އެމްއެންޕީއިން އޭނާ އާއި ދެކޮޅަށް މަސައްކަތްތަކެއް ކުރަމުންދާކަމަށް ބުނެ ޖޭޕީގެ ލީޑަރު ގާސިމް އިބްރާހިމްއަށް ލިބިވަޑައިގެންފައިވަނީ ދޮގު މައުލޫމާތުތަކެއްކަމަށް އެ ޕާޓީގެ ލީޑަރު ދަނގެތި ދާއިރާގެ މެމްބަރު ރިޓަޔާޑް ކާނަލް މުހައްމަދު ނާޒިމް ވިދާޅުވެއްޖެއެވެ.
ގާސިމްއަށް އެމްއެންޕީއާއި ގުޅޭ ގޮތުން މައުލޫމާތުތަކެއް ރައްޓެއްސަކު ހިއްސާކޮށްފައިވާކަމަށް އޭނާ ބުނާ ވީޑިއޯއެއް ހިއްސާކުރައްވާ، ނާޒިމްވަނީ ގާސިމްއަށް ރައްދު ދެއްވާފައެވެ. ނާޒިމް ވިދާޅުވީ، ގާސިމްއަށް ލިބިވަޑައިގެންފައިވަނީ ދޮގު މައުލޫމާތުތަކެއްކަމަށެވެ. އޭނާ ވިދާޅުވީ، ސައްހަ ނޫން މައުލޫމާތު ގާސިމްއަށް ބަޔަކު މީހުން ދިނުމަކީ، އޭނާއަށް އެ ފަރާތްތަކުން ދީފައިވާ ބޮޑު ގެއްލުމެއްކަމަށެވެ.
ނާޒިމް ވިދާޅުވީ، އޭނާ އަދި އޭނާއަށް ހެޔޮ އެދޭ ފަރާތަކުންވެސް ގާސިމް އަދި އެހެނިހެން ދިވެހި ރައްޔިތަކަށްވެސް ގެއްލުމެއް އަދި ނިކަމެތިކަމެއް ނުދޭނެކަމަށެވެ. ނާޒިމް ވިދާޅުވީ، ގާސިމް އަދި އެހެން އެއްވެސް މީހަކަށްވެސް ގެއްލުމެއް ދިނުމުގެ ވާހަކަވެސް އޭނާ އަދި ހެޔޮ އެދޭ ފަރާތްތަކުންވެސް ނުދައްކާނެކަމަށެވެ. ނާޒިމް ވިދާޅުވީ، އޭނާ ގާސިމްއަށް އިހުތިރާމް ކުރައްވާކަމަށެވެ. އަދި މަސައްކަތްކުރަމުންދަނީ ރައްޔިތުންގެ ހައްގުގައި އިހުލާސްތެރި މަސައްކަތްތަކެއް ގައުމަށް ކޮށްދެއްވުމަށް އަމާޒުކުރައްވާކަމަށްވެސް ނާޒިމް ވިދާޅުވިއެވެ.
