ދިވެހިރާއްޖޭގައި ޕޯސްޓްމޯޓަމް ހެދުމުގެ ގަވާއިދު ޖެޒެޓްކޮށް އެ ހިދުމަތް ރާއްޖޭގައި ފެށުމަށް ވާންޖެހޭ އެންމެ ފަހުގެ ތައްޔާރީތައް މި ސަރުކާރުން ވަމުންދާކަމަށް ހެލްތު މިނިސްޓަރ ގީލާ އަލީ ވިދާޅުވެއްޖެއެވެ.
މިނިސްޓަރ ގީލާ އަލީ މިހެން ވިދާޅުވީ ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) ކުރެއްވި ސުވާލަށް މިއަދުގެ މަޖިލީހުގެ ޖަލްސާގައި ޖަވާބުދެއްވަމުންނެވެ.
މެމްބަރު ކުޑޫ ވަނީ ދިވެހިރާއްޖޭގައި ޕޯސްޓްމޯޓަމް ހެދުމުގެ ގާނޫނީ ހުރަހެއް ނެތްއިރު ދައުލަތުން ބޮޑު ހަރަދެއްކޮށްގެން ރާއްޖެއިން ބޭރުން ޕޯސްޓްމޯޓަމް ހަދަނީ ކީއްވެތޯ އާއި އެކަން ރާއްޖޭގައި ނުކުރެވިގެން އުޅެނީ ކީއްވެތޯ ސުވާލުކޮށްފައެވެ.
ކުޑޫގެ ސުވާލަށް ޖަވާބު ދެއްވަމުން މިނިސްޓަރ ގީލާ ވިދާޅުވީ، ރާއްޖޭގައި ފުރަތަމަ ފަހަރަށް ފޮރެންސިކް ލެވެލް 2ގެ މެޑިކަލް ޔުނިޓެއް ގާއިމްކުރުމަށް މާލެ ސިޓީ ގްރޫޕް އޮފް ހޮސްޕިޓަލްސްއިން މިހާރު ފަށާފައިވާ ކަމަށެވެ. އަދި އެ ޔުނިޓު ގާއިމްވުމުން މުޅި ދިވެހިރާއްޖޭއަށް ބޭނުންވާ ފޮރެންސިކް ކްލިނިކަލް ހިދުމަތުގެ އިތުރުން މެޑިކަލް ލީގަލް ޕޯސްޓްމޯޓަމްގެ ހިދުމަތްތައް ހަރުދަނާ ނިޒާމެއްގެ ތެރެއިން ފޯރުކޮށްދެވިގެންދާނެ ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ މި މަޝްރޫއު ކުރިއަށް ގެންދިއުމަށް ހަމަޖެހިފައިވާ ބިންވެސް މިހާރު ކަނޑައެޅިފައިވާ ކަމަށެވެ.
ފޮރެންސިކް ތަހުލީލުތަކާއި ޕޯސްޓްމޯޓަމްގެ ހިދުމަތަކީ ރައްޔިތުންގެ އިހުސާސްތަކާއި ގުޅުންހުރި ވަރަށް ހައްސާސް ހިދުމަތެއް ކަމުން މިފަދަ ހިދުމަތެއް ގާއިމްކުރުމުގައި ދުރާލާ ތައްޔާރުވެ ދެމެހެއްޓެނިވި ގޮތެއްގައި ހަރުދަނާ މުހިންމު ފިޔަވަޅުތަކެއް އަޅަންޖެހޭކަން މިނިސްޓަރ ފާހަގަކުރެއްވިއެވެ. އެގޮތުން ސިއްހީ ހިދުމަތް ދިނުމުގެ ގާނޫނުގެ ދަށުން ފޮރެންސިކް ޕެތޮލޮޖީގެ ހިދުމަތް ދިނުމަށް އެކަމާ ގުޅޭ ގަވާއިދެއް އެކުލަވާލާފައި ނުވިނަމަވެސް މިހާރު ގަވައިދު ގެޒެޓްކުރުމުގެ މަރުހަލާގައިވާކަމަށް ގީލާ ވިދާޅުވިއެވެ. އެ ހިދުމަތް ފެށުމަށް ކަމާ ގުޅުންހުރި ފަރާތްތަކާ ފުޅާ ދާއިރާއެއްގައި މަޝްވަރާތަކެއް ކުރެވި ގަވައިދު ވަރަށް އަވަހަށް ގެޒެޓު ކުރެވޭނެކަމުގެ ފުރިހަމަ ޔަގީންކަން މިނިސްޓަރ ދެއްވިއެވެ.
