ގދ. ތިނަދޫ ދެކުނު އަވަށުގެ ފުޓްބޯޅަ ދަނޑުގެ ސަބްބޭސް ހެދުމުގެ މަސައްކަތްތައް ނިމިފައިވާކަމަށް އެމްޓީސީސީން ބުނެފިއެވެ.
އެމްޓީސީސީން މިއަދު ކުރި ޓްވީޓެއްގައި ބުނީ، ފާއިތުވެދިޔަ ހޯމަދުވަހު ތިނަދޫ ދެކުނު އަވަށުގެ ފުޓްބޯޅަ ދަނޑުގެ ސަބްބޭސް ހެދުމުގެ މަސައްކަތްތައް ނިންމާފައިވާކަމަށެވެ.
ޔޫތު މިނިސްޓްރީން އެމްޓީސީސީއާއި ހަވާލުކޮށްފައިވާ މި މަސައްކަތް ކުރިއަށް ގެންގޮސްފައިވަނީ، އެ މިނިސްޓްރީން ދެއްވާފައިވާ ސްޕެސިފިކޭޝަންތަކާއި، މިންގަނޑުތަކާ އެއްގޮތަށްކަމަށް އެމްޓީސީސީން ބުނެއެވެ.
މި މަސައްކަތް ކުރިއަށް ގެންދެވުމުގައި، ސައިޓް ސުޕަވައިޒަރުންނާއި، މަސައްކަތްތެރިންގެ ވާހަކަ ފާހަގަކޮށް އެމްޓީސީސީންވަނީ އެ މުވައްޒަފުންނަށް ޝުކުރުއަދާކޮށްފައެވެ.
މި ގޮތުން އެމްޓީސީސީން ހާމަކުރިގޮތުގައި، ކޮވިޑް-19 އާއި ގުޅިގެން ދިމާވާ ލޮޖިސްޓިކަލް މައްސަލަތައް ހައްލުކޮށް، ޕްރިކޯޝަނަރީ ފިޔަވަޅުތަކާއިއެކު މި މަސައްކަތް ކުރިޔަށް ގެންދިއުމަށް، ސައިޓް ސުޕަވައިޒަރުންނާއި މަސައްކަތްތެރިން ވަނީ ޚާއްސަ ސަމާލުކަމެއްދީގެން މަސައްކަތް ކޮށްފައިވާކަން ފާހަގަކޮށްފައެވެ.
