އެމްޑީޕީގެ ރިޔާސީ ކެންޑިޑޭޓާއި އެ ޕާޓީއާ ދެމެދު ސިޔާސަތުތައް ތަންފީޒުކުރުމުގައި ބަނދެވޭ އެއްބަސްވުމެއް އޮންނަންޖެހޭކަމަށް އެ ޕާޓީގެ ކުރީގެ ޗެއާޕާސަން ފައްޔާޒު އިސްމާއިލް ވިދާޅުވެއްޖެއެވެ.
އެމްޑީޕީގެ ކޮންގްރެސްގައި އޭނާ ހުށަހަޅުއްވާފައިވާ އާ އަަސާސީ ގަވައިދުގެ މައިގަނޑު ނުކުތާތަކާ ބެހޭގޮތުން ވާހަކަ ދައްކަވަމުން ފައްޔާޒު ވިދާޅުވީ، އެ ޕާޓީގެ ތަޖުރިބާގައި އެމްޑީޕީގެ ސަރުކާރެއް އެކުލެވޭއިރު، އެމްޑީޕީއާއި ސަރުކާރާ ގުޅިފައި އޮންނަންޖެހޭ ކަމަށެވެ. އެހެންކަމުން، އެމްޑީޕީގެ ކެންޑިޑޭޓެއް ރިޔާސީ އިންތިހާބަށް ނެރޭއިރު އެ ކެންޑިޑޭޓަކާއި ޕާޓީއާ ދެމެދު އެއްބަސްވުމެއް އޮންނަންޖެހޭނެ ކަމަށް އޭނާ ވިދާޅުވިއެވެ.
އެ އާ އަސާސީ ގަވައިދު ފާސްވެއްޖެނަމަ، އެމްޑީޕީގެ ރިޔާސީ ކެންޑިޑޭޓުގެ ސަރުކާރެއް އުފެެދިއްޖެނަމަ ޕާޓީގެ ސިޔާސަތު ތަންފީޒުކުރުމާއި ގައުމީ ސިޔާސަތު ކަނޑައެޅުމުގައި ޕާޓީއާ މަޝްވަރާކުރަންޖެހޭނެ ކަމަށް ވެސް އޭނާ ވިދާޅުވިއެވެ.
ރިޔާސީ އިންތިހާބު ކާމިޔާބުވެއްޖެނަމަ ސަރުކާރު އެކުލަވާލުމުގައި އާއި މުހިންމު ސިޔާސަތުތައް ކަނޑައެޅުމާއި ތަންފީޒުކުރުމަށް ގައުމީ މަޖިލީހުގެ ލަފައާ މަޝްވަރާ ހޯދުމަށް އެއްބަސްވާ އެއްބަސްވުމެއްގައި ޕާޓީއާއެކު ސޮއިކުރަން އާ އަސާސީ ގަވައިދަށް އޭނާ ހުށަހެޅި އިސްލާހުގައި ހިމަނާފައިވެއެވެ.
އޭގެ އިތުރުން އަސާސީ ގަވައިދަށް ހުށަހެޅި އެ އިސްލާޙުގައި، ރައީސުލްޖުމްހޫރިއްޔާގެ އިސް މުޝީރަކަށް ޕާޓީގެ ޗެއާޕާސަން އައްޔަންކުރަންވާނެ ކަމަށް ވެސް ހިމަނާފައިވެއެވެ. އަދި ސިޔާސީ މަގާމުތަކާއި ސިޔާސަތުތައް ކަނޑައެޅުމުގައި ރަށްރަށުގެ ހިންގާ ކޮމިޓީގެ މަޝްވަރާ ލިބެންޖެހޭނެކަމަށް ވެސް ހިމަނާފައިވެއެވެ.
ރިޔާސީ އިންތިހާބު ކާމިޔާބުކުރާ ފަރާތަކީ ގައުމީ މަޖިލީހުގެ މެމްބަރެއް ކަމުގައި ނުވާނަމަ ޕާޓީއާއެކު އެއްބަސްވުމުގައި ސޮއިކުރާ ދުވަހުން ފެށިގެން ރައީސްކަމުގެ ހުވާކުރާ ދުވަހާ ހަމައަށް އޭނާ އަކީ ގައުމީ މަޖިލީހުގެ މެމްބަރެއްގެ ގޮތުގައި ހިމެނޭނެ ކަމަށް ވެސް ފައްޔާޒުގެ އިސްލާހުގައިވެއެވެ.
ފައްޔާޒު ހުށަހެޅުއްވި އިސްލާހަށް ތާއީދުކުރެއްވީ ރައްޔިތުންގެ މަޖިލީހުގެ ކުރީގެ ނައިބު ރައީސް އީވާ އަބްދުﷲއެވެ.