”މި ހިދުމަތް ފެށުމަށް ކަމާ ގުޅުންހުރި ފަރާތްތަކާއި ފުޅާ ދާއިރާއެއްގައި މަޝްވަރާތަކެއް ކުރެވި ގަވައިދު ވަރަށް އަވަހަށް ގެޒެޓު ކުރެވޭނެ، ހިދުމަތް ފެށުމުގެ ތައްޔާރީތައްވެސް އެކުއެކީގައި ދަނީ ކުރެވެމުން،“ ގީލާ
އެގޮތުން ޝަރުއީ ގޮތުން ބަލަންޖެހޭ މަރުގެ މައްސަލަތަކާއި އަދި މަރުގެ ސަބަބު ދެނެގަތުމަށް ތަހުލީލު ކުރުމާއި ޖިންސީ އަދި ޖިސްމާނީ ގޯނާތައްވެސް ތަހުލީލު ކުރެވޭނެ ކަމަށް މިނިސްޓަރ ވިދާޅުވިއެވެ.
ދިވެހިރާޢްޖޭގައި ޕޯސްޓްޕޯޓަމްގެ ޚިދުމަތް ޤާއިމު ކުރުމަށް ޓަކައި އެފަދަ ހިދުމަތެއްގެ މައުލޫމާތު ގާނޫނެއްގައި އެކުލަވާލެވިގެން ދިޔައީ 2015 ވަނަ އަހަރުއެވެ. ނަމަވެސް މިނިސްޓަރު ގީލާ ވިދާޅުވީ، ކުރީގެ ސަރުކާރުތަކުން އެކަމުގައި އެއްވެސް މަސައްކަތެއް ކޮށްފައިނުވާކަމަށާއި އޭގެ ފަހުން ފާއިތުވެދިޔަ އަހަރުތަކުގެ ތެރޭގައި އެ ހިދުމަތް ރާއްޖޭގައި ގާއިމުކުރުމަށް ޓަކައި ކުރެވުނު ހުރިހާ މަސައްކަތެއް ކުރީ މި ސަރުކާރުން ކަމަށެވެ.
އެގޮތުން ފާއިތުވެ ދިޔަ 10 އަހަރުގެ ތަފާސްހިސާބުތަކަށް ބަލާއިރު ޕޯސްޓްމޯޓަމް ހެދުމަށް 23 ހަށިގަނޑު ރާއްޖެއިން ބޭރަށް ފުނުވާފައިވާކަން މިނިސްޓަރ ފާހަގަކުރެއްވިއެވެ. އަދި އެ ހިދުމަތް ރާއްޖެއިން ބޭރުން ހޯދުމުގެ ހަރަދަށް ބަލާއިރު އިންޑިއާގެ ޓްރިވެންޑްރަމްއަށް ހަށިގަނޑު ފޮނުވަން 55،000ރ (ފަންސާސް ފަސްހާސް ރުފިޔާ) ހޭދަވާކަމަށް މިނިސްޓަރ ފާހަގަކުރެއްވިއެވެ. އަދި ހިދުމަތް ހޯދުމުގައި އެއްވެސް ބުރޫއެއް މަޑުޖެހުމެއްނެތި މި ސަރުކާރުން ހިދުމަތް ފޯރުކޮށްދެމުންދާ ކަމަށް މިނިސްޓަރ ވިދާޅުވިއެވެ.
މިނިސްޓަރ ވަނީ ރައްޔިތުންގެ ސިއްހަތު ކަށަވަރުކުރުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން އެންމެ އިސްކަންދެއްވާ އެއް ސިޔާސަތުކަމަށް ވެސް މިއަދު ވިދާޅުވެފައެވެ.
