އައްޑޫ އިކްއަޓޯރިއަލް ހޮސްޕިޓަލް (އޭއީއެޗް) ގައި ހުރި ސީއާރމް މެޝިނެއް ހުޅުމާލެ ހޮސްޕިޓަލަށް ފޮނުވުމަށް ހަމަޖެހިފައިވާކަމަށް އެ ހޮސްޕިޓަލުން ބުނެފި އެވެ.
ސީ-އާމް އަކީ ސާޖިކަލް އަދި އޯތޮޕީޑިކް ޕްރޮސީޖާތަކުގެ ތެރޭގައި ފްލޯރޮސްކޯޕިކް އިމޭޖިންއަށް ބޭނުން ކުރާ މޯބައިލް އިމޭޖިން ޔުނިޓެކެވެ.
އިކުއިޓޯރިއަލްގައި ހުރި ބައެއް މެޝިނަރީތައް އެހެން ތަނަކަށް ބަދަލު ކުރާކަމުގެ އަޑުތައް ފެތުރިފައި ވަނިކޮށް އެ ހޮސްޕިޓަލުން ކުރ ޓްވީޓެއްގައި ބުނީ ހުޅުމާލެ ހޮސްޕިޓަލަށް ބަދަލު ކުރުމަށް ހަމަޖެހިފައި ވަނީ ތަނުގައި ހުރި ތިން ސީއާމް މެޝިންތަކުން، އެއް މިޝިން ކަމަށެވެ. އެހެން ކަމުން މި މެޝިން ފޮނުވުމަށް ފަހު ވެސް އިތުރު ދެ މެޝިން ހުންނާނެކަމަށާއި، ސީއާމް އަކީ އެކްސްރޭ މެޝިނެއް ނޫން ކަމަށް އެ ޓްވީޓުގައި ބުންޏެވެ.
އޭއީއެޗްއިން ބުނެފައިވަނީ އެއް ވަގުތެއްގައި ދެ ސީއާމް ބޭނުން ނުކުރާނެ ކަމަށެވެ.
އޭއީއެޗްގައި ކަށީގެ އޮޕަރޭޝަންތައްކުރާއިރު ބޭނުންކުރާ 3 ސީ-އާރމް ހުރޭ. މީގެ ތެރެއިން އެއް ސީ-އާރމް ހުޅުމާލެ ހޮސްޕިޓަލަށް ފޮނުވުމަށް ވަނީ ނިންމާފައި. އަދިވެސް 2 ސީ-އާރމް ހުންނާނެ. އެއްވަގުތެއްގައި 2 ސީ-އާރމް ބޭނުންނުކުރާނެއެވެ. ސީ-އާރމް އަކީ އެކްސްރޭ މެޝިނެއް ނޫނެވެ.
— Addu Equatorial Hospital (@aeh_mv) March 20, 2022
ކުރީގެ ރައީސް މުހައްމަދު ނަޝީދުގެ ވެރިކަމުގައި ސާކް ސަމިޓަށް އެޅި، ކޮންވެންޝަން ސެންޓަރު ޓާޝަރީ ހޮސްޕިޓަލަކަށް ބަދަލު ކުރަން ނިންމައި އެކަން ކުރިޔަށް ގެންދިޔައީ މި ސަރުކާރުންނެވެ. އެހެންވެ އެކަމަށް ބޭނުންވާ ގިނަ ސިއްހީ ސާމާނުތައް އައީއެޗްގައި ގާއިމުކޮށްފައިވާއިރު، މީގެއިން ގިނަ ހިދުމަތްތަކަކީ މީގެ ކުރީން ހަމައެކަނި މާލޭގައި ހުރި ހިދުމަތްތަކެވެ.
މިދިޔަ އަހަރުގެ ތެރޭގައި އައްޑޫ ހޮސްޕިޓަލްގައި ކާމިޔާބުކަމާއިއެކު ކަށީގެ އޮޕަރޭޝަންތަކެއް ކުރި ނަމަވެސް މިކަމަށް އެކަށޭނެ ޑޮކްޓަރުން ހޮސްޕިޓަލުގައި ނެތެވެ. މި އޮޕަރޭޝަންވެސް ކުރީ މާލެއިން އައްޑޫއަށް ދިޔަ ޑޮކްޓަރުންގެ ޓީމެއްގެ ފަރާތުންނެވެ.
advertisment