ދިވެހިރާއްޖޭގެ ފަތުރުވެރިކަމުގެ ސިނާއަތުގެ ކުރިމަގު އިތުރަށް ކާމިޔާބުވެ، ފާގަތިވާނެކަމުގެ ފުރިހަމަ ޔަގީންކަމާއި އިތުބާރު އެބައޮތް ކަމަށް އިގްތިސާދީ ތަރައްގީއާއި ދަތުރުފަތުރާއި ވިޔަފާރިއާ ބެހޭ ވަޒީރު މުހައްމަދު ސައީދު ވިދާޅުވެއްޖެއެވެ.
ގައުމީ ފަތުރުވެރިކަމުގެ ދުވަހުގެ މުނާސަބަތުގައި އެކްސް މެދުވެރިކުރައްވައި ފޮނުއްވި މެސެޖެއްގައި ވަޒީރު ސައީދު ވިދާޅުވީ، މިއަދު މި ފާހަގަކުރެވެނީ ދިވެހިރާއްޖޭގެ ޒަމާނީ ތާރީހުގައި ލިޔެވިފައިވާ އެންމެ ފަހުރުވެރި ގައުމީ ކާމިޔާބީއަށް 54 އަހަރު ފުރުނު ތާރީހީ މުނާސަބަތު ކަމަށެވެ.
އެގޮތުން، ނުހަނު އާދައިގެ ގޮތަކަށް ފެށި އެ ދަތުރު، މިއަދު މުޅި ދުނިޔެ ޝައުގުވެރިވާ އަދި އިހުތިރާމްކުރާ ފަދަ ފުރިހަމަ ސިނާއަތަކަށް ބަދަލުވެ، ބައިނަލްއަގުވާމީ ފެންވަރުގައި ދިވެހިރާއްޖެއަކީ އެންމެ މަގުބޫލު އެއް މަންޒިލްގެ ގޮތުގައި ވިދާލާފައިވާކަން ސައީދު ފާހަގަކުރެއްވިއެވެ.
ފަތުރުވެރިކަމަކީ ރާއްޖޭގެ އިގްތިސާދަށް އިންގިލާބީ ބޮޑު ބަދަލެއް ގެނުވައި، ދިވެހި އެތައް ޖީލަކަށް އާމްދަނީއާއި ކުރިއެރުމުގެ ފަހި ފުރުސަތުތައް ހުޅުވައިދިން މައިގަނޑު ސިނާއަތްކަން ފާހަގަކުރައްވަމުން ވަޒީރު ވިދާޅުވީ، ދިވެހިރާއްޖެ ބައިނަލްއަގްވާމީ މައިދާނާ ގުޅުވައިދީ، ދުނިޔޭގެ ޗާޓުގައި ރާއްޖެއަށް ހާއްސަ ގަދަރަކާއި ޝަރަފުވެރި ނަމެއް ހޯދައިދިނީ ވެސް އެ ސިނާއަތުން ކަމަށެވެ. އަދި މިއަދު ފާހަގަކުރެވެމުން މިދަނީ މި ކާމިޔާބު ގައުމީ ދަތުރުގެ ފަހަތުގައިވާ އެންމެހައި ފަރާތްތަކުގެ އަގުހުރި ގުރުބާނީއާއި ބުރަ މަސައްކަތް ކަމުގައިވެސް ވަޒީރު ވިދާޅުވިއެވެ.
ވަޒީރު ވަނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުއަށް ދުވަހުގެ ހެޔޮ އެދުންތައް އަރިސްކުރައްވާފައެވެ. މީގެ އިތުރުން، މި ދާއިރާގައި އަގުނުކުރެވޭފަދަ ހިދުމަތްތަކެއް ކުރައްވަމުން ގެންދަވާ މުރާލި މުވައްޒަފުންނަށާއި، އިންވެސްޓަރުންނާއި، ވިޔަފާރިވެރިންގެ އިތުރުން މި ސިނާއަތުގެ ކުރިއެރުމަށް ގަދައަޅައި މަސައްކަތްކުރައްވާ އެންމެހާ ފަރާތްތަކަށް ވެސް ވަޒީރު ވަނީ ތަހުނިޔާ ވިދާޅުވެފައެވެ.
ރާއްޖޭގައި ކޮންމެ އަހަރެއްގެ އޮކްޓޯބަރު މަހުގެ 3 ވަނަ ދުވަސް ފާހަގަކުރަމުން އަންނަނީ ފަތުރުވެރިކަމުގެ ދުވަހުގެ ގޮތުގައެވެ.
