އެ ބުނާ އިގްތިސާދީ ބޮޑު ބަދަލު ގެނެސް، އިގްތިސާދު ދެގުނަކުރެވޭނެ ފޯމިއުލާ އޮތީ އެމްޑީޕީގެ މެނިފެސްޓޯގައި!

• ދިވެހިރާއްޖެ ފަޚުރުވެރިވާނެފަދަ ދުނިޔޭގެ ފެންވަރުގެ ދިވެހި ހޮސްޕިޓެލިޓީ މެނޭޖްމަންޓް ބްރޭންޑްތަކެއް އުފެއްދުމަށް ބޭނުންވާ ފަންނީ އަދި މާލީ އެހީތެރިކަން ފޯރުކޮށްދިނުން.

• ފަތުރުވެރިކަމުގެ ސިނާއަތުގައި ދިވެހިންގެ މިލްކުވެރިކަމުގެ ހިއްސާ އިތުރުކުރުމަށް އިންވެސްޓްމަންޓް ފަންޑެއް ތައާރަފްކޮށް، ދިވެހި ވިޔަފާރިތަކަށް ބޭރުގެ ބޮޑެތި ވިޔަފާރިތަކާ ފައިހަމަކުރުމަށް އިންވެސްޓްކުރުމަށް ބޭނުންވާ ކެޕިޓަލް ފޯރުކޮށްދިނުން. މީގެ އިތުރުން ލިވްއަބޯޑް އަދި ގެސްޓްހައުސް ވިޔަފާރި ކުރިއެރުވުމަށް މި ފަންޑުން އިންވެސްޓްކުރުން.

• ރާއްޖޭގެ އުތުރާއި ދެކުނުގައި އިންޓަރނޭޝަނަލް ފްލައިޓް ދެމެހެއްޓެނިވި ގޮތެއްގައި އޮޕަރޭޓްކުރުމަށް ބައިނަލްއަގްވާމީ އެއަރޕޯޓުތައް ހިމެނޭ ސަރަހައްދުތަކުގައި ސަރުކާރު މެދުވެރިވެގެން ބެޑް ކެޕޭސިޓީ އިތުރުކުރުމަށް ބޭނުންވާ އިންވެސްޓްމަންޓްތަކަށް މަގުފަހިކޮށްދިނުން.

• ރާއްޖޭގެ އުތުރާއި ދެކުނަކީ ވަކި ބްރޭންޑެއްގެ (ޑެސްޓިނޭޝަން ބްރޭންޑިންގ) ދަށުން މާކެޓް ކުރެވޭ ވަކި މަންޒިލްތަކެއް ކަމުގައި ހަދާނެ. މިއާއެކު، ފަތުރުވެރިކަމުގެ އާ ޕްރޮޑަކްޓްތައް ތަޢާރަފްކޮށް އާ މާކެޓްތަކުން ފަތުރުވެރިން ގެނައުމަށް އިސްކަންދިނުން.

• ރަށުފަތުރުވެރިކަމުގައި ހަރަކާތްތެރިވާ ފަރާތްތަކާއި ރިސޯޓުތަކާއި ގުޅުވައި ކުދި ވިޔަފާރިތަކަށް އިތުރު ފުރުސަތު ހޯދައިދީ ރަށު އިގުތިސާދު ތަރައްގީކުރުމަށް މަގު ފަހިިކޮށްދިނުން

• ފަތުރުވެރިކަމުގެ ސިނާޢަތުގައި ދިވެހި މަސައްކަތްތެރިން އިސް ސަފަށް ގެންދިއުމަށް ބޭނުންވާ ހުނަރާއި ތަޢުލީމު ފޯރުކޮށްދީ އެފަދަ މަގާމުތަކަށް ގާބިލު ދިވެހި މުވައްޒަފުން ބިނާކުރާނެ. މިގޮތުން ދުނިޔޭގެ ނަން މަޝްހޫރު ހޮސްޕިޓެލިޓީ ސްކޫލެއްގެ ކެމްޕަސް ރާއްޖޭގައި ގާއިމުކުރުން.

