ހުުޅުމާލޭގެ 2 ވަނަ ފިޔަވީގެ ރުއްގަނޑު 3 ގެ ބީޗް ސަރަހައްދުގައި އަމިއްލަ ފަރާތްތަކުން ހަދާފައިވާ ހަޓްތަކާއި އެތާނގައި ބަހައްޓާފައިވާ ތަކެތި 15 ޖޫން 2024 ގެ ނިޔަލަށް ނަގަން އެޗްޑީސީއިން އަންގައިފިއެވެ.
އެޗްޑީސީއިން ބުނެފައިވާގޮތުން އެ ސަރަހައްދުގައި ޖަހާފައި ހުރި ހަޓްތައް ނަގަނީ ހުޅުމާލޭ 2 ވަނަ ފިޔަވަހީގެ ބީޗް ސަރަހައްދު ތަރައްގީކުރަން ރޭވިފައި ވާތީކަމަށެވެ. އެހެންކަމުން ހުޅުމާލޭގެ 2 ވަނަ ފިޔަވީގެ ރުއްގަނޑު 3 ގެ ބީޗް ސަރަހައްދުގައި އަމިއްލަ ފަރާތްތަކުން ހަދާފައިވާ ހަޓްތަކާއި އެތާނގައި ބަހައްޓާފައިވާ ތަކެތި 15 ޖޫން 2024 ގެ ނިޔަލަށް ނަގަން އަންގާކަމަށް ބުނެފައިވެއެވެ. އަދި ވަގުތީގޮތުން ހަދާފައިވާ ހަޓްތައް ބަދަލުކުރަނީ މި ސަރަހައްދު އިތުރަށް ތަރައްގީކުރުމަށް ކުރަންޖެހޭ މަސައްކަތްތައް ކުރުމަށް ކަމަށްވެސް ފާހަގަކޮށްފައިވެއެވެ.
ހަޓްތަކެއް ޖަހައިގެން އަމިއްލަ ގޮތުން ވިޔަފާރިކުރަމުންދާތީ، އެކަމާ ގުޅޭ ގޮތުން ގިނަ ބައެއްގެ ޝަކުވާ ލިބެމުންދާކަންވެސް އެ ކުންފުނިން ހިއްސާކޮށްފައިވާއިރު ރައްޔިތުންގެ ކަންބޮޑުވުންތަކަށް ރިއާޔަތްކޮށް ސަރަހައްދު އިތުރަށް ތަރައްގީކޮށް ވަސީލަތްތައް ގާއިމް ކުރުމަށް މަސައްކަތްކުރަމުންދާކަމަށާއި އެަކން ނިމުމުން ކަނޑައެޅޭ އުސޫލެއްގެ ދަށުން ވިޔަފާރިތަކަށް ހުޅުވާލާނެކަންވެސް ހާމަކޮށްފައިވެއެވެ.
ހުޅުމާލޭގެ ދެވަނަ ފިޔަވަހީގެ ބީޗް ސަރަހައްދުގައި އަމިއްލަ ފަރާތްތަކުން ހަޓްތައް ހަދާފައި ވަނީ އެކިއެކި ވިޔަފާރީގެ ބޭނުމަށް ނަމަވެސް ތަރައްގީކުރުމުގެ މަރުހަލާގައި އޮތް ސަރަހައްދެއްކަމަށްވުމުން ވަސީލަތްތައް ގާއިމުވެފައިނުވާކަމަށާއި އެކަމުގެ ސަބަބުން ދަތިތައް ހުރިކަމަށްވެސް ބުނެފައިވެއެވެ.
