ރާއްޖޭގައި ނުރައްކާތެރި ކެމިކަލް ވިއްކުމާއި ގުދަންކުރުމުގެ ހުއްދައަށް އެދުމަށް ދީފައިވާ މުއްދަތު ދިފާއީ އަދި ވަތަނީ ޚިދުމަތާއ ބެހޭ ވުޒާރާއިން އިތުރުކޮށްފިއެވެ.
ވިޔަފާރިވެރިންނަށް ކެމިކަލް ހޯދުމުގެ ހުއްދަ ފަސޭހަކޮށްދިނުމުގެ ގޮތުން 27 ސެޕްޓެމްބަރު 2026 އިން ފެށިގެން އެއް މަސްދުވަހުގެ އިތުރު މުއްދަތެއް ދޭން ނިންމާފައިވާކަމަށް އެ ވުޒާރާއިން ނެރުނު އިއުލާނުގައިއެވެ.
އެގޮތަށް ނިންމީ ނުރައްކާތެރި ކެމިކަލް ވިއްކުމުގެ ހުއްދަ ހޯދުމަށާއި ގުދަންތައް ”މަކުޑި“ ޕޯޓަލް މެދުވެރިކޮށް ރަޖިސްޓްރީކުރުމަށް ކުރިން ދިން ފުރުސަތު ހަމަވިއިރު، އެކަމަށް އެދި ހުށަހަޅާފައިވަނީ ވަރަށް މަދު ފަރާތަކުންކަމަށް ވާތީކަމަށް އެ ވުޒާރާގެ އިއުލާނުގައިވެއެވެ.
އަލަށް ދިން މި މުއްދަތުގެ ތެރޭގައި ރަޖިސްޓްރީ ނުކޮށް ކެމިކަލްގެ ވިޔަފާރި ހިންގާ ފަރާތްތަކާ މެދު ”ނުރައްކާތެރި ކެމިކަލާބެހޭ ގަވާއިދު“ގެ ދަށުން ހަރުކަށި ފިޔަވަޅު އަޅާނެ ކަމުގެ އިންޒާރު ވުޒާރާއިން ދީފައިވާއިރު މި މުއްދަތުގައި ރަޖިސްޓްރީ ނުކުރާ ފަރާތްތަކަށް ކުރިއަށް އޮތް ތަނުގައި ރާއްޖެއަށް ކެމިކަލް އެތެރެކުރުމުގެ ހުއްދަ އެއްގޮތަކަށްވެސް ނުދެވޭނެ ކަމަށް އިއުލާނުގައިވެއެވެ.
ކެމިކަލް އެތެރެކުރުމުގެ ހުއްދަ ދީ، އެތަކެތި ރައްކާކުރާ ގޮތް ރެގިއުލޭޓު ކުރުމަކީ ދިފާއީ ވުޒާރާގެ މަސްއޫލިއްޔަތަކަށް ވާއިރު ގާނޫނުގައި މަނާކަމަށް ކަނޑައަޅާފައިވާ ކެމިކަލް، ހުއްދަ ނެތި ގެންގުޅޭނަމަ އެއް މިލިއަން ރުފިޔާއާ ހަމައަށް ޖުރިމަނާ ކުރެވޭނެއެވެ.