• ދިވެހިރާއްޖޭގެ މުއްސަނދި ތަރިކައާއި ސަގާފަތާއި ދީން ދައްކުވައިދޭ އައު ފަތުރުވެރިކަމުގެ ޕްރޮޑަކްޓްސް ތަޢާރަފްކުރާނެ. މިގޮތުން ރާއްޖޭގެ ތާރީހާއި އެވޭލާ ދިރިއުޅުމާއި އާސާރުތައް ދައްކުވައިދޭ މަރުކަޒެއް ޒަމާނީ ވަސީލަތްތަކާ އެކު ބިނާކުރުން.

• ގްރޭޓަރ މާލެ ސަރަހައްދުގައި ދުނިޔޭގެ ފެންވަރުގެ ބޮޑެތި ކޮންފަރެންސްތައް ހޯސްޓް ކުރެވޭނެގޮތަށް، އެންޓަރޓައިންމަންޓް ކޮމްޕްލެކްސްއަކާއެކު ކޮންވެންޝަން އައިލެންޑެއް ތަރައްގީކުރުން.

• ފަތުރުވެރިކަމުގެ ސިނާއަތް ސިންދަފާތުކުރުމަށް، ދުނިޔޭގެ ބޮޑެތި ކްރޫސްލައިނަރތަކަށް ބޭނުންވާ ހިދުމަތްތައް ލިބޭނެ ގޮތަށް ރާއްޖޭގެ އުތުރާއި ދެކުނު އަދި މާލެ ސަރަހައްދުގައި ކްރޫސް ޓަރމިނަލްތަކާއި ހިދުމަތް ލިބޭ އެހެނިހެން ވަސީލަތް ގާއިމުކުރުން.

• މައިސް ޓޫރިޒަމް ފުޅާކުރުމަށް ރާއްޖޭގެ ވަކި ސަރަހައްދެއް ކަނޑައަޅައި ވަސީލަތްތައް ގާއިމުކުރުން.

• ފަތުރިވެރިކަމުގެ ރިޒޯޓުތަކާ ގާތުގައި އާއިލާއާއި އެކީ ދިރިއުޅެވޭނެ ބޯހިޔާވަހިކަމުގެ ސްކީމްތައް ތައާރަފްކޮށް ސްކޫލްތަކުން ޖާގަ ހޯދުން ފަދަ އިޖްތިމާއީ އަދި އިގްތިސާދީ ފުރުސަތުތައް ފަސޭހައިން ލިބޭނެ ގޮތް ހަމަޖެއްސުން. އަދި، މާލެ ސަރަހައްދާއި އިތުރު އަރބަން ސެންޓަރުތަކުން ފަތުރުވެރިކަމުގެ ސިނާއަތުގެ ޚިދުމަތްތެރިންނަށް އަމިއްލަ ކުރެވޭނެ ބޯހިޔާވަހިކަން ފޯރުކޮށްދިނުން.

• މަތީ ތައުލީމާއި ތަމްރީންގެ ޕްރޮގްރާމްތަކުގެ ތެރެއިން ފަތުރުވެރިކަމަށް ހާއްސަ ފުރުސަތުތައް ކަނޑައަޅައި، ރިޒޯޓުތަކުގެ މަތީ މަގާމުތަކުގެ %50 ދިވެހިންނަށް ހާއްސަކުރުމުގެ އަމާޒަށް ވާސިލުވުމަށް، 5 އަހަރު ތެރޭގައި 500 ދިވެހިންނަށް ފަތުރުވެރިކަމުގެ ދާއިރާގެ ލީޑަރޝިޕް ސްކޮލަރޝިޕްތައް ފޯރުކޮށްދިނުން.

