އޯގަނައިޒޭޝަން އޮފް އެފްރިކަން ކެރީބިއަން އެންޑް ޕެސިފިކް ސްޓޭޓްސް (އޯއޭސީޕީއެސް)ގައި ރާއްޖެއިން ބައިވެރިވުމަށް ފެންނަކަމަށް ރައްޔިތުންގެ މަޖިލީހުން މިއަދު ރުހުން ދީފިއެވެ.
މިއަދު ރައްޔިތުންގެ މަޖިލީހުން މިކަމަށް ރުހުން އޮތްކަމަށް ފާސްކުރީ 29 މެމްބަރުންގެ ވޯޓުންނެވެ. އޯއޭސީޕީއެސްގައި ރާއްޖެ ބައިވެރިވުމުން އެފްރިކާއާއި ކެރީބިއަންއާއި ޕެސިފިކްގެ ޤައުމުތަކާއި ރާއްޖޭގެ ގުޅުން އިތުރަށް ބަދަހިވުމަށް މަގުފަހިވާނެއެވެ. އަދި މި ސަރަޙައްދުތަކުގެ ޤައުމުތައް ގުޅިގެން ކުރާ މަސައްކަތްތަކުގައި ނަތީޖާއާހަމައަށް ވާސިލްވުމަށް އިތުރު ބާރަކަށް ވެގެންދާނެއެވެ. އެގޮތުން މޫސުމަށް އަންނަ ބަދަލުތަކާއި ތިމާވެށީގެ މައްސަލަތައްފަދަ ރާއްޖެއިން ބައިނަލްއަޤްވާމީ ދުނިޔޭގައި ވަކާލާތުކުރާ މައްސަލަތަކުގައި ރާއްޖެއަށް އިތުރު ކުރިއެރުންތައް ލިބުމަށް މަގުފަހިވާނެއެވެ.
އޯއޭސީޕީއެސް އަކީ މިހާރުވެސް 79 ޤައުމެއް ބައިވެރިވާ ޖަމްޢިއްޔާއެކެވެ.
