މޯލްޑިވްސް ޑިމޮކްރެޓިކް ޕާޓީ އެމްޑީޕީގެ ރަސްމީ އެޕްލިކޭޝަން ”ޔެލޯ“ ލޯންޗުކޮށްފިއެވެ.
އެ އެޕްލިކޭޝަން ލޯންޗުކޮށްފައިވަނީ، އެމްޑީޕީގެ 5 ވަނަ ކޮންގްރެސްގެ ތެރެއިން މިއަދުއެވެ. އެ އެޕް މެދުވެރިކޮށް އެ މީހެއްގެ އައިޑީކާޑު ނަމްބަރު ޖައްސަވައިގެން އެޕްލިކޭޝަނަށް ލޮގިންކުރެވޭނެއެވެ.
އެޕްލިކޭޝަން މެދުވެރިކޮށް އެންމެ ފަހުގެ ޚަބަރުތަކާއި އަދި ޕާޓީގެ ކުރިއަށް ރޭވިފައިވާ ޚަރަކާތްތަކުގެ މައުލޫމާތު ވަގުތުން ބަލާލެވޭނެއެވެ. މީގެ އިތުރުން، ޕާޓީގެ މެމްބަރުންނާއި އަދި ޕާޓީގެ ގޮފިތަކާ ގުޅުވައިދޭ ހާއްސަ ޗެޓް ހިމެނޭއިރު ”ޔެލޯ“ އެޕްލިކޭޝަން އެޕްސްޓޯތަކުން މިހާރު ޑައުންލޯޑުކުރެވޭނެއެވެ.
އެމްޑީޕީގެ ނައިބު ރައީސް އިބްރާހިމް ވަހީދު ވަނީ އެ އެޕްލިކޭޝަނަކީ އެ ޕާޓީގެ އިދާރީ ކަންކަން ފުރިހަމަކުރުމަށް ކުރެވެގެންދިޔަ މުހިންމު ކަމެއްކަން ފާހަގަކުރައްވާފައެވެ. އަދި އެއީ ޕާޓީއާއި މެމްބަރުންނާއި ދެމެދު އޮތް ގުޅުން އިތުރަށް ވަރުގަދަ ކުރުމަށް ހުޅުވިގެންދިޔަ މުހިންމު ދޮރެއްކަމަށް ސިފަކުރައްވާފައިވެއެވެ.
އެޕް މެދުވެރިކޮށް ޕާޓީގެ ހުރިހާ މެމްބަރުންނަށް ފަސޭހަކަމާއެކު ޕާޓީގެ ގޮފިތަކާއި އަދި ވަކިވަކި މެމްބަރުންނާއިވެސް މަޝްވަރާ ކުރެވޭނެކަމަށާއި، ޕާޓީގެ ހުރިހާ މެމްބަރުންނަށް ހުޅުވާލެވިފައިވާ ސޯޝަލް މީޑިއާ ޕްލެޓްފޯރމެއް ވެސް އެޕްގެ ތެރޭގައި ހިމެނޭނެކަމަށް އެ އޭނާ ވިދާޅުވެފައިވެއެވެ.
އަދި މިހާރުވެސް 1100 މެމްބަރުން އެޕްލިކޭޝަން ބޭނުން ކުރަމުންދާކަމަށް އެ ޕާޓީން ވަނީ ބުނެފައެވެ. އަދި މުސްތަގުބަލުގައި ޕާޓީގެ ވީހާވެސް ގިނަ މެމްބަރުން އެޕް ބޭނުންކުރުމަކީ ޕާޓީގެ އެދުމެއްކަމަށް ފާހަގަކުރިއެވެ.
