ކުރީގެ ރައީސް އަބްދުﷲ ޔާމީން އަބްދުލްގައްޔޫމް އަންނަ ހުކުރު ދުވަހު އައްޑޫ ސިޓީއަށް ވަޑައިގަންނަވާ ގޮތަށް ހަމަޖެހިއްޖެއެވެ.
ޗެނަލް 13އަށް ދެއްވި އިންޓަވިއުއެއްގައި ރައީސް ޔާމީން ވިދާޅުވީ، އަންނަ ހުކުރު ދުވަހު އައްޑޫ ސިޓީއަށް ވަޑައިގަތުމަށް ހަމަޖެހިފައިވާ ކަމަށާއި އެ ދަތުރުފުޅުގައި އެމަނިކުފާނުގެ ސަޕޯޓަރުންނާ ބައްދަލުކުރައްވާނެ ކަމަށެވެ.
މީގެ ކުރިން، ރައީސް ޔާމީން ވަނީ ތިނަދޫ ސިޓީ އަދި ފުވައްމުލައް ސިޓީއަށް ވަޑައިގެން އެ ސިޓީތަކުގައި ތިބި ޕާޓީގެ މެމްބަރުންނާއި އެމަނިކުފާނުގެ ސަޕޯޓަރުންނާ ބައްދަލުކުރައްވައިފައެވެ.
އަންނަ ރިޔާސީ އިންތިހާބުގައި ވާދަކުރައްވާނެކަން އިއުލާނުކުރައްވާފައިވާ ރައީސް ޔާމީން ގެންދަވަނީ ކޮންމެ ހަފްތާއަކު ވެސް ޕީއެންއެފްގެ އޮފީހުގައި ޖަލްސާތައް ބާއްވައި ސަރުކާރަށް ފާޑުވިދާޅުވަމުންނެވެ.
މީގެ ކުރިން ޕީއެންއެފްއިން ވަނީ އާޓިފިޝަލް ބީޗުގައި ވެސް ”ފެހި ސިގްނަލް“ގެ ނަމުގައި އެ ޕާޓީގެ ޖަލްސާއެއް ބާއްވައިފައެވެ.
