އަބަދު ވެރިކަން ބަދަލުކުރަން މަސައްކަތްކުރުމުގެ އާދަ ދޫކޮށްލާ، ވެރިކަން ދަމަހައްޓާ ވައުދުތައް ފުއްދަން މަސައްކަތްކުރުމަށް ގުޅިފައިވާ ސިޔާސީ ޕާޓީތަކުގެ ކެނޑިޑޭޓު، ރައީސުލްޖުމްހުރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.
2023 ވަނަ އަހަރުގެ ރިޔާސީ އިންތިހާބަށް ކުރާ ކެމްޕެއިންގައި ހއ މާރަންދޫއަށް ވަޑައިގެން ދެއްކެވި ވާހަކަފުޅުގައި ރައީސް ސާލިހު ވިދާޅުވީ އުއްމީދީ މަންޒަރު ފެންނަކަމަށެވެ. ރައީސް ސާލިހު ވިދާޅުވީ 2008 ވަނަ އަހަރުގެ ރިޔާސީ އިންތހާާބުގައި މާާރަންދޫއިން އެމްޑީޕީއަށް ލިބުނީ 17 ވޯޓުކަމަށާއި، ނަމަވެސް 2018 ވަނަ އަަހަރުގެ ރިޔާސީ އިންތިހާބުގައި 58 އިންސައްތަ ލިބުންކަމަށެވެ. އަދި ރައްޔިތުންގެ ވިސްނުން ބަދަލުވީ ވާ ވައުދުތައް ފުއްދައިދޭތީ އާއި، އަދި އެ ވައުދުތައްފުއްދައިދޭނެކަމުގެ އިހުސާސް ކުރެވޭތީީކަމަށް އެމަނިކުފާނު ވިދާޅުވިއެވެ.
ކުރީ ސަރުކާރުތަކުން މާާރަންދޫއަށް ކަންކަން ކޮށްދޭކަމުގެ އިހުސާސްކޮށްދިނުމަށް އިންތިހާބު ކައިރިވީމައި، ރައްޔިތުންނަށް މަންޒަރުތައް ދެއްކުމަށް މަސައްކަތް ކުރިކަމަށް ރައީސް ވިދާޅުވިއެވެ. އަދި އޭރު ވާދަވެރިން ވައުދުވީ ޕްލޭނެއް ނެތި، ވޯޓު ހޯދުމަށް ވާ ވައުދެއްގެ ގޮތުގައިކަމަށާއި، ނަމަވެސް މި ސަރުކާރުން ވައުދުވަނީ ޕްލޭނެއް އޮވެގެންކަމުގެ ހެކި މާރަންދޫއިން ފެންނަކަމަށް ރައީސް ވިދާޅުވިއެވެ.
ވެރިކަމަށް އައުމަށްފަހުގައި ދެން ކުރަން ޖެހޭނެކަމަކީ، އަޅުގަނޑު ގަބޫލުކުރާ ގޮތުގައި ވެރިކަން ދެމެހެއްޓުން. އެއީ ވެފައި ހުރި ވައުތައް ފުއްދަން ބޭނުންޥާތީ، އެމްޑީޕީގެ ދާއިމީ ސިޔާސަތެއް ނޫން ވެރިކަންތައް ބަދަލުކުރުމަކީ. ވެރިކަމުގައި ތިބެންވެސް ދަސްކުރަންޖެހޭނެ. ރައްޔިތުންނަށް ހިދުމަތް ކުރެވޭނީ އެކަން ކޮށްގެން.
ރައީސް ވިދާޅުވިއެވެ.
މީގެ އިތުުރުން ވެރިކަމުގައި ތިބެ، ވެރިކަން ބަދަލުކުރުމުގެ ވިސްނުންވެސް އެބަ އޮތްކަމަށާއި، ނަމަވެސް ވެރިކަަމަށް އައުމުން ކުރަން ޖެހޭނީ ވައުދު ފުއްދުމުގެ މަސައްކަތްކަމަށް ރައީސް ވިދާޅުވިއެވެ. އަދި ވެރިކަން ބަދަލުކުރުމަކީ އެމްޑީޕީގެ ދާއިމީ ސިޔާސަތެއް ނޫންކަމަށާއި، ވެރިކަމުގައި ތިބެން ދަސްކުރަން ޖެހޭކަމަށްވެސް ރައީސް ވިދާޅުވިއެވެ.
2018 ވަނަ އަހަރުގެ ރިޔާސީ އިންތިހާާބުގައި ރައްޔިތުން އިންތިހާބުކުރީ ކޯލިޝަން ވެރިކަމެއްކަމަށާއި، އަދި އެ ކޯލިޝަން ދަމަހައްޓަވައިފިންކަމަށް ފާހަގަކޮށް ރައީސް ވިދާޅުވީ ނަމަވެސް ބައެއް ކޯލިޝަަން ޕާޓުނަރުން މިހާރު ވަނީ ވަކިވެފައިކަމަށެވެ. ނަމަވެސް އެއީ މައްސަލައެއް ނޫންކަމަށާއި، މި ސަރުކާރުން ކޮށްދިން ކަންކަން ގަބޫލުކޮށް ކޯލިޝަން ދެމެހެއްޓުމަށް އަދާލަތު ޕާޓީއިންނާއި، އެމްޑީއޭއިން ނިންމާފައިވާކަމަށް ވިދާޅުވެ، ރައީސް ތަކުރާރުކުރެއްވީ މިއީ އެންމެ ބޮޑު ކޯލިޝަންކަމަށެވެ.
ދެވަނަ ދައުރެއް ލިބިއްޖެނަމަ މާރަންދޫއަށް ކޮށްދޭނެ ކަންކަން ރައީސް ވިދާޅުވެފައިވާއިރު ލެބޯޓްރީއެއް ގާއިމްކުރާނެކަމަށާއި، ކައުންސިލްތަކުގެ އިދާރާތައް ހުރީ ވަރަށް ހާލަތު ދަށްކޮށްކަމަށް ވިދާޅުވެ، ހާލަތު ބެލުމަށް ލޯކަލް ގަވަރމެންޓް އޮތޯރިޓީއިން (އެލްޖީއޭ) އިން ދިރާސާއެއް ހަދާަފައިވާކަމަށައި، އަދި އެ ތަރުތީބުން އިމާރާތްތަކުގެ މަސައްކަތްތައް ކުރާނެކަމަށް ރައީސް ވިދާޅުވިއެވެ. އަދި ފުލުހުންގެ ހިދުމަތްް ލިބޭނެ ގޮތް ކުރިއަށް ހުރި ދުވަސްތަކުގެ ތެރޭގައި ހަމަޖައްސައިދޭނެކަމަށާއި، އަދި ރައްޔިތުންނަށް ބޭނުންވާ އޭޓީއޭމްގެ ހިދުމަތްވެސް ފޯރުކޮށްދެއްވާނެކަމަށް ރައީސް ވިދާޅުވިއެވެ.
އަބަދު ސަރުކާރު ބަދަލުކުރަން މަސައްކަތްނުކޮށް، މަސައްކަތް ކުރަންވީ ސަރުކާރު ދެމެހައްޓުމަށްކަމަށާއި، މަޝްރުއުތައް ނުހުއްޓި ހިންގުމަށް އެމްޑީޕީއަށް ދެވަނަ ދައުރެއް ފަހިކޮށްދިނުމަށް އެދިވަޑައިގެންނެވިއެވެ.
