އެމްޑީޕީއަކީ އާންމު ރައްޔިތުން ވެފައިވާ އެތައް ބޮޑެތި ގުރުބާނީތަކެއްގެ މައްޗަށް ބިނާވެފައިވާ ޕާޓީއެއް ކަމަށާއި، ވެރިކަމުގެ ހަގީގީ ބާރު އަބަދުވެސް އޮންނަންވާނީ ރައްޔިތުންގެ އަތްމަތީގައި ކަމަށް ކުރީގެ ރައީސް އިބްރާހީމް މުހައްމަދު ސާލިހް ވިދާޅުވެއްޖެއެވެ.
ރައީސް ސާލިހް މިހެން ވިދާޅުވީ އެމްޑީޕީގެ 5 ވަނަ ކޮންގްރެސް ފެށުމުގެ ޖަލްސާގައި ވާހަކަފުޅު ދައްކަވަމުންނެވެ. ކޮންގްރެސްގެ ބައިވެރިންނާ މުހާތަބުކުރައްވައި އެމަނިކުފާނު ދެއްކެވި ވާހަކަފުޅުގައި، އެމްޑީޕީގެ ފިކުރާއި އަސާސްތައް ދެމެހެއްޓުމުގެ މުހިންމުކަމުގެ މައްޗަށް އަލިއަޅުއްވާލެއްވިއެވެ.
އެގޮތުން، އެ ޕާޓީ އުފެދިގެން އައީ އަދި މިހިސާބަށް ދަތުރުކުރީ އެތައް ދިވެހި ރައްޔިތުންނެއްގެ ބުރަ މަސައްކަތާއި، ވެފައިވާ މަތިވެރި ގުރުބާނީތަކެއްގެ ސަބަބުންކަން އެމަނިކުފާނު ފާހަގަކުރެއްވިއެވެ.
މީގެ އިތުރުން ރައީސް ސާލިހް ވިދާޅުވީ، އެމްޑީޕީގެ އެންމެ މުހިންމު އެއް އަސާސަކީ ކޮންމެ ރައްޔިތަކަށްމެ ހިޔާލުފާޅުކުރުމާއި މިނިވަންކަމާއެކު ބަސްބުނުމުގެ ފުރިހަމަ ހައްގު ލިބިދިނުން ކަމަށެވެ.
ޑިމޮކްރެސީއެއްގެ އެންމެ މައިގަނޑު ތަނބަކީ ވެރިކަން ހިންގުމުގެ ހުރިހާ ބާރެއް ރައްޔިތުންގެ ކިބައިން ފެށިގެން އައުން ކަމަށާއި، އެ ބާރު އަބަދުވެސް އޮންނަންވާނީ ރައްޔިތުންގެ އަތްމަތީގައި ކަމަށް އެމްޑީޕީން އަބަދުވެސް ގަބޫލުކުރާ ކަމަށް އެމަނިކުފާނު ވިދާޅުވިއެވެ.
އެމްޑީޕީގެ ކޮންގްރެސް ރަސްމީކޮށް މިރޭ ފަށާފައިވާއިރު، މި މަހުގެ 3 ވާ އާދިއްތަ ދުވަހުގެ ނިޔަލަށް ކޮންގްރެސްގެ ހަރަކާތްތައް ކުރިއަށްދާނެއެވެ.