އެއަށްފަހު ދެން އޮތީ ”ޑީޖިޓަލް އިންގިލާބު“ ގެނައުމެވެ. އެމްޑީޕިއިން ބުނެފައިވާ ގޮތުގައި އާޓިފިޝަމް އިންޓެލިޖެންސް އިން ބައްޓަންވާނެ މުސްތަގްބަލަކަށް ދިވެހިން ތައްޔާރުވެ ޑިޖިޓަލް ވަމުންދާ ދުނިޔެއާއި އެއްހަމައެއްގައި ދިވެހިން ފައިތިލަ ސާބިތުކޮށް އުފާވެރި އަމާން ރާއްޖެއަކަށް ވާސިލްވެވޭނީ ޓެކްނޮލޮޖީ ގެ ބޭނުންހިފައިގެން އެކުއެކީގައެވެ. ޑިޖިޓަލް ދާއިރާއަކީ އިގުތިސާދީ އުފެއްދުންތެރިކަމުގެ މައި ތަނބަކަށް ހަދާ، ޒަމާނީ ”ޑިޖިޓަލް ފަސްޓް“ އިގުތިސާދެއްގެ ގޮތުގައި ބައްޓަންކުރުމަކީ އެމްޑީޕީއާއި ގުޅިފައިވާ ޕާޓީތަކުގެ ސިޔާސަތެވެ. އިގުތިސާދުގައި ހަރަކާތްތެރިވާ ފަރުދުންނާއި ވިޔަފާރިތަކަށް ޒަމާނީ ވަސީލަތްތަކާއި ހިދުމަތްތަކުން ލިބޭ ފައިދާ އިތުރުކުރުމަށްވަނީ ހަމަޖެހިފައެވެ. މި ޑިޖިޓަލް ޒަމާނުގައި، އާންމު ދިރިއުޅުމުގެ ބޭނުންތަކަށް ފަހި ޓެކްނޮލޮޖީގެ ހައްލުތައް ލިބޭނެ ގޮތް ހޯދައިދިނުމަށް ވައުދުވެފައިވާއިރު، މިއާއެކު ޓެކޮނޮލޮޖީގެ ދާއިރާއަކީ އިގުތިސާދީ ސެކްޓަރއެއްގެ ގޮތުގައި ކަނޑައަޅައި، ޕްރައިވެޓް ސެކްޓަރ ކުރިއެރުވުމަށް ބޭނުންވާ ގާނޫނީ އޮނިގަނޑުތަކާއި، ވަސީލަތްތަކާއި، އިންފްރާސްޓްރަކްޗަރ ގާއިމުކޮށް، ބޭރުގެ ފަރާތްތަކުންވެސް މި ދާއިރާގައި އިންވެސްޓްކުރުމަށް މަގުފަހިކޮށްދިނުމަށް ވަނީ ހަމަޖެހިފައެވެ. އަދި، މި ދާއިރާއަށް ބޭނުންވާ އިންސާނީ ވަސީލަތްތައް ތަރައްގީކުރުމަށް ބޭނުންވާ ތައުލީމާއި ތަމްރީނުގެ ފުރުސަތުތައް އިތުރުކުރުކޮށް، ޓެކްނޮލޮޖީގެ ދާއިރާއަކީ އިގުތިސާދީ ގޮތުން މަންފާ ލިބޭ ދާއިރާއަކަށް ހެދުމަށް އެމްޑީޕީއިން ވަނީ ވައުދުވެފައެވެ.

ދިވެހިންގެ ލޭ ނާރުކަމަށް ބުނަމުން އަންނަ މަސްވެރިކަމުން ނަފާ ހޮދާ، އިގްތިސާދު ބާރުވެރިކުރުމަށްވެސް އެމްޑީޕީއިން ވަނީ ގިނަ ކަންތައްތަކެއް ރާވާފައެވެ. އެގޮތުން:

• ވެހި މަހުގެ ބާވަތްތަކަށް ބޭރުގެ ގައުމުތަކުން ނަގާ ޓެކްސް ކުޑަކުރުމަށް ކުރަމުންދާ މަސައްކަތުގެ ތެރެއިން އިނގިރޭސި ވިލާތާއި ޔޫރަޕިއަން ޔޫނިއަނުން ނަގާ ޓެކްސް ކުޑަކުރުން.

