އެމްޑީޕީގެ ރައީސް އަދި މަޖިލީހުގެ ރައީސް މުހައްމަދު ނަޝީދަށް ދިން ބޮމުގެ ހަމަލާގެ މައްސަލަ ބެލުމުގައި ރައީސް އިބްރާހިމް މުހައްމަދު ސާލިހު އިހުމާލުތަކެއްވެވަޑައިގެންފައިވާކަމަށް ފާހަގަކުރައްވާ މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު ކަންބޮޑުވުން ފާޅުކުރައްވައިފިއެވެ.
އެމްޑީޕީގެ ތެރޭގައި ބޮޑެތި ބައިބައިވުންތައް އުފެދި، ޕާޓީގެ ރިޔާސީ ކެނޑިޑޭޓެއް ހޮވުމަށް ބޭއްވި ޕްރައިމަރީގެ ކެމްޕެއިންގެ ތެރެއިން ރައީސް ނަޝީދަށް ތާއީދުކުރައްވާ ބައެއް އާންމު ފަރާތްތަކުންވަނީ އެމަނިކުފާނަށް ދިން ހަމަލާގެ ފަހަތުގައި ރައީސް ސާލިހު ފެކްޝަންގެ އަތެއް ވާކަމަަށް ސިފަކޮށްފައެވެ.
ރައީސް ނަޝީދަށް ބޮމުގެ ހަމަލާއެއް ދިނުމުގެ ސަބަބުން ފުރަނާއަށް ނުރައްކާވެ އެތައް ވޭންތަކެއް ތަހައްމަލުކުރަންޖެހުނުތާ ދެ އަހަރުވެފައިވާކަމަށް ވަހީދު ފާހަގަކުރެއްވިއެވެ. އޭނާ ވިދާޅުވީ، މީގެ ދެ އަހަރު ކުރިން މަޖީދީ މަހުގައި ގޮއްވާލި ބޮމުގެ ނުރައްކާތެރި ހަމަލާގެ ފުރިހަމަ ތަހުގީގެއް ރައީސް ސާލިހުގެ ސަރުކާރަށް ހިންގިފައިނުވާކަމަށެވެ.
ރައީސް ނަޝީދު އަވަހާރަކޮށްލަން މަޖީދީ މަގުގައި ބޮމެއް ގޮއްވާލީ މީގެ ދެއަހަރު ކުރިން މިރޭ (ރަމަޟާން 25 ވިލޭރޭ) އަދިވެސް އެ ނުރައްކާތެރި ހަމަލާގެ ފުރިހަމަ ތަޙުގީގެއް ނުހިންގި، ވަށައިގެންވާ ކަންކަން ހޯދުމުގައި ފަރުވާކުޑަ ކޮށްފައިވުމީ ރ.ސޯލިހުގެ ތެދުވެރިކަމާމެދު ސުވާލު އުފެދޭ ކަމެއް. pic.twitter.com/elCazxCgum
— Waddey (@waddey_) April 15, 2023
އޭނާ ވިދާޅުވީ، ރައީސް ސާލިހުގެ ސަރުކާރުންވަނީ އެކަމުގެ ވަށައިގެންވާ ކަންކަން ދެނެގަތުމުގައި ފަރުވާކުޑަގޮތަކަށް އަމަލުކޮށްފައިކަމަށެވެ. އެހެންކަމުން އެކަމުގެ ސަބަބުން ރައީސް ސާލިހުގެ ތެދުވެރިކަމާއިމެދު ސުވާލު އުފެއްދޭކަމަށް އޭނާ ވިދާޅުވިއެވެ.
ރައީސް ނަޝީދަށް ދިން ބޮމުގެ ހަމަލާގައި އެމަނިކުފާނަށް ބޮޑެތި ޒަހަމްތައް ލިބިވަޑައިގެންނެވިއެވެ. އޭޑީކޭ ހޮސްޕިޓަލުގައި ފަރުވާދިނުމަށްފަހު، އިތުރު ފަރުވާއަށް ބޭނުންވުމުގެ ސަބަބުން އެމަނިކުފާނު ބޭރަށް ފުރުވާލިއެވެ. މައްސަލައިގެ ތަހުގީގުގައި ގިނަ ދުވަސްތަކެއް ވެފައިވާނަމަވެސް، އެކަށީގެންވާ މިންވަރަކަށް މައްސަލަ ބަލައި އެކަމުގެ ފަހަތުގައިވާ ކަންކަން ސަރުކާރުން ހާމަކޮށްފައިނުވެއެވެ.
