މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ އަމާޒަކީ ކައުންސިލުތަކަކީ އަމިއްލަ ރަށުގެ ނިންމުންތައް ނިންމާ ބަޔަކަށް ހަދައި، ހަގީގީ ލާމަރުކަޒީ ނިޒާމެއް ގެނައުންކަމަށް ކުރީގެ ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.
އަމީރު މިހެން ވިދާޅުވީ، އެ ޕާޓީން ބާއްވާ އިންވެސްޓްމަންޓު ފޯރަމް ”ރަށްވެހި ތަރައްގީ“ އިންވެސްޓްމަންޓު ފޯރަމް ފައްޓަވައިދެއްވައި ވާހަކަ ދައްކަވަމުންނެވެ.
އަމީރު ވަނީ ރަށްރަށުގެ އިގްތިސާދު ބަދަލުކޮށް ވަޒީފާގެ ގިނަ ފުރުސަތުތަކެއް ހޯދައިދޭނެ އެތަކެއް ޕޮރޮޖެކްޓްތަކެއްގެ ޕްރޮޕޯސަލްތަކެއް މިއަދު ފެށުނު ރަށްވެހި ތަރައްގީގެ ތެރެއިން ދައްކާލާނެކަމަށް ވިދާޅުވެފައެވެ.
އެގޮތުން، މިއަދު ފެށިގެންދިޔަ އެ ފޯރަމްގައި ރާއްޖޭގެ ހުރިހާ ސިޓީއެއް ހިމެނޭހެން 14 އަތޮޅެއްގެ 32 ރަށަކުން އިންވެސްޓްމަން ބަޔާންކޮށްފައިވާ 40 ހުށައެޅުމެއް އެ ފޯރަމްގައި ދައްކާލެވިގެންދާނެކަމަށް ވިދާޅުވިއެވެ. އަދި އެ ހުށައެޅުންތަކުގެ ޖުމްލަ އަގަކީ 196 މިލިއަން ޑޮލަރާއި 36 މިލިއަން ޑޮލަރުކަމަށް އަމީރު ވިދާޅުވިއެވެ.
މިއަދު ފެށިގެންދިޔަ އެ އިންވެސްޓްމެންޓު ފޯރަމްގައި ރާއްޖޭގެ އެކި ކައުންސިލްތަކުން އިސްނަގައިގެން ތައްޔާރުކޮށްފައިވާ 40 ޕްރެޒެންޓޭޝަން އިންވެސްޓްމެންޓު ފޯރަމްގައި ހުށަހެޅިގެންދާނެކަން އަމީރު ފާހަގަކުރެއްވިއެވެ.
އެގޮތުން ހުށައެޅިފައިވާ ޕޮރޮޕޯސަލްގެ ތެރޭގައި، ގދ. ތިނަދޫ ސިޓީ ބައިނަލްއަގްވާމީ ބަނދަރާއި، ކޯލްޑް ސްޓޯރޭޖް އާއި ކޭނެރީ ޕޮރޮޖެކްޓު އަދި ފުވައްމުލަކުގައި ގާއިމްކުރުމަށް ހަމަޖެހިފައިވާ ސޯލާ އަދި ބެޓަރި ޕްރޮގްރާމް އަމީރު ފާހަގަކުރެއްވިއެވެ.
މީގެ އިތުރުން، މިއަދު މި ފެށުނު އިންވެސްޓުމަންޓު ފޯރަމްގެ ތެރެއިން ކުދި އިންވެސްޓަރުންނާއި އަދި އަތޮޅުތެރޭގެ ވިޔަފާރިވެރިންގެ ހުށަހެޅުންތަކެއްވެސް ފެނިގެންދާނެކަމަށް ވިދާޅުވިއެވެ.
ފާއިތުވެދިޔަ ދުވަސްތަކުގައިވެސް އެމްޑީޕީގެ ޕްރޮޖެކްޓް އޮފީހުން ކައުންސިލުތަކާއެކު ފީސިބިލިޓީ ސްޓަޑީސް ހެދުމުގެ މަސައްކަތް ކޮށްފައިވާނެ ކަމަށާއި އަދި މުސްތަގުބަލުގައި ފައިނޭންސިންގ އަދި ތަންފީޒުކުރުމުގެ މަރުހަލާތަކުގައި ވެސް މަސައްކަތް ކުރެވިގެންދާނެކަމަށް އަމީރު ވިދާޅުވިއެވެ.
އަމީރު ވަނީ އެ ޕާޓީގެ އަމާޒަކީ ކައުންސިލުތަކަކީ އަމިއްލަ ރަށުގެ ނިންމުންތައް ނިންމާ އަމިއްލަ ރަށުގެ ތަރައްގީ ލީޑުކުރާ ބަޔަކަށްވެ ހަގީގީ ލާމަރުކަޒީ ނިޒާމެއް ގެނެސްދޭނެ ބަޔަކަށް އެ ޕާޓީން ހާދާނެކަމަށް ތަކުރާރުކުރައްވާފައެވެ. އަދި އެ ޕާޓީން ކާމިޔާބީ ފާހަގަކުރާނީ ބިނާކުރާ ޕޮރޮޖެކްޓްތަކާއި އުފެދޭ ވަޒީފާތަކާއި ރަށްރަށުގެ ތަރައްގީންކަމަށް އޭނާ ވިދާޅުވިއެވެ.
