އެމްޑީޕީގެ ކުރީގެ ޗެއާޕާސަން ފައްޔާޒް ހުށައަޅުއްވާފައިވާ އަސާސީ ގަވައިދުގެ އިސްލާހަށް ތާއީދުކުރާ މައިގަނޑު ސަބަބުތަކުގެ ތެރޭގައި އެ އިސްލާހުގައި އަންހެނުންގެ ބައިވެރިވުން ބޮޑުތަނުން އިތުރުކުރެވިފައިވުން ހިމެނޭކަމަށް ރައްޔިތުންގެ މަޖިލީހުގެ ކުރީގެ ނައިބު ރައީސް އީވާ އަބްދުﷲ ވިދާޅުވެއްޖެއެވެ.
ފައްޔާޒު ހުށަހަޅުއްވާފައިވާ ގަވައިދަށް ތާއީދުކުރައްވާ އީވާ ވިދާޅުވީ، އެ އިސްލާހުގައި އަންހެނުންގެ ބައިވެރިވުން ބޮޑު ތަނުން އިތުރުކުރެވިފައިވާ ކަމަށެވެ. އަދި ކައުންސިލުތަކާއި މޭޔަރުންނަކީ ބަސް ވިކޭ ބަޔަކަށް ވާންޖެހޭކަމަށް އޭނާ ވިދާޅުވިއެވެ.
މީގެ ކުރިން، އެ ޕާޓީން ދެފަހަރު ވެރިކަން ކޮށްފައިވާކަން ފާހަގަކުރައްވާ އީވާ ވިދާޅުވީ، ވެރިކަމާ ހަވާލުވެ އެ ދެފަހަރުވެސް އުޅެންޖެހެނީ ސަރުކާރު ހިންގުމުގައި ކަމަށާއި އެހެންކަމުން ޕާޓީއަށް ދޭންޖެހޭ ސަމާލުކަން ނުދެވި ޕާޓީގެ ގުޅުމަށް ހީނަރުކަމެއް އައި ކަމަށެވެ.
”ޑަބްލިއުޑީސީ ވިންގްގެ ރައީސަށް އެބަ ބައިވެރިވެވޭ ގައުމީ މަޖިލިސްގަ. އަދި އަންހެނުންގެ ރޫހުގެ އިތުރު މެންބަރުންތަކަކަށް އެބަ ބައިރިވެވޭ، ސެކްރެޓޭރިއޭޓަށް ޑެޕިއުޓީން ހޮވާއިރު އެކަކު ވާން ޖެހެނީ އަންހެނަކަށް،“ އީވާ
ސަރުކާރުގެ އެކިއެކި ކަންކަން ތަންފީޒުކުރާއިރު އެއްވެސް ވަރަކަށް މަޝްވަރާތަކެއް ނުކުރެވި ޕާޓީގެ ނިންމުންތަކާ ވަރަށް ބޮޑަށް ދުރަށް ދެވުނުކަމަށް އޭނާ ވިދާޅުވިއެވެ. އޭނާ ވިދާޅުވީ އެމްޑީޕީން ވެރިކަމަށް އައުމަށްފަހު ޕާޓީގެ އިންތިޒާމުތައް ނުހިނގާ ކަމަށެވެ.
އެހެންކަމުން ފައްޔާޒު ހުށައަޅުއްވާފައިވާ އިސްލާހަކީ އެކަމަށް ވަރަށް ބޮޑަށް ބާރު އެޅޭ އިސްލާހެއްކަން އޭނާ ފާހަގަކުރެއްވިއެވެ. މީގެ އިތުރުން، ގައުމީ މަޖިލީހަށް ގެންނަ ބަދަލުތަކާ ބެހޭގޮތުން އޭނާ ވިދާޅުވީ، ވީހާވެސް ގިނަ މީހުން ޕާޓީގެ ކަންކަމުގައި ޝާމިލުވުމަކީވެސް މުހިންމު ކަމެއް ކަމަށެވެ. އަދި ކައުންސިލުތަކުން ނިންމާ ނިންމުންތަކަކީވެސް ޕާޓީއާ ވަރަށް ގުޅުން ހުރިކަމެއްކަން އޭނާ ފާހަގަކުރެއްވިއެވެ.
އެމްޑީޕީގެ ރައީސާއި ނައިބު ރައީސްގެ މަގާމު އުވާލުމަށް ޕާޓީގެ އަސާސީ ގަވައިދަށް އިސްލާހު ހުށައަޅުއްވާފައިވާއިރު ގައުމީ މަޖިލިސް އެކުލެވިގެންވާ ގޮތަށް ބަދަލު ގެނައުމާއި، ކޮންގްރެސްގައި ބައިވެރިވުމަށް ގޮފިތައް ހެދޭ ގޮތަށް އޮތް އުސޫލަށް ބަދަލު ގެނައުން އޭގެ ތެރޭގައި ހިމެނެއެވެ. އަދި ޕާޓީ ތެރޭގައި ރަސްމީކޮށް ފެކްޝަން އުފައްދައިގެން މަސައްކަތްކުރުން މަނާކުރުމާއި ގޮފިތަކަކީ ހަމައެކަނި ކޮންގްރެސްއަށް މީހުން ހޮވުމަށް ބޭނުންކުރާ ވަސީލަތަކަށް ވާތީ، ގޮފިތައް އުވާލުމަށް ވެސް އިސްލާހުތަކުގައި ހިމެނިއެވެ.
މީގެ އިތުރުން، ގައުމީ މަޖިލީހަށް އިންތިހާބަކާއި ނުލައި، މެމްބަރުން އިންތިހާބުވުން އުވާލުމަށް ހުށަހަޅާފައިވާއިރު، އޭގެ ތެރޭގައި ޕާޓީގެ ބޮޑެތި މަގާމުތައް ވެސް ހިމެނެއެވެ. އެ އިސްލާހުގެ ބޭނުމެއްކަމަށް ބުނެފައި ވަނީ، މެންބަރުންގެ މިނިވަންކަން ކަށަވަރުކުރުމާއި، މަޖިލީހަކީ މުޅިން އިންތިހާބީ ގޮތުން އެކުލެވިގެންވާ މަޖިލީހަކަށް ބަދަލުކުރުމެވެ. އަދި ގައުމީ މަޖިލީހުގެ މެންބަރުންނަކީ ޕާޓީގެ އޮފީހުން މުސާރަ ނުވަތަ އިނާޔަތް ލިބޭ ބަޔަކަށް ވެގެންނުވާނެކަމަށް ވަނީ ބުނެފައެވެ.
