މިއަހަރަށް ލޯކަލް ގަވަމެންޓް އޮތޯރިޓީ (އެލްޖީއޭ) އަށް ދައުލަތުގެ ބަޖެޓުން ފާސްކޮށްދިން އަދަދަށް ވުރެ އިތުރަށް، މިދިޔަ މަހުގެ 24 ވަނަ ދުވަހުގެ ނިޔަލަށް 13 މިލިއަން ރުފިޔާ ހަރަދުކޮށްފިއެވެ.
މިއަހަރަށް އެލްޖީއޭއަށް ފާސްކޮށްދީފައިވަނީ 38.1 މިލިއަން ރުފިޔާގެ ބަޖެޓެކެވެ. ނަމަވެސް މިދިޔަ މަހުގެ 24 ގެ ނިޔަލަށް އެ އޮތޯރިޓީން ވަނީ ޖުމްލަ 51 މިލިއަން ރުފިޔާ ހަރަދުކޮށްފައެވެ. މިއީ އެ އިދާރާއަށް ކަނޑައެޅި ބަޖެޓަށް ވުރެ 34 އިންސައްތަ އިތުރު އަދަދެކެވެ. މިއަހަރު ފާސްކުރި ދައުލަތުގެ ބަޖެޓަށް ވުރެ އިތުރަށް މިހާތަނަށް ހަރަދުކޮށްފައިވާ ހަމައެކަނި އިދާރާއަކީ ވެސް އެލްޖީއޭއެވެ.
މިދިޔަ އަހަރުގެ މި މުއްދަތުގައި އެލްޖީއޭއިން ހަރަދުކޮށްފައިވަނީ 25 މިލިއަން ރުފިޔާއެވެ. އެހެންކަމުން މިއަހަރު ހަރަދުކުރި 51 މިލިއަން ރުފިޔާއަކީ ވޭތުވެދިޔަ އަހަރުގެ އެ މުއްދަތާ އަޅާބަލާއިރު 26 މިލިއަން ރުފިޔާ އިތުރު އަދަދެކެވެ.
ކައުންސިލްތަކަށް ދޭ ބްލޮކް ގްރާންޓަކީ ވަކި ހާއްސަ ބަޖެޓަކުން ދޭ އެއްޗަކަށް ވާއިރު، އެލްޖީއޭގެ ބަޖެޓުން މިހާ ބޮޑަށް އިތުރަށް ހަރަދުވި ސަބަބު އަދި ސާފެއް ނުވެއެވެ.
މީގެ އިތުރުން، އުވާލި ސިޓީސް އެންޑް ލޯކަލް ގަވަނަންސް މިނިސްޓްރީގެ 158 މިލިއަން ރުފިޔާގެ ބަޖެޓުން 68 މިލިއަން ރުފިޔާ ހަރަދުކޮށްފައިވާއިރު، އެ މިނިސްޓްރީގެ ބަޖެޓުގައި ބާކީ ހުރި 90 މިލިއަން ރުފިޔާ ވަނީ އެހެން ވުޒާރާތަކަށް ބަހާލައިފައެވެ.
