ކޮޅުމަޑުލު ބުރުނީ ކައުންސިލްގެ 2024 ވަނަ އަހަރުގެ މާލީ ބަޔާނުގައި ހިމަނާފައިވާ ރިވައިޒްޑް ބަޖެޓުގެ އާމްދަނީއާއި ޚަރަދުގެ އަދަދުތަކާއި، ކައުންސިލްގެ ހިސާބުތަކަށް ބިނާކޮށް އޮޑިޓުން ތައްޔާރުކުރި ރިވައިޒްޑް ބަޖެޓުގެ އަދަދުތަކާ ދެމެދު ބޮޑެތި ފަރަގުތަކެއް ހުރިކަން އޮޑިޓަރ ޖެނެރަލްގެ އޮފީހުން ނެރުއްވި ކޮމްޕްލަޔަންސް އޮޑިޓް ރިޕޯޓުން ހާމަވެއްޖެއެވެ.
އޮޑިޓަރ ޖެނެރަލް ޙުސައިން ނިޔާޒީ ސޮއިކުރައްވައި ނެރުއްވާފައިވާ މި ރިޕޯޓުގައި ބަޔާންކޮށްފައިވާ ގޮތުގައި، މި ފަރަގުތައް މެދުވެރިވާން ދިމާވި މައިގަނޑު ސަބަބަކީ ކައުންސިލުން ރަސްމީކޮށް ފާސްކޮށްފައިވާ އަސްލު ބަޖެޓުގެ އިތުރުން، ފާސްނުކުރާ އަދަދުތަކެއް ސަޕްލިމެންޓަރީ ބަޖެޓުގެ ގޮތުގައި ދައުލަތުގެ މާލީ ހިސާބުތައް ބަލަހައްޓާ ’ވިޔަ‘ މޮޑިއުލްގައި ހިމަނައި، އެ އަދަދުތައް ހިމެނޭހެން މާލީ ބަޔާން ތައްޔާރުކޮށް ހުށަހަޅާފައިވުމެވެ.
އޮޑިޓް ރިޕޯޓުގައި ފާހަގަކޮށްފައިވާ ގޮތުގައި، ކައުންސިލުން ހުށަހެޅި މާލީ ބަޔާނާއި ހިސާބުތަކުން ފެންނަ އަދަދުތަކުގައި ޚަރަދުގެ ގޮތުން 1.4 މިލިއަނަށް ވުރެ ގިނަ ރުފިޔާގެ ފަރަގެއް އަދި އާމްދަނީގެ ގޮތުންވެސް ފަރަގުތަކެއް ހުއްޓެވެ.
ތަފުސީލުތަކަށް ބަލާއިރު:
- އާމްދަނީ: މާލީ ބަޔާނުގައި ރިވައިޒްކުރި ބަޖެޓުގެ ގޮތުގައި 9,308,522 ރުފިޔާ ހިމަނާފައިވީ ނަމަވެސް، ކައުންސިލްގެ ހިސާބުތަކަށް ބަލައި އޮޑިޓުން ތައްޔާރުކުރި އަދަދަކީ 9,302,744 ރުފިޔާއެވެ. އެހެންކަމުން މިއީ 5,778 ރުފިޔާގެ ފަރަގެކެވެ.
- ޚަރަދު: މާލީ ބަޔާނުގައި ރިވައިޒްކުރި ބަޖެޓުގެ ގޮތުގައި 9,685,204 ރުފިޔާ ހިމަނާފައިވީ ނަމަވެސް، އޮޑިޓްގެ ހިސާބުތަކުން ދައްކަނީ 8,249,555 ރުފިޔާއެވެ. އެއީ 1,435,649 (އެއް މިލިއަން ހަތަރު ލައްކަ ފަންސަތީސް ހާސް ހަސަތޭކަ ސާޅީސް ނުވަ) ރުފިޔާގެ ބޮޑު ފަރަގެކެވެ.
އޮޑިޓް ރިޕޯޓުގައި ފާހަގަކޮށްފައިވާ ގޮތުގައި ’ވިޔަ‘ މޮޑިއުލްގައި ސަޕްލިމެންޓަރީ ބަޖެޓުގެ ގޮތުގައި ރެކޯޑުކޮށްފައިވާ އަދަދުތަކަކީ ކައުންސިލުން ފާސްކޮށްފައިވާ އަދަދުތަކެއް ނޫނެވެ. އަދި އެ އަދަދުތައް ހިމެނިފައިވަނީ ކައުންސިލްގެ އިދާރާއިން ހިސާބުތައް ބެލެހެއްޓުމުގައި ދިމާވެފައިވާ އޮޅުމަކުން ނުވަތަ ކުށަކުން ކަމަށްވެސް އޮޑިޓްގައި ފާހަގަކޮށްފައިވެއެވެ.
