މެމްބަރޝިޕްގެެ ނިސްބަތުން އެމްޑީޕީގެ ގައުމީ މަޖިލީހަށް މެމްބަރުން ނެގުމާއި ދެކޮޅު ކަމަށް ކުޑަހުވަދޫ ދާއިރާގެ ރައީސް ޝާތިރު އަބްދުލްރަހުމާން ވިދާޅުވެއްޖެއެވެ.
އެމްޑީޕީގެ އަސާސީ ގަވައިދަށް އިސްލާހު ހުށައަޅުއްވަމުން ޝާތިރު ވިދާޅުވީ، ފައްޔާޒް ހުށައަޅުއްވާފައިވާ އިސްލާހުގައި އިސްލާހުކުރަން ބޭނުންވާ އެއް މާއްދާ ވާކަމަށެވެ. ޝާތިރު ވިދާޅުވީ، ގައުމީ މަޖިލީހަށް މެމްބަރުން ނަގާކަމަށް ބުނާއިރު، ވަކި އަދަދެއް ހަމަވާނަމަ ބައެއް ރަށްތަކުން 2 މެމްބަރުންވެސް ނަގާ ކަމަށެވެ. އެހެންނަމަވެސް އެކަމަށް ތާއިދު ނުކުރައްވާ ކަމަށް ފާހަގަކުރައްވާ ޝާތިރު ވިދާޅުވީ އެއް ރަށެއްގައި ދެ މެމްބަރުން ހުރެއްޖެނަމަ ޒިންމާ އަދާކުރާނެ މީހާއި ދެމެދު ސުވާލު އުފެދޭނެ ކަމަށާއި، އެކަމާއި މެދު ބަހުސްތައް ހިނގާ، މަގާމުގެ މަސްއޫލިއްޔާތު އުފުލާނީ ކާކުތޯ ސުވާލު އުފެދޭ ކަމަށެވެ.
އެގޮތުން ޝާތިރު ވިދާޅުވީ، ވަކި މީހަކަށް މަގާމުގެ މަސްއޫލިއްޔަތު ހަވާލުކޮށްފިނަމަ މައްސަލަ ޖެހި، އެ މީހަކު ސީނުން ގެއްލޭނެ ކަމަށާއި، އަދި އެމީހާގެ ބޭނުން ނުހިފޭނެ ކަމަށެވެ. މެމްބަރޝިޕްއަށް ބަދަލު އައިސް 500 އަށް ވުރެ އާބާދީ މަދުވެއްޖެ ހާލަތުގައި ގައުމީ މަޖިލިސް ދެ މެމްބަރުންގެ ތެރެއިން އެއް މެންބަރަކު ސަސްޕެންޑު ވޭތޯ ވެސް ޝާތިރު ސުވާލު އުފެއްދެވިއެވެ. އެކަން ސާފުކުރަން ބޭނުންވާ ކަމަށް އޭނާ ވިދާޅުވިއެވެ.
ޝާތިރު ވިދާޅުވީ، އޭނާގެ އިސްލާހަކީ ކޮންމެ ރަށެއްގައިވެސް ގައުމީ މަޖިލިސް މެމްބަރަކު ހުރުން ކަމަށާއި، އެރަށުގައި މެމްބަރޝިޕް 100 ނުވަތަ އެއަށް ވުރެ ދަށުގައި ހުއްޓަސް ރަށް ތަމްސީލްކުރާނެ މެމްބަރަކު ބޭނުންވާ ކަމަށެވެ.
މީގެ އިތުރުން ޝާތިރު ވިދާޅުވީ، ފައްޔާޒްގެ އިތުރު އިސްލަހުތަކަށް ތާއިދުކުރައްވާ ކަމަށެވެ. އެހެންނަމަވެސް ބަހުސް މަރުހަލާގެ ތެރެއިން ވަނީ ބައެއް އޮޅުންތައް އަރާފައެވެ. އެގޮތުން ޝާތިރު އިސްލާހު ހުށައެޅުއްވީ އަސާސީ ގަވައިދަށް ނޫން ކަމަށާއި، އޭނާ އިސްލާހު ހުށައެޅުއްވީ ފައްޔާޒްގެ އިސްލާހަށް ކަމަށް ރިޔާސަތުން އެންގިއެވެ.
އެކަމަށް ރައްްދު ދެއްވައި ޝާތިރު ވިދާޅުވީ، އޭނާ އަސާސީ ގަވައިދަށް އިސްލާހު ހުށަހެޅި ކަމަށާއި، އެހެންނަމަވެސް ޕޯޑިއަމްގައި ލިބުނު ފުރުސަތުގައި ހަމައެކަނި ފާހަގަކުރެއްވީ ފައްޔާޒް ހުށަހެޅި އިސްލާހަށް އިސްލާހު ހުށައެޅުމަށް ކަމަށެވެ. އެކަމާ ގުޅިގެން ރިޔާސަތުން ވިދާޅުވީ، އަސާސީ ގަވައިދަށް އިސްލާހު ހުށަހަޅަން އޮތް މުއްދަތު ނިމުނު ފަހުން އިސްލާހު ހުށަހެޅި ކަމަށާއި، އެއަށް ފަހު ހުޅުވާލީ ފައްޔާޒް ހުށަހަޅާއިފައިވާ އިސްލާހަށް އިތުރު އިސްލާހެއް ހުށައަޅަން ބޭނުންވާނަމަ އެކަން ހުށައެޅުމަށް ހުޅުވާލި ފުރުސަތު އެކަނި ކަމަށެވެ.