• ދުނިޔޭގެ މަލްޓި ބިލިއަން ޑޮލަރުގެ އިންޑަސްޓްރީއެއް ކަމަށްވާ މެރިކަލްޗަރ އަދި އެކުއަކަލްޗަރއަށް ޕްރައިވެޓް ސެކްޓަރ އިންވެސްޓްކުރުމުގެ އައު ފުރުސަތުތައް ހުޅުވައިދިނުން.

• މަސްއޮޑިފަހަރު ބަނުމަށާއި އިންޖީނު އެޅުމަށް ދޭ ލޯނު ސްކީމް އިތުރަށް ލުއިފަސޭހަކޮށް، ފުޅާކޮށް، މަސްވެރިންނަށް ހާއްސަކޮށް މައިކްރޮފައިނޭންސިންގ ފެސިލިޓީއެއް ތައާރަފްކުރުން. އަދި ބޭންކުތަކުންދޭ ލޯން ޕްރޮޑަކްޓްތައް މަސްވެރިންނަށް ފަސޭހައިން ލިބޭނެ އިންތިޒާމު ހަމަޖެއްސުން.

• ދިވެހި މަސްއޮޑި ފަހަރު ޒާމާނީ ފެންވަރަށް ގެނެސް، ބާނާ މަހުގެ ތާޒާކަން ހިފަހައްޓައި ގިނަ ދުވަހު ކަނޑުމަތީގައި އުޅެވޭނެ ވަސީލަތްތަކާއެކީ ފިފްތު-ޖެނެރޭޝަން މަސް ދޯނި ފަހަރު ބަނުމަށް ލޯން ސްކީމް ތައާރަފްކުރުން.

• ދިވެހި ޒުވާނުން މަސްވެރިކަމަށް ނެރުމަށްޓަކައި ސްކޫލުދައުރުން ފެށިގެން އަހުލުވެރިކޮށް، ކައުންސިލްތައް މެދުވެރިކޮށް ޕްރޮގްރާމްތައް ހިންގައި މަސްވެރިކަމަކީ ޝައުގުވެރިވާފަދަ ދާއިރާއަކަށް ހެދުން.

• ދިވެހި މަސްވެރިކަމުގެ ދެމެހެއްޓެނިވިކަން ރަމްޒުކޮށްދޭ ލޭބަލެއް ހަދާ، ބޭރުގެ ސަޕްލަޔަރުން ބަލައިގަންނަ ބްރޭންޑިންއެއް ތައާރަފްކޮށް، ކަސްޓަމްސް އިން ލިބޭ އާމްދަނީގެ އިންސައްތައެއް ކަނޑައަޅާ ދުނިޔޭގެ ފެންވަރުގައި މާކެޓް ކުރުމަށްޓަކައި އެކްސްޕޯޓް ޕްރޮމޯޝަން ބޯޑެއް ގާއިމުކުރުން.

• ގޭގައި މަސައްކަތްކުރާ ފަރާތްތަކުން ތައްޔާރުކުރާ މަހުގެ ބާވަތްތަކުން ލިބޭ މަންފާ އިތުރުކުރުމުގެ ގޮތުން ބިޒްނަސް ސެންޓަރ ކޯޕަރޭޝަން މެދުވެރިކޮށް މާކެޓް ކުރުމަށް ހާއްސަ ޕްރޮޑަކްޓް ލައިނެއް ތައާރަފްކުރުން.

• ދިވެހި މަސްވެރިންނަށް ޕްރޮފެޝަނަލް ޑައިވިންގް ތަމްރީން ދިނުމަށްޓަކައި މިހާރު ހިނގަމުންދާ ޕްރޮގްރާމްތައް ފުޅާކޮށް، މަސްވެރިން ހިލޭ ތަމްރީންކުރުމުގެ ފުރުސަތު ހުޅުވާލާ، މި މަސައްކަތުގައި ހަރަކާތްތެރިވާ ފަރާތްތަކުގެ ރައްކާތެރިކަން ކަށަވަރުކޮށްދިނުން.

