އައްސޭރި ޖަލުގެ ގައިދީންނަށް މެޑިކަލް ކޭމްޕެއް ކުރިއަށް ގެންގޮސްފިއެވެ.
މި ކޭމްޕް އިންތިޒާމްކޮށްފައިވަނީ އައްސޭރި ޖަލުންނާއި ހިންމަފުށީ ކައުންސިލާއި ގުޅިގެންނެވެ. ހެލްތު ކޭމްޕް ކުރިއަށް ގެންގޮސްފައިވަނީ ހިންމަފުށީ ހެލްތް ސެންޓަރާއި މާފުށީ ހެލްތް ސެންޓަރުން ގުޅިގެންނެވެ.
ކޭމްޕްގެ މަގްސަދަކީ، ގައިދީންނަށް ބޭނުންވާ ބޭސް ފަރުވާ ފޯރުުކޮށްދިނުމާއި، ޖަލުގައި ތިބެގެން ސިއްހީ ހިދުމަތްތައް ފޯރުކޮށްދިނުމެވެ. ބައެއް ގައިދީންގެ ބަލި ހާލަތު ހުންނަގޮތުން އެއްތަނުން އަނެއްތަނަށް އުފުލުމުގައި ބޮޑެތި ތަކުލީފާއި ޚަރަދު ހޭދަވާކަމަށް މޯލްޑިވްސް ކަރެކްޝަނަލް ސާރވިސަސްއިން ބުނެއެވެ.
ގައިދީންނާއި ބަންދުގައި ގިނަމުއްދަތަކަށް ތިބޭ މީހުންނަށް އެކިއެކި ސިއްހީ ފަރުވާ ފޯރުކޮށްދިނުމުގައި މާފުށީ ހެލްތް ސެންޓަރުން ވެދެއްވާ އެހީތެރިކަމަށް ކަރެކްޝަނަލް ސާރވިސްގެ ފަރާތުން ވަނީ ޝުކުރުއަދާކުރައްވައެވެ.
މިކޭމްޕްގައި އެތެރެހަށީގެ، ދަތުގެ އަދި ހަމުގެ މައްސަލަތައް ހުރި 20 ގައިދީން ވަނީ އެކަމަށް ޚާއްސަ ޝްޕެޝަލިސްޓުންނަށް ދައްކާފައެވެ.
