ރައްޔިތުންގެ ވޯޓުން އިންތިހާބު ކުރާ މަގާމެއްގައި ހުންނަ ފަރާތެއް ރެކޯލް ވޯޓަކުން ވަކިކުރުމުގެ ފުރުސަތު ބޮޑު ބަދަލުން ލިބިގެންދާނެ ކަމަށް އިލްޔާސް ލަބީބް ވިދާޅުވެއްޖެއެވެ.
އެމްޑީޕީގެ ކޮންގްރެސްގައި ފައްޔާޒް ހުށައެޅުއްވި ބޮޑު ބަދަލުގެ ގަރާރަށް ތާއީދުކުރައްވައި އިލްޔާސް ލަބީބް ވަނީ ވާހަކަފުޅު ދައްކަވާފައެވެ. އިލްޔާސް ވިދާޅުވީ ގާނޫނުއަސާސީއަށް ގެންނަ ބައެއް އިސްލާހުތަކާ ގުޅިގެން ރެފަރަންޑަމްއަކަށް ދާން އޮތް ނަމަވެސް، ބޮޑު ބަދަލާއެކު ގާނޫނުއަސާސީއަށް ގެންނަ ކޮންމެ ބަދަލެއް ރައްޔިތުންގެ ގާތުން އަހަން ޖެހޭނެ ކަމަށެވެ.
އެގޮތަށް އެ ބަދަލު ގެންނަންޖެހޭ މައިގަނޑު ސަބަބުތަކުގެ ގޮތުގައި އިލްޔާސް ފާހަކުރެއްވީ، އޭރެއްގައި އޮންނަ ސަރުކާރަކަށް މަޖިލީހުގެ މެޖޯރިޓީ އޮންނަ ހާލަތުގައި އަވަސް އަވަހަށް ގާނޫނުއަސާސީއަށް ބަދަލުތައް ގެނައުން ކަމަށް އިލްޔާސް ފާހަގަކުރެއްވިއެވެ. ކޯޓުތަކުގައި ފަނޑިޔާރުން އައްޔަނުކުރުމާއި ގުޅިގެން، އިލްޔާސް ވިދާޅުވީ، މިހާރު އޮންނަ ގޮތުންނަމަ އޭރެއްގައި ހުންނަ ރައީސަކު ބޭނުންވާ ހާލަތުގައި ސުޕްރީމް ކޯޓުގެ ފަނޑިޔާރުން ވަކިކުރުންވެސް އޮންނަ ކަމަށެވެ.
އެހެންނަމަވެސް ބޮޑުބަދަލާއެކު އެކަންވެސް ބަދަލުވާނެ ކަމަށް އިލްޔާސް ވިދާޅުވިއެވެ. ރައްޔިތުންނަށް މުހިންމު ހުރިހާ ކަމެއްގައިވެސް ރައްޔިތުންގެ ގާތުން އަހައިގެން ނޫން ގޮތަކަށް އެކަމެއް ނުހިނގާނެ ކަމަށް އިލްޔާސް ވިދާޅުވިއެވެ.
އޭނާ ވިދާޅުވީ، ރައްޔިތުންގެ މަޖިލީހުގެ އަދަދު ދުވަހުން ދުވަހަށް ބޮޑުވަމުން ދިޔުމަކީ ރައްޔިތުންގެ ކަންބޮޑުވުމެއް ކަމަށާއި، އެހެންކަމުން އެ އަދަދު ވަކި ވަރެއްގައި ހިފެހެއްޓޭނެ ކަމަށެވެ. އަދި ރައްޔިތުން އިންތިހާބުކުރާ ހުރިހާ މަގާމުތަކެއްގައި ހުންން މީހުން، ރިކޯލް ވޯޓަކުން ބަދަލުކުރެވޭ މަގުފަހުވެގެންދާނެ ކަމަށް އިލްޔާސް ވިދާޅުވިއެވެ.
