ނުކުޅެދުންތެރިކަން ހުންނަ ފަރާތްތަކުގެ ހުނަރުތައް ތަރައްގީކޮށް ކުރިއެރުވުމަށް ޕްރޮގްރާމްތައް ހިންގުމަށް ތަރައްގީކުރާ ”ކޮމިއުނިޓީ އެމްޕަވަމަންޓް ހަބް“ އަންނަ މަހު ހުޅުވުމަށް ތައްޔާރުވަމުންދާކަމަށް ސިއްހަތާއި އާއިލާއާއި އިޖުތިމާއީ އެހީއާ ބެހޭ ވަޒީރު ގީލާ އަލީ ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ވަޒީރު ގީލާ އަލީ ވިދާޅުވީ، ކޮމިއުނިޓީ އެމްޕަވަމަންޓް ހަބަކީ ޒަކާތު ފަންޑުން ހަރަދުކޮށް، އިޖުތިމާއީ ތަރައްގީއާއި ބެހޭ ވުޒާރާއާއި އެފްޑީސީ ގުޅިގެން ހަދަމުންދާ މަރުކަޒެއް ކަމަށެވެ. އަދި ރާއްޖޭގައި ނުކުޅެދުންތެރިކަން ހުންނަ ފަރާތްތަކަށް ދެމުންދާ ހިދުމަތްތައް ހަރުދަނާކޮށް، އެ ފަރާތްތަކަށް މުޖްތަމައުގައި ފަސޭހަކަމާއެކު އުޅުމަށް އިސްކަންދީގެން ސަރުކާރުން ގިނަ މަސައްކަތްތަކެއް ކުރަމުންދާކަމަށް ވަޒީރު ވިދާޅުވިއެވެ.
”މި މަރުކަޒު އޮކްޓޯބަރު މަހު ހުޅުވުމަށް ދަނީ ތައްޔާރުވަމުން. މި މަރުކަޒުގެ ބޭނުމަކީ ނުކުޅެދުންތެރިކަން ހުންނަ ފަރާތްތަކަށް ބޭނުންވާ ހުނަރާއި އިލްމު ފަހިކޮށްދިނުން. އަދި މިހާރުވެސް ކުރިއަށް އެބަގެންދެވޭ ސައިން ލޭންގުއޭޖް ޕްރޮގްރާމެއް. ވޮކެބްލަރީއެއް ތައާރަފްކުރުމުގެ މަސައްކަތް އެފަދަ ވޯކްޝޮޕެއްގެ މަސައްކަތް އެބަދޭ.“ ގީލާ ވިދާޅުވިއެވެ.
ގީލާ ވިދާޅުވީ، މި ސަރުކާރުން 416 ނުކުޅެދުންތެރިކަން ހުންނަ ފަރާތްތަކަށް ވަޒީފާގެ ފުރުސަތު ފަހިކޮށްދީފައިވާ ކަމަށެވެ. އަދި ނުކުޅެދުންތެރިކަން ހުންނަ ކުދިންނަށް ހާއްސަކޮށްގެން ތަރައްގީކުރާ އެމްޕަވަރމަންޓު ހަބު ނުވަތަ މަރުކަޒު އޮކްޓޯބަރު މަހު ހުޅުވުމަށް މަސައްކަތް ކުރެވެމުންދާކަމަށް ގީލާ ވިދާޅުވިއެވެ.
”ނުކުޅެދުންތެރިކަން ހުންނަ ފަރާތްތަކުގެ އެސެސްމެންޓް ހެދި އެފަރާތްތަކަށް ވަޒީފާގެ ފުރުސަތު ހޯދައިދިނުމުގެ ގޮތުން މަސައްކަތްތަކެއް ކުރެވި މިހާތަނަށް 416 ފަރާތަކަށް ވަނީ ވަޒީފާގެ ފުރުސަތު ފަހިކޮށްދީފައި. އަދި ހަމަ އެހެންމެ އެމްޕަވަމަންޓް ހަބް ނުވަތަ މަރުކަޒެއް އަންނަ އޮންޓޯބަރު މަހު ހުޅުވުމަށް އަޅުގަނޑުމެން މި އަންނަނީ މަސައްކަތް ކުރަމުން“ ގީލާ ވިދާޅުވިއެވެ.
ގީލާ ވިދާޅުވީ 40-18 އަހަރާއި ދެމެދުގެ އުމުރުފުރާގެ މީހުންނަށް ޚިދުމަތް ދިނުމަށް އަމާޒުކޮށްގެން ތަރައްގީކުރާ އެމްޕަވަރމަންޓް ހަބަކީ، ނުކުޅެދުންތެރިކަން ހުންނަ ފަރާތްތަކުގެ ހުނަރުތައް ތަރައްގީކުރުމަށާއި، މަސައްކަތުގެ ތަޖުރިބާއާއި އިގްތިސާދީ މިނިވަންކަމަށް މަގުފަހިކޮށްދޭ ފުރުސަތުތައް ހޯދައިދިނުމުގެ މަގްސަދުގައި ތަރައްގީކުރާ ތަނެއް ކަމަށެވެ.
ޖުމްލަ 5500 އަކަފޫޓުގެ ޖާގައެއްގައި ހުޅުމާލެ ފޭސް 2ގައި ހުޅުވާ އެ ހަބުގައި ހުންނާނެ ބައިތަކުގެ ތެރޭގައި ހޮސްޕިޓަލިޓީ އަދި ކަލިނަރީ ތަމްރީނާއި، މަސައްކަތުގެ ތަޖުރިބާ ފޯރުކޮށްދިނުމަށް އިންކްލޫސިވް ކެފޭއެއްގެ އިތުރުން ނުކުޅެދުންތެރިކަން ހުންނަ ފަރާތްތައް އުފައްދާ ތަފާތު ތަކެތި މާކެޓުކޮށް ވިއްކުމަށް އާންމުންނަށް ހުޅުވާލާފައިވާ ފިހާރައެއް ހިމެނެއެވެ.
މީގެ އިތުރުން ހަބުގެ ހަރަކާތްތަކުގައި ބައިވެރިވާ ފަރާތްތަކުގެ ޝައުގުވެރިކަމާއި ގުޅުންހުރި އަދި ހުނަރު ތަރައްގީކުރުމަށް ތަފާތު ޕްރޮގްރާމްތައް ހިންގުމަށް ހަބުގައި 3 ވޯރކްޝޮޕް ޖާގައެއްގެ އިތުރުން، ކޮމްޕިއުޓަރާއި އިންފޮމޭޝަން ޓެކްނޮލޮޖީގެ ތަމްރީން ދޭ ތަނެއް ހިމެނެއެވެ. މީގެ އިތުރުން އިޖުތިމާއީ ގުޅުން ބަދަހިކުރުމަށް ތަފާތު ހަރަކާތްތައް ހިންގުމަށް އެކްޓިވިޓީ ރޫމާއި، މަލްޓި މީޑިއާ ރޫމެއްވެސް އެ ހަބުގައި ހުންނާނެއެވެ.
