ޑރ މުއިއްޒު އެމެރިކާ ސަފީރާއި ބައްދަލުކުރައްވައިފި!

އެމެރިކާއިން ރާއްޖެއަށް ކަނޑައަޅާފައިވާ ސަފީރު ހިއުގޯ ޔޮން އިންތިހާބީ ރައީސް ޑރ މުހައްމަދު މުއިއްޒުއާއި ބައްދަލުކުރައްވައިފިއެވެ.

ޑރ މުއިއްޒުގެ އޮފީހުން ހާމަކޮށްފައިވާގޮތުން ސަފީރު ހިއުގޯ ޑރ މުއިއްޒުގެ އަރިހަށް ކުރެއްވީ އިހުތިރާމުގެ ޒިޔާރަތެކެވެ. އަދި މި ބައްދަލުވުމުގައި ޑރ މުއިއްޒުގެ ވެރިކަމނުގެ ދައުރުގައި އެމެރިކާ އާއި ރާއްޖޭގެ ގުޅުން މިހާރަށްވުރެވެސް ހަރަދުނާކުރެވިގެންދާނެކަމުގެ އުންމީދުކުރައްވާކަމަށް އޭނާ ހިއްސާކުރެއްވިކަމަށާއި ދެ ގައުމުގެ ގުޅުން ކުރިއަށް އޮތް އަހަރުތަކުގެ ތެރޭގައި އައު ހަރުފަތަކަށް ގެންދިއުމަށްވެސް އުންމީދުކުރައްވާކަމަށް އޭނާވަނީ ވިދާޅުވެފައެވެ.

ހިއުގޯ ވިދާޅުވީ، ރާއްޖޭގެ އެކި ދާއިރާތައް ތަރައްގީކުރުމަށްޓަކައި އެމެރިކާގެ ފަރާތުން ބޭނުންވާ އެހީތެރިކަން ލިބިގެންދާނެކަމުގެ ޔަގީންކަން ދެއްވާކަމަށެވެ. ޑރ މުއިއްޒުގެ އޮފީހުން މައުލޫމާތު ދީފައިވާގޮތުން ދިވެހިރާއްޖެ އެމެރިކާ ގުޅިގެން ކުރެވެން ހުރި މަސައްކަތްތަކަށާއި ރާއްޖެގެ ތަރައްގީއަށް ބޭނުންވާ ދާއިރާތަކުން އެ ގައުމުގެ ފުރިހަމަ އެއްބާރުލުން ލިބޭނެއެވެ. އަދި އަލަށް ގާއިމުކުރި އެމްބަސީގެ ސަބަބުންވެސް މަސައްކަތްތައް އިތުރަށް ފުޅާވެގެންދާނެކަމަށް އުންމީދުކުރައްވާކަމަށް ވިދާޅުވިއެވެ.