ފ. ނިލަންދޫގެ ތާރީހީ މިސްކިތް ސަރަހައްދުން އާސާރީ ތަރިކަތަކެއް ފެނިއްޖެއެވެ.
މީގެކުރިންވެސް ބައެއް އާސާރީތަކެތި ފެނިފައިވާ ނިލަންދޫއިން މި ފަހަރު ފެނިފައިވަނީ ހަތަރެސް ބައްޓަމަށް އޮތް އެއް ފޫޓްގެ ބޮޑު ދެ ހިރި ގަލާއި ގަހަނާ އަޅަން ބޭނުންކުރާ ޒާތުގެ ދެ ފޮއްޓެކެވެ.
މިތަކެތީގެ ފޮޓޯ ޓްވިޓާގައި ހިއްސާކޮށްފައިވާ ފަރާތުން ބުނީ އެތަކެއްޗަކީ އިމާރާތްކުރާއިރު، ފައުންޑޭޝަން އެޅުމަށްފަހު އެޔާއެކީ ވަޅުލާ ބުދުދީން ރަމްޒުކޯށްދޭ ގާތަކެއް ކަމަށް ޒަވިއަރ ރޮމެރޯ ފްރިއަސް ކިޔާ ބޭފުޅަކު ވިދާޅުވެފައިވާކަމަށެވެ.
މިތަކެތި ފެނުމުން އެކަން ހެރިޓޭޖް މިނިސްޓްރީގެ ސަމާލުކަމަށް ގެނައުމުން މިނިސްޓަރ ޔުމްނާ ވަނީ އެކަމަށް ޝުކުރު އަދާކުރައްވާފައެވެ. އެކަމަނާ ވިދާޅުވީ އެތަކެއްޗަކީ ބުދު ދީނުގެ ބައެއް ކަންކަން ރަމުޒުކޮށްދޭ އެއްޗެހިކަމަށް ބެލެވޭކަމަށެވެ.