ހއ. ފިއްލަދުއާ އެއް ފަޅެއްގެ ތެރޭގައި އޮންނަ ދައްޕަރު، އެ ރަށުގެ އިހުތިސާސްގެ ތެރޭގައި އަލުން ހިމަނަން ރައީސް އިބްރާހިމް މުހައްމަދު ސޯލިހް ނިންމަވައިފިއެވެ.
ފިއްލަދޫގެ އިދާރީ ދާއިރާގެ އިހުތިސޯސުގެ ތެރޭގައި ހިމެނޭ ދައްޕަރު، އެ އިދާރާގެ އިހުތިސޯސުން ވަކިކޮށްފައިވަނީ އޮގަސްޓް 29 ވަަނަ ދުވަހު ރައީސް އާންމު ކުރެއްވެވި ގަރާރަކުންނެވެ.
ނަމަވެސް އެ ނިންމުމާ ދެކޮޅަށް ފިއްލަދޫ ރައްޔިތުން ވަނީ ތެދުވެފައެވެ. އަދި ޕެޓިޝަނެއް ތައްޔާރުކޮށް ރައީސް ސޯލިހާއި މަޖިލީހަށްވެސް ވަނީ ހުށައަޅާފައެވެ.
ރައީސް އޮފީހުގެ ތަރުޖަމާނު މުހައްމަދު މަބްރޫކް އަޒީޒް ވިދާޅުވީ، ދައްޕަރުގެ މައްސަލައާ ގުޅޭ ގޮތުން ކައުންސިލްއާ އެކު މަޝްވަރާތައް ކުރިއަށް ގެންގޮސްފައިވާ ކަމަށެވެ. އެގޮތުން ފިއްލަދޫ ރައްޔިތުން ދައްޕަރު މައްސަލަައިގައި ދެކޭ ގޮތް މިއަދުގެ އިކޮނޮމިކް ކައުންސިލްގައި މަޝްވަރާ ކުރެވުނު ކަމަށް މަބްރޫކް ވިދާޅުވިއެވެ. އަދި ފިއްލަދޫ ކައުންސިލްގެ އިހްތިސާސްގައި ދައްޕަރު އަނބުރާ ހިމެނުމަށް ރައީސް ސޯލިހް ވަނީ ނިންމާވާފައި ކަމަށް މަބްރޫކް ވިދާޅުވިއެވެ.
