އައްޑޫ ސިޓީގައި ހުރި ނޭޗަރ ޕާކުތައް މަރާމާތުކޮށް، އެ ތަންތަނުގެ ފެންވަރު މަތިކުރުމުގެ އަމަލީ މަސައްކަތް ރަސްމީކޮށް ފަށައިފިއެވެ.
މި މަޝްރޫޢުގެ ދަށުން އައްޑޫގެ ގުދުރަތީ ރީތިކަން ދެމެހެއްޓެނިވި ގޮތެއްގައި ހިމާޔަތްކުރުމަށް ގިނަ މަސައްކަތްތަކެއް ކުރެވިގެންދާނެއެވެ.
މި މަސައްކަތް ހަވާލުކުރި ކޮންޓްރެކްޓަރުން މިހާރު ވަނީ މަސައްކަތް ކުރިއަށްދާ ސަރަޙައްދުތަކަށް މޮބިލައިޒްވެ، އަމަލީ މަސައްކަތްތައް ފެށުމަށްޓަކައި ސައިޓުތައް ފާހަގަކޮށްފައެވެ. މިއީ އައްޑޫގެ ތިމާވެށި ރައްކާތެރިކޮށް، ފަތުރުވެރިންނާއި އާންމުންނަށް ހިތްފަސޭހަ މާހައުލެއް ގާއިމުކުރުމަށް ކުރިއަށްގެންދާ މުހިންމު މަޝްރޫޢެކެވެ.
މި މަޝްރޫޢަކީ ގުލޯބަލް ފަންޑު ފޯ ކޮރަލް ރީފްސް އާއި އޮސްޓްރޭލިއާ އެއިޑްގެ ގެ ދީލަތީ އެހީތެރިކަމާއެކު، ޔޫއެންޑީޕީ އިން ތަންފީޒުކުރާ މަސައްކަތެކެވެ. މި ޖަމްޢިއްޔާތަކުގެ އެހީތެރިކަމާއެކު ކުރިއަށްދާ މި މަސައްކަތުގެ މައިގަނޑު މަޤްޞަދަކީ އައްޑޫގެ ގުދުރަތީ ރީތިކަން ހިމާޔަތްކުރުމާއި، ޕާކުތަކަށް ޒިޔާރަތްކުރާ ފަރާތްތަކަށް ފަސޭހަ އިންތިޒާމުތަކެއް ހަމަޖައްސައިދިނުމެވެ.
މި މަސައްކަތުގެ ސަބަބުން އައްޑޫ ސިޓީގެ އިކޯ-ޓޫރިޒަމް އިތުރަށް ކުރިއަރައިގެންދާނެއެވެ.
