ބޯންމެރޯ ޓްރާންސްޕްލާންޓުގެ ޚިދުމަތުގެ ދަށުން 28 ތެލެސީމިއާ ކުދިން ބޯންމެރޯ ޓްރާންސްޕްލާންޓް ހެދުމަށް ރާއްޖެއިން ބޭރަށް ފޮނުވިފައިވާ ކަމަށް ސިއްހަތާއި އާއިލާއާއި އިޖްތިމާއީ އެހީއާ ބެހޭ ވަޒީރު ގީލާ އަލީ ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ވަޒީރު ގީލާ އަލީ ވިދާޅުވީ، ތެލެސީމިއާ ކުދިންނަށް ދާއިމީ ޝިފާއެއް ހޯދައިދިނުމަށްޓަކައި ޒަކާތު ފަންޑުން އެހީތެރިކަން ފޯރުކޮށްދިނުމާ ގުޅޭގޮތުން މިނިސްޓްރީ އޮފް އިސްލާމިކް އެފެއާޒާއި މިނިސްޓްރީ އޮފް ހެލްތާ ދެމެދު 21 ފެބުރުއަރީ 2024 ގައި ފަހުމުނާމާއެއްގައި ސޮއިކުރެވިފައިވާ ކަމަށެވެ.
އެ އެއްބަސްވުމުގެ ދަށުން، ކޮންމެ އަހަރަކު 10 ކުއްޖަކު ރާއްޖެއިން ބޭރަށް ފޮނުވުމަށް ހަމަޖެހިފައިވާއިރު ކޮންމެ ކުއްޖަކަށް އެއް މިލިއަން ރުފިޔާ ހަރަދުކުރުމަށް ހަމަޖެހިފައިވާކަމަށް ވަޒީރު ގީލާ ވިދާޅުވިއެވެ.
އެ އިންތިޒާމުގެ ތެރެއިން މިހާތަނަށް 28 ކުއްޖަކު ބޯންމެރޯ ޓްރާންސްޕްލާންޓް ހެދުމަށް ރާއްޖެއިން ބޭރަށް ފޮނުވި، ފަރުވާގެ ކަންކަން ކުރިއަށްދާކަން ވަޒީރު ފާހަގަކުރެއްވިއެވެ.
”ބޯންމެރޯ ޓްރާންސްޕްލާންޓުގެ ޚިދުމަތުގެ ދަށުން 28 ތެލެސީމިއާ ކުދިން ބޯންމެރޯ ޓްރާންސްޕްލާންޓް ކުރުމަށް މިހާރު ވަނީ ފޮނުވިފަ. ކޮންމެ އަހަރަކު 10 ކުއްޖަކު ފޮނުވުމަށް ހަމަޖެހިފައިވާއިރު ކޮންމެ ކުއްޖަކަށް އެއް މިލިއަން ރުފިޔާ ހަރަދުކުރެވޭ“ ޤީލާ
ބޯންމެރޯ ޓްރާންސްޕްލާންޓަކީ މުޅި އުމުރަށް ލޭ އެޅުމާއި މެޑިކަލް ފަރުވާ ބޭނުންވާ، ވާރުތަވާ ލޭގެ ބައްޔެއް ކަމަށްވާ ތެލެސީމިއާއަށް މިވަގުތު އޮތް ހަމައެކަނި ދާއިމީ ފަރުވާއެވެ. އެ ހާއްސަ ފަރުވާގައި ބަލި މީހާގެ ބަލިޖެހިފައިވާ ބޯންމެރޯގެ ބަދަލުގައި، ގުޅޭ ޑޯނަރެއްގެ ދުޅަހެޔޮ ސްޓެމް ސެލްސް ލައްވައި، ހަށިގަނޑުގައި ދުޅަހެޔޮ ލޭގެ ސެލްތައް އުފެއްދުމަށް މަގުފަހިކޮށްދެއެވެ. އެ ފަރުވާ ކާމިޔާބުވުމުން ގަވާއިދުން ލޭ އެޅުން ހުއްޓާލެވި، ދިރިއުޅުމުގެ ފެންވަރު ރަނގަޅުވެ، ބަލީގެ ސަބަބުން ކުރިމަތިވާ ދިގު މުއްދަތުގެ އުނދަގޫތަކުން ބަލިމީހާ ސަލާމަތްވެއެވެ.
ތެލެސީމިއާ ކުދިންގެ ބޯންމެރޯ ޓްރާންސްޕްލާންޓު ދައުލަތުގެ ހަރަދުގައި ހަދައިދިނުމަކީ ރައީސް ޑރ. މުހައްމަދު މުއިއްޒުގެ ވައުދުފުޅެކެވެ.
