އޮކްޓޯބަރ މަހުގެ 30 ވަނަ ދުވަހު ބާއްވާ ނިޒާމީ ވޯޓުގައި ތައީދު ކުރައްވަނީ ރިޔާސީ ނިޒާމަށްކަމަށް ރައީސުލްޖުމްހުރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.
ނިޒާމީ ވޯޓެއް ނެގުުމުގެ ގަރާރު މަޖިލީހށް ހުށައެޅުއްވީ ދަ ޑިމޮކްރެޓްސްގެ ފަރާތުންނެވެ. ދަ ޑިމޮކްރެޓްސްގެ ރިޔާސީ ކެންޑިޑޭޓު އިލްޔާސް ލަބީބް ހުށައެޅުއްވި މި ގަރާރުމަޖިލީހުން ބަލައިގަނެ، މުޅި މަޖިލީހުގެ ކޮމިޓީއިން ދިރާސާކޮށް ފާސްކޮށްފައިވާއިރު، އެމްޑީޕީއާއިއެކު ކޯލިޝަން ހެދުމަށް ހުށައެޅުއްވި ޝަރުތުތަކުގެ ތެރޭގައި ނިޒާމީ ވޯޓެްނެގުމަށް އެއްބަސްވުން ހިމެނެއެވެ.
މިއަދު އޮތް ރައީސް ސާލިހުގެ ކެމްޕެއިން ހަރަކާތް، މާލޭގެ ބައެއް ގެތަކަށް ދޮރުން ދޮރަށް ހިންގެވުމަށްފަހު ނޫސްވެރިންނާއި ބައްދަލުކުރެއްވުމުން، މިކަމާއި ގުޅިގެން“ސަންގު” ވަނީ ސުވާލުކޮށްފައެވެ. ހާލަތު ބަދަލުވެ، އިންތިހާބުގައި އެމަނިކުފާނަށް ނާކާމިޔާބީ ލިބިވަޑައިގެންފިނަމަވެސް ތާއީދުކުރައްވާނީ ރިޔާސީ ނިޒާމަށްތޯސުވާލުކޮށްފައެވެ.
ރައީސް ސާލިހު ވިދާޅުވީ ޑިމޮކްރެޓްސްއިން އެމަނިކުފާނުގެ ފަހަތަށް ނޭރި ނަމަވެސް ހުންނަވާނީ އެއް ސްޓޭންޑެއްގައިކަމަށެވެ. ރައީސް ވިދާޅުވީ ގަރާރު ފާސްކޮށް މިހާރު އެމަނިކުފާނަށް ފޮނުވާފައިވާ ކަމަށާއި އެ ނިންމުމައިގެން ކުރިއަށް ވަޑައިގަންނަވާނެކަމަށެވެ. އިލެކްޝަންސް ކޮމިޝަނުންވެސް މި ގަރާރު އެމަނިކުފާނަށް ފޮނުވާފައިވާކަމަށް ވިދާޅުވިއެވެ.
އަޅުގަނޑަކަށް ނެތް އެއަށް އިތުރު އިޝޫއެއް. އެކަމަކު ޕާޓީގެ ފަރާތުން އެކަމާ މެދު ގޮތެއް ނިންމާނީ އިންތިހާބަށް ފަހުގައި.
ރައީސް ވިދާޅުވިއެވެ.
މިކަމާއި ގުޅިގެން އެމަނިކުފާނުގެ އެއްވެސް މައްސަލައެއް ނެތްކަމަށާއި، ނަމަވެސް ޕާޓީއިން މިކަމާއި ގުޅިގެން ވަކި ގޮތެއް ނިންމާނީ އިންތިހާބަށް ފަހުކަމަށް ރައީސް ވިދާޅުވިއެވެ.
ނަމަވެސް ރިޔާސީ އިންތިހާބުގެ ފުރަތަމަ ބުރުގެ ނަތީޖާގެ ކުރިން އެމަނިކުފާމު ވިދާޅުވަމުން ގެންދެވީ ނިޒާމީ ވޯޓެއް ނެގުމަށް ވަގުތު ނެތްކަމަށެވެ.
