ބަރުމާގެ އަސްކަރިއްޔާ އިން އެގައުމުގެ ލީޑަރު އަން ސަން ސޫކީ ހައްޔަރުކޮށް ހިންގަމުންދަނީ ރާއްޖޭގައި 2012 ވަނަ އަހަރު ހިންގިފަދަ ބަޢާވާތެއް ކަމުގައި އޭރުގެ ރާއްޖޭގައި ވެރިކަމުގައި ހުންނެވި ރައީސް މުހައްމަދު ނަޝީދު ވިދާޅުވެއްޖެއެވެ.
ސޫކީ ނިސްބަތްވެ ވަޑައިގަންނަވާ ނޭޝަނަލް ލީގް ފޯ ޑިމޮކްރެސީގެ ތަރުޖަމާނު ”ރޮއިޓާސް“ އަށް މައުލޫމާތު ދެމުން ވިދާޅުވީ ސޫކީގެ އިތުރުން އެގައުމުގެ ރައީސް ވިން މަޔިންޓް އާއި އެހެނިހެން ސިޔާސީ ފަރާތްތައް ވެސް އަސްކަރިއްޔާ އިން ހައްޔަރުކޮށްގެން ގެންގޮސްފައިވާ ކަމަށެވެ.
މިކަމާ ގުޅިގެން ރައީސް ނަޝީދު ވިދާޅުވީ ބަރުމާގައި ހިނގަމުދަނީ އެމަނިކުފާނު ވެރިކަމުން ވައްޓާލުމަށް ރާއްޖޭގައިވެސް އޭރު ހިންގިފަދަ ބަޣާވާތެއްކަމަށެވެ.
ރައީސް ނަޝީދު ވިދާޅުވީ މިހާރު ބަރުމާގައި ހިނގަމުންދާ ކަންތައްތަކާއި، އެމެރިކާގެ ވެރިކަން ބަދަލުވުމުގެ ތެރޭގައި ހިނގައިދިޔަ ކަންތައްތަކަކީ ރާއްޖޭގައި ހިނގައިދިޔަ ކަންތައްތަކާއި އެއްފަދަ ކަންތައްތަކެއް ކަމަށެވެ. އަދި މިއީ ބަޢާވާތުގެ ކަންތައްތަކެއްކަމަށް ރައީސް ނަޝީދު ވަނީ ސިފަ ކުރައްވާފައެވެ.
What’s happening in Burma this morning is eerily similar to what happened in Maldives on 7 February 2012. Shows importance of reforming institutions & being vigilant against coups plotters and baagees- they lurk everywhere, from Male, to Rangoon, to Washington DC.
— Mohamed Nasheed (@MohamedNasheed) February 1, 2021
ކުއްލި ގޮތަކަށް މިޔަންމާގެ ވެރިކަން ކުރާ ޕާޓީގެ އިސްވެރިންތަކެއް ހައްޔަރުކޮށްފައިމިވަނީ މިދިޔަ ނޮވެމްބަރު މަހު އެގައުމުގައި ބޭއްވި ގާނޫނު ހަދާ މަޖިލީހުގެ އިންތިހާބު އޮޅުވާލާފައިވާ ކަމުގެ ތުހުމަތު އެގައުމުގެ އަސްކަރިއްޔާ އިން ކުރަމުން އަންނަތާ ދުވަސްތަކެއް ފަހުންނެވެ. އެގޮތުން އެ އިންތިހާބުގައި ނޭޝަނަލް ލީފް ފޯ ޑިމޮކްރެސީން ވަނީ ސަރުކާރެއް އުފެއްދޭ މިންވަރަށް ގާނޫނު ހަދާ މަޖިލީހުގެ ގޮނޑިތައް ކާމިޔާބުކޮށްފައެވެ.
މިޔަންމާގެ އަސްކަރިއްޔާ އިން ފާއިތުވި ދުވަސްތަކުގައި ވެރިކަން ކުރާ ޕާޓީއަށް ބަހުގެ ގިނަ ހަމަލާތަކެއް ދީފައިވާއިރު އަސްކަރިއްޔާ އިން އެގައުމުގައި ބަޣާވާތެއް ގެންނަން އުޅޭ ކަމުގެ އަޑުތަކެއް ވެސް ދާދިފަހުން ވަނީ ފެތުރިގެން ގޮސްފައެވެ.