• މަސްވެރިކަމާއި ފަތުރުވެރިކަމާ ގުޅުވާޅައި ގިނަ ވަޒީފާއާއި ވިޔަފާރީގެ ފުރުސަތު ހޯދައިދިނުމަށްޓަކައި މަސްވެރިކަން ”އެޑްވެންޗަރ ސްޕޯޓް“ އެއްގެ ގޮތުގައި ޕްރޮމޯޓްކުރުން.

• ރާއްޖޭގެ މަސްވެރިން ބާނާ މަސް ގަނެ، ރައްކާކޮށް، ޕްރޮސެސްކުރެވޭނެ ކެޕޭސިޓީ ރާއްޖޭގެ އެކި ކަންކޮޅުތަކުގައި އިތުރުކުރުން.

• މުޅި ރާއްޖޭގައި މަސްވެރިންނަށް ފަސޭހައިން އައިސް ލިބުމުގެ ނިޒާމު ފުޅާކުރުން.

• މަސްވެރިންނަށް ދާއިރާގެ ތެރެއިން ދިމާވާ ހާދިސާތަކުން ލިބޭ ގެއްލުންތަކުންނާއި ސިއްހީ ގޮތުން ދިމާވެދާނެ ކަންކަމުން އަރައިގަންނަން އެހީވެދޭނެ ހާއްސަ އިންޝުއަރެންސެއް ތައާރަފްކުރުން.

މީގެ އިތުރުން ދުނިޔެއަށް ކުރިމަތިވަމުން އަންނަ ކާރިސާތަކާއި ޖިއޯޕޮލިޓިކަލް ބަދަލުތަކުގެ ސަބަބުން، ދުނިޔޭގެ ދަނޑުވެރިކަމާއި ކާބޯތަކެތީގެ ސެކިއުރިޓީ އަށް އަންނަ ބަދަލުތަކަށް ރިއާޔަތްކޮށް ސްޓްރެޓީޖިކް އިންޑަސްޓްރީއެއްގެ ގޮތުގައި ދަނޑުވެރިކަން އާލާކޮށް ތަރައްގީކޮށް ދިވެހި އާބާދީއަށް ފުދޭ މިންވަރަށް ސިއްހީގޮތުން ރައްކާތެރި ކާބޯތަކެތި އުފައްދާ ސިނާއަތެއްގެ ގޮތުގައި ދަނޑުވެރިކަން ފުޅާކުރުމަށް އެމްޑީޕީއިން ވަނީ ވައުދުވެފައެވެ. ދިވެހިރާއްޖޭގައި ހަރަކާތްތެރިވާ ދަނޑުވެރިންނަކީ ދުނިޔެ ބަލައިގަންނަ އެގްރިކަލްޗަރގެ ބެސްޓް ޕްރެކްޓިސްތަކަށް އަހުލުވެރިވެފައިވާ ބަޔަކަށް ހެދުމާ، ދަނޑުވެރިކަން ކުރުމުގައި ދިމާވާ ދަތިތައް ހައްލުކުރުމަށް ޒަމާނީ އިރިގޭޝަން، ކްލައިމެޓް ސްމާރޓް އިނޮވޭޓިވް ޕްރޮޑަކްޝަން އަދި އިއާދަކުރަނިވި ހަކަތައިގެ ބޭނުން ފުޅާ ދާއިރާއެއްގައި ކުރުމަށް މަގު ފަހިކޮށްދިނުންވެސް އެމްޑީޕީއާއި ގުޅިފައިވާ ޕާޓީތަކުގެ ސިޔާސަތުތަކުގެ ތެރޭގައި ހިމެނެއެވެ.

މިކަން ހާސިލްކުރުމަށް ޖުމްލަ 10 ކަމެއް ކުރުމަށް ރާވާފައިވާއިރު، ދިވެހިރާއްޖޭގެ ދަނޑު ގޮވާން ކުރާ ފަރާތްތަކަށް އެފަރާތްތަކުގެ ބިންތަކަށް މޫސުމީ ބަދަލުތަކާއި ގުޅިގެން ލިބޭ ގެއްލުންތަކުން ރައްކާތެރިކަން ފޯރުކޮށްދިނުމުގެ ގޮތުން ”ޤައުމީ ދަނޑުގޮވާން އިންޝުއަރެންސް ސްކީމް“ ތައާރަފް ކުރުމަށްވެސް އެމްޑީޕީއިން ވަނީ ވައުދުވެފައެވެ.

