ރާއްޖޭގައި މިހާރު ފެތުރެމުން އަންނަ ހިމަބިހި (މީސަލްސް) އަކީ ކޮންޓްރޯލް ނުކުރެވިގެން އުޅޭ ވަރުގެ ބައްޔެއް ނޫން ކަމަށާއި އެ ބަލި އެކީގައި ކޮންޓްރޯލްކުރުމަށް އަޅަންޖެހޭ ފިޔަވަޅުތައް އަޅަމުން އަންނަ ކަމަށް ހެލްތު މިނިސްޓަރު ގީލާ އަލީ ވިދާޅުވެއްޖެއެވެ.
މިނިސްޓަރ ގީލާ މިފަދައިން ވިދާޅުވީ، މިއަދުގެ މަޖިލީހުގައި ހުޅުމާލެ ދެކުނު ދާއިރާގެ މެމްބަރު ޑރ. އަހުމަދު ޝަމްހީދު ކުރެއްވި ސުވާލަކަށް ޖަވާބުދެއްވަމުންނެވެ.
މިގޮތުން ޝަމްހީދު ވަނީ ރާއްޖޭގައި މިހާރު ހަލުވި ސްޕީޑެއްގައި ފެތުރެމުންދާ ހިމަބިހި ކޮންޓްރޯލް ކުރުމުގައި ސަރުކާރާއި ސިއްހީ ދާއިރާ ވަނީ ފެއިލްވެފައިތޯ މިނިސްޓަރާ ސުވާލުކުރައްވާފައެވެ.
އެ ސުވާލުގެ ޖަވާބުގައި މިނިސްޓަރ ގީލާ ވިދާޅުވީ، ހިމަބިހި ރާއްޖޭގައި ކޮންމެވެސް ވަރަކަށް ފެންނަމުންދާކަމަށާއި މިގޮތުން ރާއްޖޭގެ އާބާދީގެ ތެރެއިން ވަކިން ހާއްސަކޮށް މާލެ ސަރަހައްދުން ސަތޭކައެއްހާ މީހުން އެ ބައްޔަށް ޕޮޒިޓިވްވެފައިވާ ކަމަށެވެ. ގީލާ ވިދާޅުވީ ހިމަބިހި ކޮންޓްރޯލް ނުކުރެވޭ ހާލަތެއް ނެތް ކަމަށެވެ. އަދި އެ ބައްޔަކީ ކުރު މުއްދަތެއްގެ ތެރޭގައި ގައިން ގަޔަށް އަރާ ބައްޔަކަށް ވެފައި، ބަލި ފަސޭހަވާން ނަގާ މުއްދަތު ވެސް ކުރުވާނެ ކަމަށް ވިދާޅުވިއެވެ.
”މި ބައްޔަކީ އަޅުގަނޑުމެންނަށް އާދަޔާ ހިލާފަށް ފެތުރި ނޫނީ ކޮންޓްރޯލް ނުކުރެވިގެން އުޅޭ ބައްޔެއް ނޫން، އެހެން ނަމަވެސް ކޮންމެ ބައްޔަކީވެސް އެކަމާ ގުޅިގެން އަޅަންޖެހޭ ފިޔަވަޅުތައް އަޅައި އަދި އެ ބައްޔެއް ކޮންޓްރޯލުކުރުމަށް މަސައްކަތްތަކެއް ކުރެވެމުންދާނެ، މަޖިލީހަށް އަޅުގަނޑު ހާޒިރުވާނަން ބައްޔާ ގުޅުންހުރި އިތުރު މައުލޫމާތު ސާފުކޮށްދެއްވުމަށް،“ ގީލާ
އެޗްޕީއޭއިން އާއްމުކޮށްފައިވާ ތަފާސްހިސާބަށް ބަލާއިރު ވޭތުވެދިޔަ ހަފްތާގައި މާލެ ސަރަހަދުން ހިމަބިހީގެ އިތުރު 55 ކޭސް ވަނީ ފެނިފައެވެ. އެހެންކަމުން ޖުމްލަ ރިޕޯޓުކޮށްފައިވާ ކޭސްތަކުގެ އަަދު 121 އަށް އަރާފައިވާއިރު މިހާތަނަށް ވެކްސިން ދެވިފައިވާ މީހުންގެ އަދަދު ވަނީ 5495 އަށް އަރައިފައެވެ.
ހިމަބިއްސަކީ ބަލި ޖެހިފައިވާ އެކަކުގެ ސަބަބުން 18 މީހުންނަށް މި ބަލި ޖެހިދާނެފަދަ ބައްޔެއް ކަމަށް އެޗްޕީއޭއިން މީގެ ކުރިން ވަނީ ބުނެފައެވެ. އަދި މިހާރު ރާއްޖޭގެ ގިނަ މީހުންނަނީ ވެކްސިން ޖަހާފައިވާ މީހުން ކަމަށް ވުމުން ބަލި ޖެހިފައިވާ މީހުންނަށް މީގެ އަސަރު ކުޑަކަން ފާހަގަކޮށްފައިވެއެވެ.
ވެކްސިން ޖެހުމުގެ މަސައްކަތްތައްވެސް މިވަގުތު ކުރަމުންދާ ކަމަށާއި، އެގޮތުން ސިއްހީ ހިދުމަތްތެރިންނާއި ކުޑަކުދިންނަށް ވެކްސިން ދެމުންދާ ކަމަށް އެ އެޖެންސީން ބުނެފައިވެއެވެ. އެޗްޕީއޭއިން ބުނެފައިވަނީ ޔުނިސެފުން ކުރިން 8000 ވެކްސިން އަދި އިންޑިއާއިން 20،000 ވެކްސިން ހަދިޔާކުރި ކަމަށެވެ. އެހެންނަމަވެސް ޔުނިސެފަށް އިތުރު ޑޯސްތައް ގެނައުމަށް ރިކުއެސްޓުކޮށްފައިވާ ކަމަށް އެ އޭޖެންސީން ވަނީ ބުނެފައެވެ.
