މިރޭ އެމްޑީޕީގެ ކޮންގްރެސް ހުޅުވުމަށް ބާއްވާ ޖަލްސާގައި ކުރީގެ ރައީސުން މުހައްމަދު ނަޝީދާއި އިބްރާހިމް މުހައްމަދު ސޯލިހު ވާހަކަ ދައްކަވާ ގޮތަށް ހަމަޖެހިއްޖެއެވެ.
އެމްޑީޕީގެ ކޮންގްރެސްގެ ހުޅުވުމުގެ ޖަލްސާގެ އެޖެންޑާގައިވާ ގޮތުން މިރޭ އެންމެ ފުރަތަމަ މަންދޫބުންނާ މުހާތަބުކުރައްވައި ވާހަކަ ދައްކަވަން ހަމަޖެހިފައިވަނީ ރައީސް ނަޝީދެވެ.
އެއަށްފަހު ވާހަކަ ދައްކަވަން ހަމަޖެހިފައިވަނީ ތިނަދޫ ސިޓީ ޑަބްލިއުޑީސީގެ ރައީސާ މަރިޔަމް ޝަރޫނާ އާދިލްއެވެ.
އޭގެ ފަހުން ރައީސް އިބްރާހިމް މުހައްމަދު ސޯލިހު ވާހަކަ ދައްކަވާ ގޮތަށް ހަމަޖެހިފައިވާއިރު، އެމަނިކުފާނުގެ ވާހަކަފުޅަށްފަހު ގައުމީ ސަލާމުން ޖަލްސާ ނިންމާލާނެއެވެ.
ކޮންގްރެސްގެ ތެރެއިން ކުރިއަށް ގެންދަން ހަމަޖެހިފައިވާ އިންވެސްޓްމެންޓް ފޯރަމް ފަށަން ހަމަޖެހިފައިވަނީ މާދަމާ މެންދުރު ފަހު 14:00ގައެވެ. ކައުންސިލްތަކުން ހުށަހަޅާ މަޝްރޫއުތަކަށް އިންވެސްޓަރުން ހޯދަން ބާއްވާ އެ ފޯރަމްގައި ވެސް ރައީސް ނަޝީދު ވާހަކަ ދައްކަވާނެއެވެ.
ކޮންގްރެސްގެ މައިގަނޑު މަސައްކަތްތައް ފަށަން ހަމަޖެހިފައިވަނީ ހޮނިހިރު ދުވަހުގެ ހެނދުނުއެވެ. އެ ދުވަހު ޕާޓީގެ އަސާސީ ގަވައިދަށް ހުށަހަޅާ އިސްލާހުތަކަށް ބަހުސްކޮށް، ވޯޓަށް އަހާނެއެވެ.
