.
ރައީސް ސާލިހު ވިދާޅުވީ، އެމްޑީޕީގެ ސަރުކާރުން ވެފައިވާ އެއެއްބަސްވުމުގެ ދަށުން ސަރުކާރަށް 43 މިލިއަން ޑޮލަރު ވަދެފައިވާނެ ކަމަށެވެ. އަދި ފޮއްތެޔޮ ފަޅުގައި ޑޮމެސްޓިކް އެއާޕޯޓެއް އެޅުމަށް އިންވެސްޓަރުންގެ ފައިސާއިން ބިން ހިއްކާ އެއާޕޯޓު އެޅުމަށް ހަވާލުކުރެވުނުކަން ފާހަގަކުރެއްވިއެވެ. އޭގެ އިތުރުން، ނ. އަތޮޅުގެ ފަޅެއް 27 މިލިއަން ޑޮލަރު އެޑްވާންސްގެ ގޮތުގައި ލިބޭގޮތަށް ދޫކުރިކަން ވެސް ފާހަގަކުރެއްވިއެވެ.
