އަމީނީ މަގުގައި މަރާމަތުކުރި ސަރަހައްދު އަންނަ އާދިއްތަ ދުވަހު އާންމު ދަތުރުފަތުރުކުރުމަށް ހުޅުވާލާނެކަމަށް ބިނާރާއި ގެދޮރުވެރިކަމާ އުމްރާނީ ތަރައްގީއާ ބެހޭ ވުޒާރާއިން ބުނެފިއެވެ.
އަމީނީމަގު މަރާމަތުކުރުމުގެ މަސައްކަތް އެމްޓީސީސީއާ ހަވާލުކޮށްފައިވަނީ ޖޫން މަހުގެ 15 ވަނަ ދުވަހުއެވެ.
އެ ސަރަހައްދުތަކުގައި ކުރިން އަޅާފައިވާ ތާރުގަނޑު ނަގައި މަގުގެ އަޑީގައިވާ ޔުޓިލިޓީ ވިއުގަތައް އަލުން ތަރުތީބުކުރުމަށްފަހު، ތާރު އެޅުމުގެ ހުރިހާ މަސައްކަތެއް މިހާރު އެއްކޮށް ނިންމާލާފައިވާއިރު މިވަގުތު ކުރިއަށްދަނީ މަގުމަތީގެ ނިޝާންތައް ކުރެހުމާއި، މަގު ހުޅުވާލުމުގެ އެންމެ ފަހުގެ މަސައްކަތްތަކެވެ.
އަމީނީ މަގުގައި ހަލާކުވެފައިވާ ސަރަހައްދު މަރާމާތުކުރުމުގެ މަސައްކަތް ދެ ސެގްމަންޓަކަށް ބަހާލައިގެން ކުރިއަށް ގެންދާއިރު އޭގެ ތެރެއިން އާންމު ދަތުރުފަތުރުކުރުމަށް ހުޅުވާލުމަށް ތައްޔާރުވެފައިވަނީ ސެގްމަންޓް 1ގެ ގޮތުގައި ހިމެނޭ، ދިވެހިރާއްޖޭގެ އަޑުން ފަށައިގެން ދަރުމަވަންތަ ހޮސްޕިޓަލާ ހަމައަށް އޮތް ސަރަހައްދެވެ.
ސެގްމަންޓް 2ގެ ގޮތުގައި، ދިވެހިރާއްޖޭގެ އަޑު ކުރިމަތިން އޮންނަ ހަތަރުއަނގޮޅި ކަންމަތީގައި ތާރު އެޅުމުގެ މަސައްކަތްވެސް މިހާރު ވަނީ ނިންމާފައެވެ. އެ ސަރަޙައްދުތަކުގައި ކުރިން އަޅާފައިވާ ތާރުގަނޑު ނަގާ އަދި މަގުގެ އަޑީގެ ނެޓްވޯކްތައްވެސް އަލުން ވަނީ ތަރުތީބުކޮށްފައެވެ.
އެ ސަރަހައްދުތަކުގެ މަސައްކަތް ނިމުމާއެކު، އެމްޓީސީސީން އަންނަނީ ތިންވަނަ ސެގްމަންޓުގެ މަސައްކަތް ފެށުމަށް ތައްޔާރުވަމުންނެވެ. ތިންވަނަ ސެގްމަންޓުގައި ހިމެނެނީ އިއްޒުއްދީން މަގުން ފެށިގެން ކޯރުކެނޑި ހިނގުމާ ހަމައަށް އޮތް ސަރަހައްދެވެ.
އަމީނީ މަގު މަރާމާތުކުރުމުގެ މަސައްކަތް މޯލްޑިވްސް ކޮންޓްރެކްޓިންގ ކޮންޕެނީ (އެމްޓީސީސީ) އިން ފަށާފައިވަނީ މި މަހުގެ 12 ވަނަ ދުވަހުއެވެ. ސަރުކާރުން އެ މަސައްކަތް އެމްޓީސީސީއާ ހަވާލުކޮށްފައިވަނީ މިދިޔަ ސަރުކާރުން ތާރުއަޅައިގެން ތަރައްޤީކުރި އަމީނީމަގުގެ ބައެއް ސަރަހައްދުތަކުން ތާރުގަނޑު އުފުލި، މަގު ވަރަށް ބޮޑަށް ހަލާކުވެފައިވާތީއެވެ. ހާއްސަކޮށް އަމީނީމަގުގެ ހުޅަނގު ފަރާތުގެ ބޮޑު ސަރަހައްދަކަށް ވަނީ ބޮޑެތި ގެއްލުންތަކެއް ލިބިފައެވެ.
