ބަތްކައްކާ ކުޅޭ، މީޒާނެއް ނެތް އަދި ލާހޫރޭ އިގްތިސޯދީ ސިޔާސަތުތަކެއް ރާއްޖެއަށް ސަރުކާރުން ގެންނަނީ ކަނު ބަނދެވިގެން ތިބެ ކަމަށް އެމްޑީޕީގެ ޗެއާޕާސަން ރައީސް މުހައްމަދު ނަޝީދު ވިދާޅުވެއްޖެއެވެ.
އެމްޑީޕީގެ ކޮންގްރެސް ފެށުމުގެ ރަސްމިއްޔާތުގައި ރައީސް ނަޝީދު ވިދާޅުވީ، ސަރުކާރުން ބަދަލުތައް ގެންނަންމުން ދިޔައީ އެކި ފަހަރު އެކި ގޮތްގޮތަށް ކަމަށެވެ. ޑޮލަރު މާރުކުރުމަށް މަޖުބޫރުކޮށް، އެ އަދަދު މިހާރު 40 އިންސައްތައަށް ޖައްސައިލައިފި ކަމަށެވެ. މިހާރުވެސް ރިސޯޓުތަކުން އަންނަނީ ޑޮލަރު މާރުކުރަމުން ކަމަށާއި، ދެން އިތުރަށް މާރުކުރާނެ ޖާގައެއް ނެތް ކަމަށް ނަޝީދު ވިދާޅުވިއެވެ.
ނަޝީދު ވިދާޅުވީ، ޑޮލަރުން ކުރަންޖެހޭ ހޭދަ އެހާމެ ގިނަ ކަމަށެވެ. އަދި ބަތްކައްކާ ކުޅޭ، މީޒާނެއްނެތް އަދި ލާހޫރޭ އިގްތިސޯދީ ސިޔާސަތުތަކެއް ރާއްޖެއަށް ގެންނަނީ ކަނު ބަނދެވިގެން ތިބެ ގޮސް އަނދަވަޅަކަށް ވެއްޓެން ކަމަށެވެ. އެހެންނަމަވެސް އެހާލަތަށް ދިޔުމަށް އެމްޑީޕީން އެ ފުރުސަތު ނުދޭނެ ކަމަށާއި، މި ވެރިކަން ބަދަލު ކުރާނެ ކަމަށް ނަޝީދު ވިދާޅުވިއެވެ.
”މި ސަރުކާރު އަޅުގަނޑުމެން ބަދަލުކުރާނަން. ދިވެހި ޑިމޮކްރެޓިކް ޕާޓީގެ ސަރުކާރެއް ދެން އަޅުގަނޑުމެން އިރާދަކުރެއްވިޔާ ގެންނަނީ. ދޮގު ހެދުމާއި އޮޅުވާލުމާއި، މަކަރު ހެދުން މިއީ މި ސަރުކާރުގެ ހަމައެކަނި އަމާޒު. ރައްޔިތުންނަށް ކަމެއް ކޮށްދިނުމުގެ ކުޑަ ހިޔާލެއްވެސް އެބޭފުޅުންގެ ނެތް“
ދަރަންޏާއި ގުޅިގެން ނަޝީދު ވިދާޅުވީ، އަދިވެސް ދަރަނި ދެއްކުމުގެ ކަންކަން އޮތީ ކުރިއަށް ކަމަށާއި، އެހެންނަމަވެސް ދަރަނި ދެއްކުމުގެ އެއްވެސް ސިޔާސަތެއް ސަރުކާރުގައި ނެތް ކަމަށެވެ. އެމަނިކުފާނު ވިދާޅުވީ ބޭރުން ގެނެވުނު ފައިސާއެއް އޮތީ ނޫން ކަމަށާއި، ރަށުގައި ހުރި ހުރިހާ ޑޮލަރެއް އެތަން މިތަނުން ނަގައިގެން އައިސް ދެއްކީ ކަމަށާއި، އެހެން އެކަން ކުރުމުގެ ނަތީޖާއަކަށް ވީ ރަށުގައި ޑޮލަރު ނެތުން ކަމަށެވެ.
މީގެ އިތުރުން ނަޝީދު ވިދާޅުވީ، ބޭންކުން ޑޮލަރެއް ލިބެން ނެތް ކަމަށާއި، ޓީޓީއަކަށް ފައިސާ ދެއްކެން ނެތް ކަމަށާއި އިމްޕޯޓު މުދަލުގެ އަގު ބޮޑުވެއްޖެ ކަމަށާއި އަދި ތަކެތީގެ އަގު އުފުލިގެން ހިނގަންޖެ ކަމަށާއި ދިވެހި ރާއްޖޭގެ ރައްޔިތުންނަށް ދަތިވެއްޖެ ކަމަށެވެ. އެމަނިކުފާނު ވިދާޅުވީ، މިކަންކަން ހިނގަން އެ ފުރުސަތު ދީގެން ނުތިއްބަވާނެ ކަމަށާއި، އެކަން ބަދަލުކުރައްވާނެ ކަމަށެވެ.
