ގަވައިދާ ޚިލާފަށް އުޅެމުން ދިޔަ 107 ބިދޭސިއަކު، ދަނޑުވެރިކަމުގައި މަޝްހޫރު އއ. ތޮއްޑޫން އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.
އިމިގްރޭޝަނުން މިއަދު ބުނީ، ގަވައިދާ ޚިލާފަށް އުޅޭ ބިދޭސީންގެ މައްސަލަ ބޮޑުކަމަށް އާންމުންގެ ގިނަ ޝަކުވާ ލިބެމުން ދިއުމާ ގުޅިގެން ތޮއްޑުއަށް އަމާޒުކޮށް ޚާއްސަ އޮޕަރޭޝަނެއް ޓާސްކްފޯހުން ހިންގައިފައިވާ ކަމަށެވެ.
އެގޮތުން މިއަދު ހެނދުނު 6:00 އިން ފެށިގެން ހަވީރު 4:00 އަށް ހިންގި އެ އޮޕަރޭޝަނުގައި ޖުމުލަ 507 ބިދޭސިއަކު ބަލައި ފާސްކޮށް 107 މީހަކު އިމިގްރޭޝަންގެ ބެލުމުގެ ދަށަށް ގެންގޮސްފައިވާ ކަމަށް، އިމިގްރޭޝަނުން ވަނީ ބުނެފައެވެ.
ދަނޑުވެރިކަމުގެ އިތުރުން ގެސްޓްހައުސްގެ ވެސް ވިޔަފާރިކުރާ ތޮއްޑޫގެ ބައެއް ދަނޑުތަކުގައި ފެން ދިނުމާއި މޭވާ ކެނޑުމާއި އެ ތަކެތި މާލެ ފޮނުވުމަށް ދޯންޏާ ހިސާބަށް ގެންދިއުމުގައި ވެސް ބޮޑު ހިއްސާއެއް ބިދޭސީން އަދާކުރެއެވެ.
ރާއްޖޭގައި ގަވާއިދާ ޚިލާފަށް އުޅޭ ބިދޭސީންގެ މައްސަލަ ހައްލުކޮށް، ގަވާއިދުގެ ތެރެއިން ބިދޭސީންގެ ކަންކަން އިންތިޒާމުކުރުމަށް ކުރަމުންދާ މަސައްކަތް ކުރިއަށްގެންދަނީ އެކި ފިޔަވަހިތަކަށް ބަހާލައިގެންނެވެ.
ފުރަތަމަ މަރުހަލާގައި ހިމެނޭ ގަވާއިދުގެ ތެރެއަށް ވަނުމަށް ފުރުޞަތުދިނުމާއި، ބިދޭސީންގެ ބަޔޯމެޓްރިކްސް ނެގުމާއި ސިސްޓަމްތައް އަދާހަމަކުރުމުގެ މަސައްކަތް މުޅި ރާއްޖޭގައި ވަނީ ކުރިއަށް ގެންގޮސްފައެވެ.
މިހާރު ކުރިއަށް ގެންދަނީ މި މަޝްރޫޢުގެ ދަށުން ގަވާއިދާ ޚިލާފަށް އުޅެމުންދާ ބިދޭސީން އުޅޭތޯ ބެލުމަށް ކުރިއަށްގެންދާ މޮނީޓަރިންގ މަރުހަލާގެ މަސައްކަތެވެ. މިހާރު ރާއްޖޭގައި ތިބި ބިދޭސީންގެ ތެރެއިން ގަވާއިދާ ޚިލާފަށް އުޅެމުންދާ މީހަކު ފެނިއްޖެނަމަ އިތުރު ފުރުޞަތެއް ނެތި ޑީޕޯޓުކުރާނެކަމަށް ސަރުކާރުން ވަނީ ބުނެފައެވެ.
