ރާއްޖޭގެ އިގްތިސާދީ ހާލަތު ދަށަށް ގޮސް، ޑޮލަރުގެ އަގު އިންތިހާއަށް އުފުލިފައި ވަނިކޮށް، ޑްރޯން ގަންނަން ސަރުކާރުން ކުރި ހޭދައިން އެކަނި ވެސް އެއް މަސް ދުވަހުގެ ތެޔޮ ރާއްޖޭގެ ބާޒާރަށް ހޯދޭނެކަމަށް އެސްޓީއޯގެ ކުރީގެ މެނޭޖިން ޑިރެކްޓަރ ހުސެއިން އަމްރު ވިދާޅުވެއްޖެ އެވެ.
”ސަންގު“ އާއި ”އަދަދު“ ނޫސް ގުޅިގެން ކުރިއަށްގެންދިޔަ ”ޑޮލަރު ސައްލާ“ ޕްރޮގްރާމްގައި ވާހަކަދައްކަވަމުން އަމްރު ވިދާޅުވީ، ރާއްޖެއަށް އެއް މަސްދުވަހު ބޭނުންވާ ތެޔޮ އިމްޕޯޓް ކުރަން ހޭދަވާ ވަރުގެ ބޮޑު ހޭދައެއް، އެއްވެސް ވިސްނުމެއް ނެތި ސަރުކާރުން ޑްރޯން ގަތުމަށް ކޮށްފައިވާ ކަމަށެވެ. އަމްރު ފާހަގަކުރެއްވި ގޮތުގައި ޑްރޯން ގަތުމަށް ގާތްގަނޑަކަށް 50 މިލިއަން ޑޮލަރު ހޭދަކޮށްފައިވާއިރު، މިއީ ގައުމުގެ ޒަރޫރީ ބޭނުންތަކަށް ހުރި ފައިސާއެވެ.
ދައުލަތުގެ މާލީ ރެޒާވް ދަށްވެ، ޒަރޫރީ ބޭނުންތަކަށް ބޭނުންވާ ތެލާއި، ކާޑާއި، ބޭސް ހޯދުމަށް ދަތިވެދާނެ ކަމުގެ ބިރު އޮތް ދަނޑިވަޅެއްގައި، މިފަދަ ބޮޑު ހޭދައެއް ޑްރޯން ގަންނަން ކުރުމަކީ އެއްވެސް ވިސްނުމެއް ނެތި ކުރި ކަމެއްގެ ގޮތުގައި އަމްރު ސިފަކުރެއްވިއެވެ.
އޭނާ ވިދާޅުވި ގޮތުގައި، އިގްތިސާދީ ގޮތުން ދައްޗެއް ކުރިމަތިވެދާނެ ކަމުގެ ބިރު އޮތް ނަމަ، އެންމެ ފުރަތަމަ އިސްކަންދޭން ޖެހޭނީ ރައްޔިތުންގެ އަސާސީ ބޭނުންތަކަށެވެ. ނަމަވެސް، މި ސަރުކާރުން ތެޔޮ ގަންނަން ހުރި ފައިސާ ޓަސްލާފައި ޑްރޯން ގަތުމަށް ހޭދަކޮށްލީ، ގައުމުގެ މާލީ ހާލަތަށް އެއްވެސް ބެލުމެއް ނެތިކަމަށް އަމްރު ވިދާޅުވިއެވެ.
ޑްރޯން ގަންނަން ދިޔަ ފައިސާއަކީ ރާއްޖެއަށް އެއް މަސްދުވަހު ތެޔޮ އިމްޕޯޓް ކުރަން ހޭދަވާ ވަރުގެ ބޮޑު އަދަދެއް. ގާތްގަނޑަކަށް 50 މިލިއަން ޑޮލަރު އެއްވެސް ހިޔާލެއް ފިކުރެއް ނެތި ހޭދަކޮށްލީ. މިއީ ތެޔޮ ގަންނަން ހުރި ފައިސާ
އަމްރު ވިދާޅުވީ، ރާއްޖޭގެ މާލީ ހާލަތު އިންތިހާއަށް ގޯސްވަމުންދާކަމުގެ އިންޒާރު ބައިނަލްއަގްވާމީ މާލީ އިދާރާތަކުން ދެމުންދާއިރު، ސަރުކާރުން ރައްޔިތުންނަށް ހަގީގަތް އޮޅުވާލަމުންދާ ކަމަށެވެ. ވެރިކަމާ ހަވާލުވުމަށްފަހު ރާއްޖޭގެ އިގްތިސާދު ރަނގަޅު ކަމަށާއި ބޭރުގެ އެހީތައް ލިބެމުންދާ ކަމަށް ރައީސް ޑރ. މުހައްމަދު މުއިއްޒާއި ވަޒީރުން ވިދާޅުވި ނަމަވެސް، އަމަލީ ގޮތުން ފެންނަނީ މުޅިން ތަފާތު މަންޒަރެއްކަމަށް އޭނާ ފާހަގަކުރެއްވިއެވެ.
ޑޮލަރުގެ އަގު ކޮންޓްރޯލުން ނެއްޓި، ބްލެކް މާކެޓުގައި އަގު އުފުލެމުންދާ މައްސަލައިގައި އަމްރު ވަނީ މަރުކަޒީ ބޭންކު (އެމްއެމްއޭ) ގެ ގަވަރުނަރު ރައްޔިތުންގެ މަޖިލީހަށް ހާޒިރުކޮށް ސުވާލުކުރަން ޖެހޭކަމަށް ވިދާޅުވެފައެވެ. އޭނާ ވިދާޅުވީ، ބީއެމްއެލްގެ ކައުންޓަރުން ރަސްމީ ރޭޓުގައި ޑޮލަރު ލިބެން ނެތުމުން، ވިޔަފާރިވެރިންނާއި އާންމުންނަށް 22 ރުފިޔާއަށްވުރެ ބޮޑު އަގުގައި ޑޮލަރު ގަންނަން މަޖުބޫރުވެފައިވާ ކަމަށެވެ.
މީގެއިތުރުން އަމްރު ވިދާޅުވީ މާލެއާއި ހުޅުމާލޭގައި ހުރި ހުސްބިންތަކުގައި ޓަވަރު އަޅައިގެން ބޯހިޔާވަހިކަން ފޯރުކޮށްދެވެން އޮތްއިރު، އެތައް ބިލިއަން ޑޮލަރެއް ހޭދަކޮށްގެން ”ރަސްމާލެ“ ފަދަ ބޮޑެތި މަޝްރޫއުތައް ފެށުމަކީ މިވަގުތަށް އެންމެ އެކަށީގެންވާ ކަމެއް ނޫން ކަމަށެވެ. އަދި 2025 އާއި 2026 ވަނަ އަހަރަކީ ރާއްޖެއިން ބޮޑެތި ލޯނުތައް ދައްކަންޖެހޭ ދަތި ދުވަސްވަރަކަށް ވާއިރު، ސިޔާސީ މަގާމުތަކަށް މީހުން އައްޔަނުކުރުމާއި އިސްރާފު ބޮޑު ހަރަދުތައް ހުއްޓާލަންޖެހޭކަމަށް ވެސް އޭނާ ވިދާޅުވިއެވެ.