ދަތުރުފަތުރަކީ ގައުމެއް ތަރައްގީވެ ކުރިއަރައިގެން ދިއުމުގެ އެންމެ މުހިންމު އެއް އަސާސްކަމަށް އަބަދުވެސް ފާހަގަކުރެއެވެ. ލުއިފަސޭހަ ދަތުރުފަތުރުގެ ނިޒާމަކުން ހުރިހާ ރަށަކާއި އާބާދީތައް ގުޅާލުމަކީ އުފާވެރި ރާއްޖެއަކަށް ބޭނުންވާ ތަރައްޤީގެ ބިންގާކަމަށް އެމްޑީޕީއިން ބުނެފައިވާއިރު، ރަށު ބަންދުން ވީއްލި، ފަސިންޖަރުންނާއި މުދަލާއި ހިދުމަތް އެއް ރަށުން އަނެއް ރަށަށް، އެއް އަތުން އަނެއް އަތަށް ފޯރުކޮށްދޭނެ ހަރުދަނާ ނިޒާމެއް އޮތުމަކީ އުފާވެރި ދިރުއުޅުން ފުރިހަމަވުމުގެ އެންމެ މުހިންމު އެއް އަސާސްކަމަށް ވަނީ ފާހަގަކޮށްފައެވެ. ފުރިހަމަ ޓްރާންސްޕޯޓް އަދި ލޮޖިސްޓިކްސް އިންފްރާސްޓްރަކްޗަރއާއެކު، ރާއްޖޭގެ އެކި ކަންކޮޅުތަކުގައި އިގުތިސާދީ ފުރުސަތުތައް ފަހިކޮށްދީ، ދަތުރުފަތުރުގެ އައު ސިނާއަތެއް ގާއިމުކުކުރުމަށް ހަމަޖެހިފައިވާއިރު، އިގުތިސާދު ދެގުނަކުރުމުގެ ބިންގަލަކަށް މި ސިނާޢަތް ވެގެންދާނެކަމަށް އެމްޑީޕީއިން ގަބޫލުކުރެއެވެ.

މި ހުރިހާކަންކަމަކީ ފަސް އަހަރުގެ ދައުރަކަށް ބަހާލައިގެން ކުރުމަށް ގިނަ ކަންތައްތަކެއް ނަމަވެސް، އަދި ފުއްދިދާނެ ތޯ ސުވާލު އުފެދޭ ކަންތައްތަކެއް ނަމަވެސް، އެ ވިދާޅުވާ ފަދައިން އިގްތިސާދު ދެ ގުނަ ކުރުމަށް އެންމެ މުހިންމު ކަންކަމެވެ. ޕްލޭން އެއް އޮތުމަކީވެސް މުހިންމުކަމެއްކެމެވެ. އަދި ހަމައެއާއިއެކު އެކަށީގެންވާ ދިރާސާތައް ހައްދަވާ، މިސްރާބެއް ހޯދާ ރައްޔިތުންނާއި ހަމައަށް އެމްޑީޕީއިން ގެނެސްދިން ދިނުމަކީ ރައްޔިތުން ވިސްނާލުން މުހިންމުކަމެކެވެ. އެއްވެސް މިސްރާބެއް ނެތް ބަޔަކާއި ގައުމު ހަވާލުކުރުމުގެ ކުރިން ވިސްނުން މުހިންމެވެ. އެދޭ ބަދަލު ގެނައުމަށް 9 ސެޕްޓެމްބަރގައި ލިބޭ ފުރުސަތު ގެއްލުވާލައިފިނަމަ ދެން އޮތް 5 އަހަރުވެސް އެ ދަތި އުނދަގޫ ތަހައްމަލުކުރުމަށް ތިބޭނީ ހަމަ ރައްޔިތުންނެވެ.