އުރީދޫ މޯލްޑިވްސްއިން ކުރިއަށްގެންދާ ޚާއްސަ ގިވްއަވޭއެއް މެދުވެރިކޮށް، ދުވުމަށް ޝައުގުވެރިވާ ނަސީބުވެރި 10 ފަރާތަކަށް، ގިނަ ބަޔަކު އިންތިޒާރުކުރަމުން އަންނަ އުރީދޫ ދޯހާ މެރެތަން 2027 ގައި ހިލޭ ބައިވެރިވުމުގެ ފުރުސަތު ހުޅުވާލައިފިއެވެ.
ދުޅަހެޔޮ ދިރިއުޅުމަކާއި، ކުޅިވަރުގެ ރޫހު އާލާކުރުމުގެ އިތުރުން މުވާސަލާތީ ޚިދުމަތްތަކުގެ ބޭރުން މާނަހުރި ތަޖުރިބާތަކެއް ފޯރުކޮށްދިނުމަށް އުރީދޫއިން ކުރަމުންދާ މަސައްކަތްތަކުގެ ދަށުން ކުރިއަށްގެންދާ މި ހަރަކާތަކީ، މި ސަރަހައްދުގައި ބޭއްވޭ ބައިނަލްއަގުވާމީ އެންމެ ފާހަގަކޮށްލެވޭ އެއް ދުވުމުގެ މުބާރާތުގައި ބައިވެރިވުމަށް ދިވެހި ދުވުންތެރިންނަށް ލިބިގެންދާނެ ފުރުސަތެކެވެ.
މި ގިވްއަވޭއިން ނަސީބުވެރި 10 ފަރާތެއް ހޮވުމަށް ހަމަޖެހިފައިވާއިރު، ކޮންމެ ފަރާތަކަށްވެސް އުރީދޫ ދޯހާ މެރެތަން 2027 ގައި ބައިވެރިވުމަށް ހިލޭ ރަޖިސްޓްރޭޝަން ލިބިގެންދާނެއެވެ. ބައިވެރިންގެ ދުޅަހެޔޮކަމާއި ދުވުމުގެ އަމާޒުތަކަށް ބިނާކޮށް، ރޭހުގެ ހަތަރު ކެޓަގަރީއެއްގެ ތެރެއިން ކެޓަގަރީއެއް ޚިޔާރުކުރެވޭނެއެވެ:
- 5 ކިލޯމީޓަރުގެ ދުވުން
- 10 ކިލޯމީޓަރުގެ ދުވުން
- ހާފް މެރެތަން
- ފުލް މެރެތަން
މިއީ އަލަށް ބައިނަލްއަގުވާމީ ރޭހެއް ފުރިހަމަކުރަން ބޭނުންވާ ދުވުންތެރިއަކަށް ވިޔަސް، ނުވަތަ މެރެތަންއެއްގައި ދުވުމަށް ތައްޔާރަށް ހުރި ތަޖުރިބާކާރު އެތުލީޓަކަށް ވިޔަސް، ހުރިހާ ފެންވަރެއްގެ ދުވުންތެރިންނަށްވެސް ބައިނަލްއަގުވާމީ މައިދާނެއްގައި ވާދަކުރުމުގެ އުފާވެރިކަން ތަޖުރިބާކުރުމަށް ހިތްވަރުދޭ ފުރުސަތެއް ކަމަށް އުރީދޫއިން ބުނެއެވެ.
މިފަދަ ހަރަކާތްތަކުގެ ތެރެއިން، އުރީދޫ މޯލްޑިވްސްއިން އަންނަނީ ކުޅިވަރުގެ ހަރަކާތްތަކަށް އެއްބާރުލުންދީ، ހަރަކާތްތެރި ދިރިއުޅުމެއް ޚިޔާރުކުރުމަށް މީހުންނަށް ހިތްވަރުދެމުންނެވެ. އަދި ހަމައެއާއެކު، ބައިނަލްއަގުވާމީ ކުޅިވަރުގެ މުޖުތަމައުއާ ގުޅިލާމެހުމުގެ ފުރުސަތު ދިވެހިންނަށް ފަހިކޮށްދެމުންނެވެ.
ޝައުގުވެރިވާ ފަރާތްތަކުން 14 އޮކްޓޫބަރު 2026 ގެ ކުރިން ore.do/dohamarathon މެދުވެރިކޮށް މި ގިވްއަވޭގައި ރަޖިސްޓަރީވުމަށް ވަނީ ހުޅުވާލާފައެވެ.
