ކަލާފާނު ސްކޫލުގައި އިތުރު އެހީ ބޭނުންވާ ކުއްޖަކަށް އަނިޔާކުރި ބިދޭސީ ޓީޗަރު މިއަދު ދޫކޮށްލައިފިކަމަށް ފުލުހުން މަޢުލޫމާތު ދީފިއެވެ.
ފުލުހުން ބުނާ ގޮތުގައި، މި ޓީޗަރު ހުކުރު ދުވަހު ކޯޓު އަމުރެއްގެ ދަށުން ހައްޔަރުކޮށް، ފުލުހުންގެ ބެލުމުގެ ދަށަށް ގެނެސް، ބަންދާމެދު ގޮތެއް ނިންމުމަށް ކޯޓަށް ހާޒިރުކުރެވުނެވެ. ނަމަވެސް، މިއަދު އޭނާ ވަނީ ދޫކޮށްލާފައެވެ.
މި މައްސަލައާ ގުޅޭގޮތުން އެޑިއުކޭޝަން މިނިސްޓަރ ޑރ. އިސްމާޢިލް ޝަފީޢު ވިދާޅުވީ، މިފަދަ މައްސަލަތަކަކީ ލުއިކޮށް ދޫކޮށްލެވޭނެ ކަންކަމެއް ނޫން ކަމަށެވެ.
މި ހާދިސާގައި، ޕްރައިމަރީއަށް ކިޔަވައިދެމުން އައި އެ ބިދޭސީ ޓީޗަރު ވަނީ ނުކުޅެދުންތެރިކަން ހުރި ކުއްޖަކު ގޮނޑިއަކަށް ބަނދެ އަނިޔާކޮށްފައެވެ. މި ޢަމަލުގެ ސަބަބުން އެ ޓީޗަރު ވަނީ ސަސްޕެންޑްވެސް ކުރެވިފައެވެ.
މި މައްސަލައިގައި އިތުރު ތަޙްޤީޤުތައް ކުރިއަށްދާ ކަމަށާއި، ކުއްޖާގެ ރައްކާތެރިކަމަށް އިސްކަންދީގެން މައްސަލަ ބަލަމުންދާ ކަމަށް ކަމާބެހޭ ފަރާތްތަކުން މަޢުލޫމާތު ދެއެވެ.
