މާޒީގެ ތަޖުރިބާތަކަށް ބަލާއިރު، ރަށްރަށުގެ ތަރައްޤީއަށްޓަކައި ސަރުކާރަށް ތާއީދު އޮންނަ ކައުންސިލްތަކެއް ހޮވަންޖެހޭ ކަމަށް ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ޑެޕިއުޓީ ޕީޖީ ލީޑަރު މުހައްމަދު އިސްމާއީލް ވިދާޅުވެއްޖެއެވެ.
އޭނާ މިހެން ވިދާޅުވީ ކޮންގްރެސް ޕާޓީގެ ހދ. އަތޮޅުގެ މާލެ ޖަގަހަ އިފްތިތާހު ކުރުމަށް ބޭއްވި ޙަފްލާގައި ވާހަކަފުޅު ދައްކަވަމުންނެވެ.
މުހައްމަދު އިސްމާއީލް ވިދާޅުވީ ސަރުކާރަށް ތާއީދު އޮތް ކައުންސިލްތަކެއް ހޮވުމަށްޓަކައި ހދ. އަތޮޅުގެ ރައްޔިތުންގެ ފުރިހަމަ އެއްބާރުލުން ބޭނުންވާ ކަމަށެވެ. އަދި ބޮޑުތިލަދުންމަތީ ރައްޔިތުންނަކީ ޤައުމީ މަސައްކަތުގައި ތާރީޚީ ގިނަ އަބްތާލުންތަކެއް އުފެދިފައިވާ، ހިތްވަރުގަދަ ބައެއްކަން ފާހަގަކުރައްވައި، ކުރިއަށް އޮތް ލޯކަލް ކައުންސިލް އިންތިޚާބުގައި އެ އަތޮޅުގެ ރައްޔިތުން ތަފާތު ދައްކާނެ ކަމަށް އުންމީދު ކުރައްވާ ކަމަށްވެސް އޭނާ ވިދާޅުވިއެވެ.
ސަރުކާރާ ގުޅިގެން މަސައްކަތްކުރާ ކައުންސިލްތަކެއްގެ މުހިންމުކަމާ ގުޅޭގޮތުން ވާހަކަދައްކަވަމުން މުހައްމަދު އިސްމާއީލް ވިދާޅުވީ، ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގެންނެވި ފަހުން ރާއްޖޭގެ އުތުރުން ދެކުނަށް ގިނަ މަޝްރޫޢުތަކެއް ފަށްޓަވާފައިވާ ކަމަށެވެ. މި މަޝްރޫޢުތައް ރައްޔިތުންނާ ގާތުން ހަލުވިކަމާއެކު ކުރިއަށް ގެންދިއުމަށްޓަކައި ސަރުކާރަށް އެއްބާރުލުންދޭ ކައުންސިލްތަކެއް ބޭނުންވާ ކަމަށާއި، އެ ނޫންނަމަ މަޝްރޫޢުތަކަށް ލަސްތަކެއް ކުރިމަތިވެދާނެ ކަމުގެ އިންޒާރު އޭނާ ދެއްވިއެވެ.
އިދިކޮޅު އެމްޑީޕީއަށް ފާޑުވިދާޅުވަމުން މުހައްމަދު އިސްމާއީލް ވިދާޅުވީ، އެ ޕާޓީއަށް ނިސްބަތްވާ ބައެއް ކައުންސިލްތަކުން ސަރުކާރުގެ މަޝްރޫޢުތަކަށް ބޭނުންވާ ބިން ދޫކުރުމަށް އިއުތިރާޒު ކުރަމުންދާ ކަމަށެވެ.
”މިފަދަ ސަބަބުތަކަށްޓަކައި ސަރުކާރާ އިދިކީލި ކައުންސިލްތަކެއް ހޮވައިފިނަމަ ރައީސް ޑރ. މުއިއްޒުގެ ސްޕީޑުގައި ދިވެހިރާއްޖެ ތަރައްޤީއެއް ނުކުރެވޭނެ،“ އޭނާ ވިދާޅުވިއެވެ.
މުހައްމަދު އިސްމާއީލްގެ ވާހަކަފުޅު ނިންމަވާލެއްވީ، ރައީސް މުއިއްޒުގެ ތަރައްޤީގެ ޕްލޭންތައް ތަންފީޒުކުރުމަށްޓަކައި ޕީއެންސީގެ ކެންޑިޑޭޓް މޫސާ އަލީ ޖަލީލް އަދި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ކެންޑިޑޭޓް އަލައިކާއަށް ވޯޓު ދެއްވުމަށް ހުރިހާ ރައްޔިތުންގެ ކިބައިން އެދިވަޑައިގަންނަވަމުންނެވެ.