31 ޑިސެންބަރު 2024 ގެ ނިޔަލަށް ފާސްކުރި ބަޖެޓާއި އެ ބަޖެޓުން ހޭދަކުރެވުނު ގޮތުގެ ބަޔާނަށް ބަލާއިރު، ދައުލަތުން ދޭ ބްލޮކް ގްރާންޓުގެ ގޮތުގައި ކައުންސިލަށް 5.48 މިލިއަން ރުފިޔާ ބަޖެޓުކުރި ނަމަވެސް، އަހަރު ތެރޭގައި 5.76 މިލިއަން ރުފިޔާ ލިބިފައިވެއެވެ. އެއީ ބަޖެޓުކުރި ވަރަށްވުރެ 288,453 ރުފިޔާ އިތުރު އަދަދެކެވެ.
ނަމަވެސް ކައުންސިލްގެ އަމިއްލަ އާމްދަނީއާއި އެހެނިހެން ވަސީލަތްތަކުން ލިބޭނެ ކަމަށް އަންދާޒާކުރި ގިނަ ފަންޑުތަކަށް ފައިސާ ލިބިފައިވަނީ އަންދާޒާކުރި ވަރަށްވުރެ ބޮޑަށް މަދުންނެވެ. އެގޮތުން:
- ކައުންސިލްގެ ޚިދުމަތުގެ ފަންޑަށް ލިބޭނެ ކަމަށް 1.28 މިލިއަން ރުފިޔާ ލަފާކުރި ނަމަވެސް ލިބުނީ 529,716 ރުފިޔާއެވެ.
- ޓްރަސްޓް ފަންޑުތަކަށް 1.25 މިލިއަން ރުފިޔާ ލިބޭނެ ކަމަށް އަންދާޒާކުރި އިރު، ލިބިފައިވަނީ އެންމެ 4,380 ރުފިޔާއެވެ.
- ހިލޭ އެހީގެ ގޮތުގައި 400,000 ރުފިޔާ ލިބޭނެ ކަމަށް ލަފާކުރި ނަމަވެސް ލިބުނީ އެންމެ 5,000 ރުފިޔާއެވެ.
- އަންހެނުންގެ ތަރައްޤީއަށް މަސައްކަތްކުރާ ކޮމިޓީއަށް 738,453 ރުފިޔާ ލަފާކުރި ނަމަވެސް ލިބުނީ 325,000 ރުފިޔާއެވެ.
މި މައްސަލަތައް ހައްލުކޮށް މާލީ ނިޒާމު ހަރުދަނާކުރުމަށްޓަކައި އޮޑިޓަރ ޖެނެރަލް ވަނީ ލަފާތަކެއް ދެއްވާފައެވެ. އެގޮތުން، ދައުލަތުގެ ހިސާބުތައް ބަލަހައްޓާ ’ވިޔަ‘ މޮޑިއުލްގައި ބަޖެޓުގެ އަދަދުތައް ރަނގަޅަށް ހިމެނުމަށާއި، ސަޕްލިމެންޓަރީ ބަޖެޓެއްގެ ގޮތުގައި އެ މޮޑިއުލްގައި ހިމަނަންވާނީ ކައުންސިލުން ފާސްކުރާ ބަޖެޓް އިޞްލާޙުކުރާ ހާލަތްތަކުގައި ހަމައެކަނި ފާސްކުރާ އަދަދުތައް އެކަނިކަން ކަށަވަރުކުރުމަށް ވަނީ އަންގަވާފައެވެ.
މީގެއިތުރުން، ކުރިއަށް އޮތް ތަނުގައި ކައުންސިލްގެ މާލީ ބަޔާންތައް ތައްޔާރުކުރުމުގައި ހިމަނާ ހުރިހާ އަދަދުތަކަކީ އިދާރާގެ ހިސާބުތަކާ އެއްގޮތްވާ ގޮތުގެ މަތިން ސައްޙަކަމާއެކު ހިމަނާ އަދަދުތަކެއްކަން ކަށަވަރުކުރުމަށްވެސް އޮޑިޓަރ ޖެނެރަލްގެ ރިޕޯޓުގައި ބުރުނީ ކައުންސިލަށް ވަނީ އިލްތިމާސްކުރައްވާފައެވެ.
