ދިވެހިރާއްޖޭގެ ޤާނޫނުލްއުޤޫބާތުން މަރުގެ އަަދަބު މުޅިން އުވާ ލެވޭނީ އާންމުންގެ ހިޔާލާއި އެއްގޮތަށް ކަމަށް ދިވެހި ސަރުކާރުން ބުނެފިއެވެ.
އިންސާނީ ހައްގުތައް ރައްކާތެރި ކުރުމަށް ރާއްޖޭން ކުރާ މަސައްކަތްތައް މުރާޖައާ ކުރުމަށް އދ. ގެ ޖެނީވާ އޮފީހުގައި މިއަދު ބޭއްވި ބައްދަލުވުމުގައި ރާއްޖޭގެ ފަރާތުން ވާހަކަ ދައްކަވަމުން ބަނޑާރަ ނައިބް އިބްރާހީމް ރިފްއަތު ވިދާޅުވީ، ގާނޫނުތަކަށް ބަދަލު ގެނެސްގެން ނޫން ގޮތަކަށް ރާއްޖޭގައި މަރުގެ އަދަބު ދިނުން އުވާ ނުލެވޭނެ ކަމަށެވެ. ރިފްއަތު ވިދާޅުވީ މަރުގެ އަދަބު އުވާލުމަށް ރާއްޖެއަށް އެކި ގައުމުތަކާއި، ބައިނަލްއަގުވާމީ ޖަމިއްޔާތަކުން ގޮވާލަމުން ދާ ކަމަށެވެ.
މަރުގެ އަދަބު ދިނުން ތަންފީޒު ކުރުން ރާއްޖޭގައި މަޑުޖައްސާލާފައިވާއިރު، އެ ނިންމުން ރާއްޖެއިން ދަމަހައްޓާނެ ކަމަށް އޮންލައިންކޮށް ކުރިޔަށް ގެންދިޔަ އެ ބައްދަލުވުމުގައި ރިފްއަތު ވިދާޅުވިއެވެ. ރިފްއަތު ވިދާޅުވި ގޮތުން މަރުގެ އަދަބު ދިނުމާއި މެދު ގޮތެއް ކަނޑައެޅެން އޮތީ ރައްޔިތުންގެ މަޖިލީހުން ނިންމާ ނިންމުންތަކެއްގެ މައްޗަށެވެ. އަދި ރައްޔިތުންގެ ހިޔާލެއް ނެތި، މަރުގެ އަދަބު ދިނުން އުވާ ނުލެވޭނެ ކަމަށް އޭނާ ވިދާޅުވިއެވެ.
"The Government of Maldives reiterates its commitment to uphold the informal moratorium on the death penalty. For us, judicial reform and enhancing legislative mechanisms relating to the criminal justice system takes precedence over resuming executions." AG @ibriffath
— AG Office Maldives (@AGOmv) November 4, 2020
މީގެ އިތުރުން ރިފްއަތު ވިދާޅުވެފައިވަނީ، މަރުގެ އަދަބު ތަންފީޒު ކުރުމަށް ވުރެ ރާއްޖޭގެ ޖިނާއީ އަދުލުގެ ނިޒާމު ހަރުދަނާ ކުރުން މާ މުހިންމު ކަމަށެވެ. އަދި އިންސާފުވެރި ފަނޑިޔާރު ގެއަކާއި އެކު، ޝަރުއީ ނިޒާމު މިނިވަން ކުރުން އެއީ ސަރުކާރުގެ ވައުދެއް ކަމަށް ވިދާޅުވިއެވެ.
ރާއްޖޭގެ ގާނޫނުލްއުގޫބާތުގައި ބައެއް ކުށްތަަކަށް މަރުގެ އަދަބު ކަނޑައަޅާފައި ވެއެވެ. އެހެން ނަމަވެސް ފަހުގެ ތާރީހެއްގައި މަރުގެ އަދަބެއް އެއްވެސް މީހަކަށް ދީފައި ނުވެއެވެ. މަރުގެ އަދަބު ދޭން އަލުން ފަށާނެ ކަމަށް ކުރީގެ ރައީސް އަބްދުﷲ ޔާމީން ވިދާޅުވީ ނަމަވެސް އެމަނިކުފާނުގެ ވެރިކަން ވެސް ނިމިގެން ދިޔައީ މަރުގެ އަދަބު ތަންފީޒު ނުކުރެވިއެވެ. އަދި އޭރު މަރުގެ އަދަބު ދޭނެ ގޮތްތަކާއި މެދު ހޫނު ބަހުސްތަކެއް ވެސް ދިޔައެވެ. ރައީސް ޔާމީން އޭރު ނިންމެވީ އިންޖެކްޝަން ޖަހައިގެން މަރުގެ އަދަބު ދިނުމަށެވެ. އަދި އެކަން ތަންފީޒު ކުރުމަށް މާފުށީ ޖަލުުގައި ވަކި ތަނެއް ވެސް ގާއިމް ކުރިއެވެ.
