ޗައިނާއަކީ ރާއްޖޭގެ ތަރައްގީގެ ބައިވެރިޔާކަމަށް މާލެ ސިޓީގެ މޭޔަރ ޑރ މުހައްމަދު މުއިއްޒު ވިދާޅުވެއްޖެއެވެ،
މުއިއްޒު މިފަދައިން ވިދާޅުވީ، ޗައިނާ އެއްބަސީ އިން ރާއްޖެއަށް މާލެ ސިޓީ ކައުންސިލަށް 3،000 ޕްލެޓް އަދި މަގު ބައްތި ހަދިޔާކުރުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ.
ރަސްމިއްޔާތުގައި ވާހަކަދައްކަވަމުން ސިޓީގެ މޭޔަރ ޑރ މުހައްމަދު މުއިއްޒު ވަނީ މި އެހީތެރިކަމަށް ޝުކުރު އަދާކުރައްވާފައެވެ. އެގޮތުން މުއިއްޒު ފާހަގަކުރެއްވީ ޗައިނާއަކީ ރާއްޖޭގެ ތަރައްގީއަށް ހަމަހަމަކަމާއި އިހުތިރާމުގެ ނުގުޑާ އަސާސެއްގެ މައްޗަށް ބިނާވެފައިވާގޮތަށް ދިވެހިރާއްޖެއަށް އެންމެ ބޮޑު އެހީތެރިކަމެއްދީފައިވާ ތަރައްގީގެ ބައިވެރިޔާކަމަށެވެ.
ސިނަމާލެ ބުރިޖުގެ 4 ވަނަ އަހަރީ ދުވަހާއި ގުޅިގެން މީޑިއާއަކުން ކުރި ދިރާސާއަކަށް އެ މުހިންމު އުމްރާނީ ތަރައްގީގެ ވަސީލަތުގެ ބޭނުން މިހާތަނަށް 100 މިލިއަނަށްވުރެ ގިނަ ފަހަރު ކުރެވިފައިވާކަން ހާމަވެފައިވާކަމަށް ފާހަގަކުރައްވާ މުއިއްޒު ވިދާޅުވީ މި ބުރިޖުގެ ސަބަބުން މާލެ އާއި ވެލާނާ އިންޓަނޭޝަނަލް އެއާޕޯޓާއިދެމެދު ރައްޔިތުންނަށް ފަސޭހަކަމާ ހަލުވިކަމާއިއެކު، ދިވެހިންނަށް އަދި ފަތުރުވެރިންނަށްވެސް ދަތުރުކުރެވޭނެ ގޮތް މެދުވެރިވެފައިވުމަކީ ގައުމީ ތަރައްގީއަށް ފަހުގެ ތާރީހެއްގައި ލިބިގެން ދިޔަ އެންމެ ދެމެހެއްޓެނިވި ކުރިއެރުންކަމަށެވެ.
މިދިޔަ ސަރުކާރުގެ ހޯމް މިނިސްޓަރުކަންވެސ ކުރައްވާފައިވާ މުއިއްޒު ވިދާޅުވީ ކުރީގެ ރައީސް އަބްދުﷲ ޔާމީން އަބްދުލްގައްޔޫމާއި ޗައިނާގެ ރައީސް ޝީ ޖިންޕިން އާއި ދެމެދު ކުރެވުނު މަޝްވަރާގެ އަލީގައި އެކުލަވާލި އެ މުހިންމު މަޝްރޫއުގެ ތަންފީޒީ ވަޒީރެއްގެ ހައިސިއްޔަތު އޭނާއަށް ލިބުމަކީ އެ އުފާވެރިކަމުގެ ފަހުރު އޭނާއަށްވެސް ލިބިގެންދާކަމެއްކަމަށެވެ.
ސިނަމާލެ ބުރިޖުގެ އިތުރުންވެސް ޗައިނާގެ ސަރުކާރުން ދިވެހިރާއްޖެއަށް ތަރައްގީގެ ގިނަ އެހީތަކެއް ފޯރުކޮށްދީފައިވާކަމަށް ވިދާޅުވ،ެ މުއިއްޒު ފާހަގަކުރެއްވީ މަގުތައް ހެދުމާއި، ހުޅުމާލޭގެ ދެވަނަ ފިޔަވަހީގައި ހިޔާ މަޝްރޫއުގެ ދަށުން އަޅާފައިވާ ޓަވަރުތަކާއި އަދި އެއާޕޯޓާއި މިފަދަ ގިނަ މަޝްރޫއުތަކަކީ މިކަމުގެ ރަމްޒުކަމަށެވެ.
”ޗައިނާ އެއްބަސީއަކީ މާލެ ސިޓީގެ ކައުންސިލާއި ވަރަށް ގާތް ގުޅުމެއް ދަމަހައްޓަމުން ގެންދަވާ އަދެި އަޅުގަނޑުމެންގެ މަސައްކަތްތަކަށް އަބަދުމެ ހިތްވަރާއި އެހީތެރިކަން ފޯރުކޮށްދެމުންދާ ފަރާތެއް.
މުއިއްޒު ފާހަގަކުރެއްވީ ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރަކީ މާލޭގެ ރައްޔިތުންގެ ބޭނުންތަކާއިމެދު އަބަދުމެ މައުލޫމާތު އޮޅުންފިލުވާ، މާލެ ސިޓީގެ ރައްޔިތުން ބޭނުންވާކަންތައްތަކުގައި ހުރި ގޮންޖެހުންތައްފިލުވަދީ، ރައްޔިތުންނަށް ލުއިފަސޭހަކަން ހޯދާ އުފާވެރިކަން ގެނުވާނެ އެކިއެކި ކަންކަމުގައި މަދަދުވެރިވުމަށްޓަކައި ކައުންސިލަށް އެހީތެރިކަން ދެއްވާ މިތުރެއްކަަމަށެވެ.
