އެމްޑީޕީގެ ރައީސާއި ނައިބު ރައީސްގެ މަގާމު އުވާލައި އެންމެ އިސް މަގާމަކަށް ޗެއާޕާސަން ހަދަން އިސްލާހެއް!

އެމްޑީޕީގެ ރައީސާއި ނައިބު ރައީސްގެ މަގާމު އުވާލުމަށް ޕާޓީގެ އަސާސީ ގަވައިދަށް އިސްލާހު ހުށަހަޅައިފި އެވެ.

މި އިސްލާހު މިއަދުގެ ކޮންގްރެސް ޖަލްސާއަށް ހުށަހެޅުއްވީ، ޕާޓީގެ ކުރީގެ ޗެއާޕާސަން ފައްޔާޒް އިސްމާއީލެވެ. އިތުރު އެހެން އިސްލާހުތައް ވެސް ފައްޔާޒް ހުށަހެޅުއްވި އިރު އޭގެ ތެރޭގައި ގައުމީ މަޖިލިސް އެކުލެވިގެންވާ ގޮތަށް ބަދަލު ގެނައުމާއި، ކޮންގްރެސްގައި ބައިވެރިވުމަށް ގޮފިތައް ހެދޭ ގޮތަށް އޮތް އުސޫލަށް ބަދަލު ގެނައުން ހިމެނެ އެވެ.

މި އިސްލާހަށް ތާއީދު ކުރުމަށް ފުރުސަތު ހުޅުވާލުމުން، މަޖިލީހުގެ ކުރީގެ ނައިބު ރައީސް އީވާ އަބްދުﷲ ވަނީ ހުށަހެޅުންތަކަށް ތާއީދު ކުރައްވާފަ އެވެ.

ކޮންގްރެސްއަށް ދެން ފައްޔާޒް ހުށަހެޅި އިސްލާހުތަކުގެ ތެރޭގައި ހިމެނެނީ، ޕާޓީ ތެރޭގައި ރަސްމީކޮށް ފެކްޝަން އުފައްދައިގެން މަސައްކަތް ކުރުން މަނާކުރުމެވެ. ގޮފިތަކަކީ ހަމައެކަނި ކޮންގްރެސްއަށް މީހުން ހޮވުމަށް ބޭނުން ކުރާ ވަސީލަތަކަށް ވާތީ، ގޮފިތައް އުވާލުމަށް ވެސް އިސްލާހުތަކުގައި ހިމެނެ އެވެ. 

މީގެއިތުރުން ގައުމީ މަޖިލީހަށް އިންތިހާބަކާއި ނުލައި، މެމްބަރުން އިންތިހާބުވުން އުވާލުމަށް ހުށަހަޅާފައިވާއިރު، އޭގެ ތެރޭގައި ޕާޓީގެ ބޮޑެތި މަގާމުތައް ވެސް ހިމެނެ އެވެ. މި އިސްލާހުގެ ބޭނުމެއްކަމަށް ބުނެފައި ވަނީ، މެންބަރުންގެ މިނިވަންކަން ކަށަވަރުކުރުމާއި، މަޖިލީހަކީ މުޅިން އިންތިހާބީ ގޮތުން އެކުލެވިގެންވާ ގޮތްތެއްގެ ގޮތުގައި ބަދަލުކުރުމެވެ. އަދި ގައުމީ މަޖިލީހުގެ މެންބަރުންނަކީ ޕާޓީގެ އޮފީހުން މުސާރަ ނުވަތަ އިނާޔަތް ލިބޭ ބަޔަކަށް ވެގެން ނުވާނެކަމަށް ވަނީ ބުނެފަ އެވެ.

އިތުރު އިސްލާހެއްގެ ގޮތުގައި އެމްޑީޕީގެ ޕާލިމަންޓްރީ ގުރޫޕްގެ ލީޑަރު އިބްރާހިމް ނާޒިލް ހުށަހެޅުއްވީ، ކޮންމެ އިންތިހާބެއް އިއުލާނުކުރުމުގެ 10 ދުވަސް ކުރިން ގައުމީ މަޖިލީހުން ”ހާއްސަ އިންތިހާބީ ކޮމިޓީ“ އެއް އެކުލަވާލުމަށެވެ. އަދި ކޮންގްރެސްގައި ބައިވެރިވާ މެންބަރުންގެ ފުރިހަމަ މައުލޫމާތު، ކޮންގްރެސް ބޭއްވުމުގެ 10 ދުވަސް ކުރިން ޕާޓީގެ ރަސްމީ ވެބްސައިޓުގައި ޝާއިއުކުރަން ޖެހޭގޮތަށް ވަނީ ހުށަހަޅުއްވާފަ އެވެ.

އިންތިހާބުގައި ވޯޓު ބައިބައި ކުރުމަށް، ނުވަތަ ވޯޓުތައް ހޯދުމުގެ ބޭނުމުގައި އެހެން ޕާޓީތަކުން ޕާޓީއަށް މެމްބަރުން ވެއްދުން ހައްލު ކުރުމަށް ވެސް އިސްލާހެއް ހުށަހަޅާފައިވެ އެވެ. އެއީ ރިޔާސީ ޕްރައިމެރީ ބޭއްވުމަށް އިއުލާނު ކުރާ ތާރީހުގެ ކުރިޔަށް 90 ދުވަހުގެ މުއްދަތެއް އެ މީހަކު މެމްބަރެއްގެ ގޮތުގައި ހުރުމެވެ.